داعش پر لوېديځ د يرغلونو گواښ کړی دئ
۱۳۹۳ اسفند ۲۲, جمعه![](https://static.dw.com/image/18049180_800.webp)
افراطي ډلي «اسلامي اولت» په يوه ږغيز پيغام کي اعلان کړی دئ، چي پر واشنگټن، پاريس او لندن باندي به يرغلونه وکړي.
د دغي ډلي يوه وياند چي خپل ځان ابومحمد عدناني ښيي په يوه ۲۷ دقيقه يي ږغيز پيغام کي په سوريه او عراق کي د دغي ډلي وروستۍ ماتي بې ارزښته بللي دي او روښانه کړې ئې ده چي د دښمنانو تورونه نادرسته دي.
عدناني ويلي دي: «اسلامي دولت به مقاومت وکړي، قدرت به ئې نور هم زيات سي او په پای کي به بريالی وي.»
د اسلامي دولت ډلي وياند بې له دې چي له کوباندي ښاره پر شا کېدو او خپلي ماتي ته اشاره وکړي، وويل: «په کوباني کي جنگ زموږ له پاره بريا حسابيږي. ځکه چي پنتاگون د دغه کوچني ښار د بيرته نيولو له پاره خوشحالي کړې.»
هغه ويلي دي، په داسي حال کي چي امريکا کوچني ښار کوباندي ته سترگي نيولي دي، اسلامي دولت د نړۍ ډېر ستر ښارونه د خپلو يرغلونو هدف گرځولي دي.
عدناني په دغه ږغيز پيغام کي د اسپانيا «غرناطه» ښار، واشنگټن، لندن، پاريس او روم د خپلو يرغلونو احتمالي هدفونو گرځولي دي. هغه ويلي دي: «موږ به سپينه ماڼۍ، بيگ بن ساعت او ايفل برج ونړو.»
د بوکوحرام ډلي رسمي منل
ابومحمد عدناني د بوکو حرام ډلي هغه غوښتنه چي له اسلامي دولت ډلي سره د يوځای کېدو او د ابوبکر بغدادي د بيعت په برخه کي ئې کړې وه، ويلي دي چي د بغدادي له خوا منل سوې ده.
دغه وياند وويل: «موږ تاسو ته دغه ښه پيغام لېږو چي اسلامي دولت د افريقا تر لوېديځه پوري ورسېد.»
عدناني په ټوله نړۍ کي د اسلامي دولت ډلي پلويانو ته وويل: «که د اسلامي دولت ډلي پلويان عراق او سوريې ته په ورتگ کي ستونزي لري، کولای سي له بوکو حرام سره يوځای سي.»
د دغه ږغيز پيغام ريښتنوالی او اعتبا تر اوسه پوري هيڅ يوې سرچينې تائيد کړی نه دئ.
افراطي ډلي بوکو حرام د تيري شنبې په ورځ اعلان وکړ چي د اسلامي دولت ډلي بيعت ئې کړی او خپل ځان د دغي ډلي يو ښاخ بولي.
بوکو حرام چي تر ډېره د نايجيريا په شمال کي فعاله ده په دې وروستيو اوونيو کي ئې په گاونډي هيواد کامرون کي هم يرغلونه کړي دي.