ترهګري ډلي «اسلامي دولت» څو اونۍ دمخه تښتول سوي مسيحيان آزاد کړي دي. دغې ډلې په عيني حال کي د ترکيې سرحد ته نژدې تعرضونه هم پېل کړي دي.
انځور: Reuters/O. Sanadiki
اعلان
افراطي ډلي «اسلامي دولت» په ټوله ييزه توگه ۲۲ يرغمل کسان آزاد کړي دي. دا هغه آشوري مسيحيان ول چي دغي ډلي په فيبرورۍ مياشت کي د سوريې په شمال ختيځ کي د جګړې پر وخت نيولي ول.
د سوريې د بشري حقونو د څار لندن مېشت سازمان ويلي دي چي په آزادو کړل سوو کي ۱۴ښځي هم شاملي دي. ويل سوي دي چي دغه کسان د آشوري کليسا د «نه ستړي کېدونکو» هلو ځلو په پايله کي آزاد کړل سوی دي. د ياد سازمان په وينا آشوري کليسا د دغه مقصد له پاره له تښتونکو سره اوږدي کړي.
۱۸۷ مسيحيان لا يرغمل دي
د بشري حقونو له پاره د آشوريانو سازمان دا خبر تائيد کړی دی چي ۲۲ يرغمل آزاد سوي دي. خو دغه سازمان وايي چي په فيبرورۍ مياشت کي په ټوليزه توګه تر ۲۰۰ زيات آشوري مسيحيان تښتول سوي ول چي تقريبا ۱۸۷ لا تر اوسه له افراطي ډلي «اسلامي دولت» سره بنديان دي.
دا خبره د آشوريانو د ياد سازمان رئيس اوسامه اېډورډ کړې ده. په سوريه کي د کورنۍ جګړې تر پېل دمخه شاوخوا ۳۰ زره آشوري مسيحيان اوسېدل. د هغوی زياتره د الحسکه ولايت په ۳۵ بيلو کليو کي مېشت ول.
په عيني حال کي داعش د سوريې د حلب ولايت په شمال کي د مخالفو مليشو پر ضد تعرضونو پېل کړي دي. د سوريې د بشري حقونو د څار لندن مېشته سازمان ويلي دي چي په دغه جګړه کي دواړو اړخونو ته ځاني تاوانونه اوښتي دي.
په دې ترڅ کي د «سوريې د آزاد پوځ» په نوم ياغيانو ډلي يو قومندان ويلي دي چي په دغه سيمه کي د داعش له پيدايښت راهيسي دا تر ټولو سختي نښتي دي.
د داعش پرضد مبارزې ته د ايراني کردانو تمرينونه
له افراطي ډلي «اسلامي دولت» سره د مبارزې له پاره د عراق په کرد مېشته اربيل ښار کي ايراني کردي ځوانان او پېغلاني پوځي تمرينونه کوي. په دغه مبارزه کي ښځي له نارينو سره پر اوږه ولاړي دي.
