د آلمان د ستر هوايي ډګر پروازونه د اقليم فعالانو بند کړي
۱۴۰۳ مرداد ۴, پنجشنبه
د « Last Generation» يا وروستي نسل اقليمي ډلې د پنجشنبې په سهار د آلمان د فرانکفورت په هوايي ډګر کې احتجاج وکړ چې دا د پروازونو د ځنډیو باعث شو.
دغه ډلې د ټولنیزو رسنيو له لارې ویلي دي: «د تيلو، ګازو او ډبرو سکرو په دومداره ډول را ايستل او سوځول زموږ شتون ته ګواښ دی.»
د هوايي ډګر چارواکو د ايکس شبکې له لارې د يوې اعلامیې په خپرولو سره ويلي دي: «د فرانکفورت په هوایي ډګر کې د يوې مظاهرې له کبله دمګړۍ پروازونه ځنډيدلي دي. له مسافرو غوښتنه شوې ده چې هوايي ډګر ته ولاړ نه شي او لارښوونه ورته شوې ده چې هوايي ډګر ته له ورتګ څخه د مخه بايد د خپل پرواز په اړه معلومات ترلاسه کړي او د سفر له پاره ډېر وخت په نظر کې ونيسي.»
وروسته بيا چارواکو وويل چې پروازونه «په کرار کرار بيرته پیليږي» خو مسافرو ته ويل شوي چې هوایي ډګر ته د تللو له مخه له هوایي شرکت څخه معلومات ترلاسه کړي، ځکه چې لږ تر لږه تر ۱۴۰ ډېر پروازونه لغوه شوي دي.
د دويچه ویله خبريال دانيل کوپ، رپوټ ورکړی دی چې په دې ډېر مصروف هوایي ډګر کې د ترافيک د بیرته پېلېدو په ترڅ کې «ستر» کتارونه ليدل کيږي او ډېر پروازونه ځنډېدلي دي.
فعالانو د احتجاج د يوې لړۍ ژمنه کړې
د وروستي نسل په نامه د اقليمي فعالانو دغه ډله پرون، چهار شنبه د آلمان د نورد راين ويستفالن ایالت د کولن – بن په هوايي ډګر کې هم د فعاليت خنډ ګرځېدلې وه. د دې هوایي ډګر وياند ويلي ول چې فعالان تر هغه وروسته ونیول شول چې پر ځغاست ليکه یې ځانونه اچولي ول.
دې ډلې په ټوله اونۍ کې د يو شمیر مظاهرو ژمنه کړې ده. دغې ډلې د چهار شنبې په ورځ همدا راز په ناروې کې د اوسلو د هوايي ډګر د کټارې ماتولو هڅه کړې وه خو بيا د چارواکو له خوا ونيول شول. دې فعالانو په دې اړه له تبصرې ډډه وکړه چې آيا د پاريس د المپيک لوبې به په نخښه کړي او که څرنګه.
د « Last Generation» ډله په ۲۰۲۱م کال کې جوړه شوې او نوم یې هغه حقيقت ته اشاره ده چې فعالان د هغه ترمخه چې نړۍ د اقليم د بدلون له کبله يوې پریکړنده نقطې ته ورسيږي، ځانونو ته د وروستي نسل په سترګه ګوري.
په آلمان کې د دې ډلې احتجاجونه تر ډېره د سړکونو او ځغاستليکو پر بندولو متمرکز وي چې له دې څخه یې هدف د ترانسپورت د تګلارې اغیزمن کول دي.
تېره مياشت هم کارپوهانو خبرداری ورکړی وو چې آلمان به د ۲۰۳۰م کال د اقليم اهداف چې د افرازتو ۶۵ سلنه راکمول دي، ونه رسيږي.
ب. ص/ ن. ز (dpa, Reuters)
زموږله آرشيف څخه: