د آلمان د نوردراین ویستفالین ايالت د ترهگرۍ سره د مبارزې د مرکز ویاند، دانیل فولمیرت د دوشنبه په ورځ د کولن ښار یوې ورځپاڼي ته ویلي دي چي »موږ متاسفانه په تکرار سره له دا ډول پیښو سره مخامخ کیږو«
د ۲۰۱۸م کال له اپریل میاشتي راهیسي، چي د یوولسو څارنوالانو دغه څانگه جوړه سوې ده، د دغه شان۷۰ پیښو په هکله يې پلټني کړي دي. د لوی څارنوال په حواله »زیاتره پیښې له دې کبله بې نتیجې پاته سوي دي چي نوموړي کسان د پناه غوښتني پروسې پر وخت، د آلمان د مهاجرت ادارې ته د ځان په هکله بل ډول معلومات ورکوي.«
په همدې ارتباط څه وخت مخکي د دوسلدورف په استیناف محکمه کي، ورته پیښه رامنځته سوه. یوه ۲۱ کلن افغان په اول سر کي دلیل راوړی وو، چي د طالبانو د یوه غړي په توگه يې د ۲۰۱۴م کال په جولای مياشت کي په کابل کي په یوه بمي برید کي لاس درلود.
په دغه بريد کي۱۱ افغان سرتیري ووژل سول. دغه کس بيا د اپریل پر ۲۵ مه آزاد کړل سو. خو د پناه غوښتني په پروسه کي بيا دغه کس پر خپلو خبرو پښیمانه سو او ويې ویل چي دا هر څه يې له دې کبله له ځانه جوړ کړي ول چي د مهاجر په توگه يې د قبليدو چانس ډیر سي. داسي ښکاري چي د هغه نژدې ملگرو، نوموړي ته په دې هکله مشوره ورکړې وي.
د رسنیو د رپوټونو په حواله، د جرمني د حقوقي نورمونو پر اساس، په داسي هیوادونو، لکه افغانستان کي په ترهگرۍ باندي تورن کسان په سختو جزا گانو، لکه شکنجه کولو او یا هم اعدام باندي گواښل کیږي. له همدې کبله هغوی نه اخراجیږي. خو دغه ډول مهاجرین بیا په آلمان کي د محکومیدو په صورت کي تر لسو کلونو بند له سزا سره مخامخ کیږي.
(Q.P/N.Z(KNA
زموږ له ارشيف څخه:
په آلمان کي د کومو هیوادونو مهاجرو ډیر جرمونه کړي دي؟
د جرمونو په برخه کي يوې څېړنيزي ادارې په آلمان کې د مهاجرو د جرمونو په اړه نوي ارقام خپاره کړي دي. د دغو مهاجرو ډيری د کومو هیوادونو دي؟
انځور: Getty Images/AFP/A. Messinisپه آلمان کي د مهاجرو نژدې ۳۵ سلنه برخه سوریایان دي، خو په مجموع کې په دغه هیواد کې د مهاجرو د جرمونو ۲۰ سلنه برخه په دوی پوري تړل شوې. په ۲۰۱۷ م کال کې ۳۳ زره سوریایې مهاجر جرمونه کړي دي.
تیرکال تر ۱۸۶۰۰ ډیرو افغان مهاجرو په مختلفو جرمونو کې لاس درلود. په آلمان کې د موجودو مهاجرو ۱۱ سلنه یې افغان مهاجرو کړي دي.
په داسې حال کې چې د عراق مهاجر په آلمان کې د مهاجرو د مجموعي شمیر ۷،۷ سلنه برخه ده، خو په جرایمو کې د هغو ونډه ۱۱،۸ سلنه وه. تیرکال نږدې ۱۳ زره عراقي مهاجرو په آلمان کې په جرمونو کې ونډه لرله.
په داسې حال کې چې د مراکش مهاجر په آلمان کې د مهاجرو ۱ سلنه برخه ده، خو په جرایمو کې د دوی ونډه شاوخوا ۴ سلنه وه. د آلمان د جرایمو د څیړنې ادارې په حواله د مراکش مهاجرو ډير وخت تر یوه وار زیات په مختلفو جرمونو کې لاس درلودلی دی.
د مراکش د ګاونډي هیواد الجزایر مهاجرو هم په جرایمو کې د پام وړ ونډه درلودلې ده. تیرکال تر ۶۰۰۰ ډیرو مراکشي مهاجرو په مختلفو جرمونو کې لاس درلودلی دی.
تیرکال په آلمان کې د مهاجرو د جرمونو ۳،۵ سلنه یې د ایراني مهاجرو وه. نږدې ۶ زره ایراني مهاجرو په مختلفو جرمونو کې لاس درلودلی وو.
د البانيا ۵۷۰۰ مهاجرو په مختلفو جرمونو کې لاس درلود، په داسې حال کې چې تر دې یو کال مخکې یعنې په ۲۰۱۶م کال کې دغه شمیر بیا نږدې ۱۰ زره وو.
تیرکال د سربستان ۵۱۵۸ مهاجرو په مختلفو جرایمو کې لاس درلود، په داسې حال کې چې تر دې یو کال مخکې د دا ډول سربیایې مهاجرو شمیر ۷۵۰۰ وو.
تیرکال په مجموع کې د مهاجرو له خوا په ترسره شویو جرمونو کې د اریتریایې مهاجرو ونډه ۳ سلنه وه. په ۲۰۱۷م کال کې ۵ زره اریتریایې مهاجرو په مختلفو جرمونو کې لاس درلودلی وو، البته په آلمان کې.
په دې برخه کې په لسم نمبر کې د سوماليا مهاجر راځي. تیرکال ۴۸۴۴ سومالیایې مهاجرو په آلمان کې په مختلفو جرمونو کې لاس درلودلی وو.
په یولسم نمبر هم د یوه بل افریقایې هیواد(نایجیریا) مهاجر دي. په ۲۰۱۷م کال کې ۴۷۵۵ نایجیریایې مهاجر په آلمان کې په مختلفو جرمونو کې ښکيل شوي ول.
د آلمان د جرایمو د څیړنې ادارې په حواله تیرکال ۳۸۰۰ پاکستاني مهاجرو په مختلفو جرمونو کې لاس درلود. دا په داسې حال کې ده چې په ۲۰۱۶ کال کې تر ۴۳۰۰ ډیرو پاکستاني مهاجرو په مختلفو جرمونو کې لاس درلود یا یې ترسره کړي دي. په داسې حال کې چې پاکستاني مهاجر په آلمان کې د مهاجرو د مجموعي شمیر ۲،۳ سلنه برخه ده، تیرکال د مهاجرو له خوا په ترسره شویو جرمونو کې هم د دوی ونډه ۲،۳ سلنه وه.
