د پناه غوښتنې د قبولیدو لپاره اساس، د آلمان د اساسي قانون د ۱۶ الف مادې (Art. 16a GG)، او د پناه غوښتنې د قانون د دريمي مادې د لومړي بند (Art. 16a GG§ 3) له مخې د مهاجرو په هکله د ژنیف د منشور (GFK) تعریف دی. دا چې د دغه قانون (§ 3 Abs. 1AsylG) له مخې دغه تعریف څه ډول دی، په راتلونکي انځور کي لوستلای سئ: nds-fluerat.org

« چې د خپل نژاد، دین، ملیت، سياسي مفکورې او يا د ځانګړي ټولنيزي ډلې سره د تړاو له کبله د خپل هغه هيواد څخه بهر وي، چي تابعيت يې لري يا يې هلته د نه تابیعت لرونکی وگړي په توګه ژوند کاوه، خو د تعقيب څخه د ځان ساتنې له پاره د دغه هيواد حفاظت نه سي تر لاسه کولای يا د تعقيب له بيري د دغه حق غوښتنه کول نه غواړي.» قانون: (§ 3 Abs. 1AsylG)

د کډوالو او پناه غوښتونکو له پاره فدرالي اداره په زياتو مواردو کي د پناه غوښتنې ردېدنه په دې توجيه کوي چي گواکې پناه غوښتونکي ته د پورتنیو دلایلو له امله ځير شوي گواښونه، یواځي هغه ته نه، بلکه د دغه هيواد ټولو وګړو ته متوجه دي. معنی دا چې: هر پناه غوښتونکی باید خپله ثابته کړي چې دغه ډول گواښونه یواځي ده ته متوجه دي. nds-fluerat.org

د هغو دلایلو چې یو پناه غوښتونکی پرې تکیه کوي او له خپل هیواد څخه د تیښتې ترمنځ باید داخلي تړاو موجود وي. معنی داچې: نوموړي دلایل باید د تیښتې سبب شوي وي. که د تعقيب او د تېښتي يا هجرت تر منځ زيات وخت تېر سوی وي، نو د هجرت کولو دلايل نور نه منل کيږي، او پناه غوښتنه رديږي.nds-fluerat.org

د قبولۍ له پاره د مهاجر په ټول هيواد کي د تعقيب د ګواښ موجوديت شرط دی. که په هيواد کي داسي امن سيمه موجوده وي چي پکښي پناه غوښتونکی له تعقيب څخه ځان خوندي کولای سي، نو بيا له مهاجره غوښتل کيږي چي د خپل هيواد دننه خوندي سيمي ته دي هجرت وکړي. د (BAMF) اداره او اړونده آلمانۍ محکمې مکلفه دي چي د امن سيمو په تړاو تازه معلومات د بېلګي په توګه له UNHCR څخه ترلاسه کړي. nds-fluerat.org

تر ۲۰۰۵ کال پوري يوازي د هغه چا د پناه غوښتنه قبولېدله چي د يو دولت له خوا تر تعقيب لاندي به ؤ. خو اوس د (§ 3c AsylG) مادې له مخي دغسی تعقیب کیدای سي چې د نورو، دبیلگې په توگه (وسلوالې ډلې) له خوا هم د پناه غوښتنی دلیل وگرځي، البته په دی شرط چې واکمن دولت تر تعقیب لاندې شخص ساتلی نه شي او یا یې ساتل نه غواړي. (§3d AsylG) کيدلای سي.nds-fluerat.org

په راتلونکو انځورونو کي ځیني هغه مهم دلایل او لاملونو څخه لوستلای سئ، چي د پناه غوښتونکي يې د پناه غوښتنې پر وخت د خپل مهاجرت د استدلال له پاره کاروي. په دې تړاو هم معلومات لوستلای سئ چي ايا دغه دلايل په عمومي توګه د پناه غوښتونکي په توګه د قبولېدو سبب ګرځي او که څنګه.nds-fluerat.org

تعقيب بايد ښکاره، څرګند، منطقي، د فهم وړ او په لوی احتمال ممکن وي. زيات وخت پناه غوښتونکې په دې توجيه هم رديږي چي ګواکي «تاسو د تعقيب لاندي راتللو بيره درلوده، خو په حقيقت کي تر لاندي نه ياست راغلي.» مهاجرو ته دا هم ويل کيږي چي ګواکي تاسو د خپل دولت له چارواکو مرسته غوښتلای سوای. زياتره وختونه دا هغو مهاجرو ته ويل کيږي چي وايي له قومي ډلې يا مافيايي ډلې تښتېدلي دي.nds-fluerat.org

د زياتو هغو پناه غوښتونکو د پناه غوښتنه هم په زیاتو مواردو کي ردېدلای سي، څوک چي وايي له دولتي کسانو يا ادارو له خوا تر تعقيب لاندي راتلو بيره يې لرله خو ورته لا زيان نه وي رسېدلی. د بېلګي په توګه د دغه کس پناه غوښتنه په دې دليل ردېدلای سي چي ګواکي د پناه غوښتونکي د هيواد حکومت د بشري حقونو د ساتلو په کوښښ او په ساتلو مکلف دی او عموما د دې توان هم لري.nds-fluerat.org

هغه پناه غوښتونکی د قبولېدو زيات چانس لري چي تر مخه لا په عملي توګه تر تعقيب لاندي راغلی وي. د (BAMF) اداره په داسي صورت کي دې نتيجې ته رسيږي چي که پناه غوښتونکی خپل هيواد ته ولېږل سي، نو احتمال سته چي بيا به ورسره تر تعقيب لاندي راتلو ستونزه تکرار سي او له دې کبله پناه غوښتنه قبولوي. هغه وخت هم قبولي ممکنه ده چي د هجرت څخه دستي مخکي تعقيب رامنځ ته کيدونکی ؤ.nds-fluerat.org

تعقيب چي پخوا لا پای ته رسېدلی وي، د قبولۍ سبب نه ګرځي. د بېلګي په توګه که يو څوک حتی څو کاله بندي سوي وي او سزا يې پای ته رسېدلې وي، نو ښايي په دې دليل يې پناه غوښتنه رد سي چي تعقيب په ماضي کي موجود ؤ خو نور پای ته رسېدلی او د بيا تکرار اشد ګواښ يې نه دی موجود. د يو څو ورځو بندي کېدنه او وهل کېدل په زیاتو مواردو کي ډېر جدي تعقيب او په دې توګه د قبولۍ دلیل نه بلل کيږي.nds-fluerat.org

د يو کس ژوند او آزادۍ ته ګواښ صرف په هغه صورت کي د قبولۍ سبب ګرځېدلای سي، چي پناه غوښتونکي ته د هغه د سياسي مفکورې، دين، نژاد يا بلې ټولنيزي ډلې سره د تړاو له کبله دوامداره او جدي ورپېښ وي. خو دغه ګواښ هم تل د قبولۍ ضامن کیدای نه سي. د بند د سزا گواښ، د بیلگې په توگه، کیدای سي په دی دلیل رد سي چې گواکې د مهاجر اړوند دولت د خپل دولتي گټو د ساتني له امله، د بندي کولو حق لري.nds-fluerat.org

په عمومي توګه جګړې يا کورنۍ جګړې په آلمان کي د پناه غوښتونکي په توګه د قبوليدو يا د ورته حفاظت ترلاسه کولو دليل نه ګرځي. خو که د جګړې تر څنګ په ځانګړې توګه يو شخص ته مستقيم، فردي او ثابت سوی د تعقيب ګواښ موجود وي، قبولي ممکنه ده. خو جګړه او کورنۍ جګړه د اخراج د نه عملي کېدو يا ځنډولو سبب کيدلای سي. nds-fluerat.org

د آلمانۍ محکمو د زياتو فيصلو له مخي يوازي په جګړه کي د عسکر په توګه د جنګېدو څخه انکار يا له جګړې څخه لاس اخيستنه د قبولۍ سبب نه ګرځي، خو هغه وخت سبب ګرځېدلای سي چي له دغه انکار له کبله جزا يې ډېره جدي وي. په جګړه کي د ګډون څخه انکار هله د قبولۍ سبب کېدای سي چي دغه کس و جنايتونو، جنګي جنايتونو (لکه د ملکيانو وژنه) يا د بشريت ضد جنايتونو ته هڅول سوی خو هغه انکار کړی وي. nds-fluerat.org

په اصطلاح «عمومي» ستونزي لکه قحطي، غربت، افلاس او طبعي فاجعې د پناه غوښتونکي په توګه د قبولېدو سبب نه سي ګرځېدلای. هغه پناه غوښتونکی چي صرف په خپل هيواد کي د بې وزلې او مادي غربت د شتون له کبله د مهاجرت خبره کوي، په لوی احتمال به قبول نه سي. خو غربت او ورته ستونزې په ځانګړو مواردو کي د اخراج د عملي کېدو د مخنيوي لامل کيدلای سي. nds-fluerat.org

مېرمني او انجونې چي په خپل هيواد کي د جنسي تاوتريخوالي قرباني سوي وي يا يې د قرباني کيدو حتمي بيره ولري، امکان يې سته چي د پناه غوښتونکو په توګه قبولي سي. خو بعضي وخت د دغو مېرمنو پناه غوښتنه په دې دليل هم رديږي چي په دغه هيواد کي هره مېرمنه له دغه ګواښ سره مخامخ نه ده او دغه مېرمنه د ځان ژغورلو نو امکانات لري. عموما جنسي تېری صرف په استثنيي مواردو کي د قبولۍ سبب ګرځېدلای سي. nds-fluerat.org

زيات وختونه هغه پناه غوښتونکي چي ويل به يې د خپل دين له کبله تر تعقيب لاندي دي، په دې دليل ردېدل چي گواکې کولای سوای چې خپل دیني عقاید پټ وساتي او په عامه توگه بربڼد نه کړي. خو نوې اروپايي حقوقي تگلاره وايي چي انسانان بايد په ښکاره د خپل دين د عملي کولو حق ولري. nds-fluerat.org

د ښځینه او یا نارینه و همجنسبازانو تعقیب د پناه غوښتنې یو دلیل کیدای سي. خو په ټولنه کې یواځې د همجنسبازې په وړاندې تبعیض کفایت نه کوي. خو پناه غوښتنه په دې دليل ردېدلای هم سي چي همجنسباز پناه غوښتونکي کولای سوای په خپل هيواد کي خپل تمايل پټ وساتي. nds-fluerat.org

هغه کسان چي د جنايت له کبله درې کاله بندي سوي وي، د آلمان امنیت او یا عامه امنیت ته ګواښ وي يا ورباندي د بشري حقونو د تر پښو لاندي کولو يا د جنګي جنايتونو تر سره کولو شک وي، د پناه غوښتونکي په توګه نه قبوليږي. وعامه امنیت ته د نورو جرایمو د ارتکاب تر څنگ، هغه څوک هم ګواښ بلل کيدلای سي چي جنسي تیری يا جنسي ځورونه یې کړې وي او د دې جرم له امله په يو کال بند محکوم سوی وي. nds-fluerat.org

د دغه راپور ليکونکی په دغه انځوريز راپور کي د راټولو سوو معلوماتو د بشپړوالي، کاملتوب او تازه والي ادعا نه لري او له کبله يې له هر ډول مسؤليت څخه بري دی. دغه معلومات د مسلکي وکيل او حقوقپوه سره د حقوقي او قانوني مشورې ځای هم نسي نيولای. دغه معلومات د BAMF.DE او د nds-fluerat.org پاڼو څخه د ۲۰۱۷ کال د جنورۍ په ۲۶مه نېټه اخيستل سوي دي.

د آلمان د مهاجرت او پناه غوښتني د فدرالي ادارې د معلومات پراساس د ۲۰۱۶م کال په ترڅ کې په مجموعي ډول ۷۲۲،۳۷۰ نوي غوښتنلیکونه ثبت شوي دي. دغه شمیر د تیر میلادي کال په پرتله ۶۵ سلنه زیاتوالی ښيي. د تیر کال په ترڅ کې په مجموعي ډول ۴۴۱،۸۹۹ کسانو د لومړي ځل له پاره د پناه غوښتنه کړې وه.

په دوهم ځل پناه غوښتنه کې د پام وړ يعنی ۳۳،۳ سلنه کمښت راغلی دی. په ۲۰۱۵م کال کې د دوهم ځال پناه غوښتونکو شمیر۳۴،۷۵۰ کسان وو او دغه شمیر بیا په ۲۰۱۶م کال کې ۲۳،۱۷۵ کسانو ته راکښته شوی دی.

په ۲۰۱۶م کال کې د نویو پناه غوښتني او د دوهم ځل پناه غوښتني مجموعي شمیر ۷۴۵،۴۵۴ کسانو ته رسیږي. په ۲۰۱۵م کال کې دغه شمیر ۴۷۶،۶۴۹ کسان وو. په دې ترتیب سره د آلمان د مهاجرت او پناه غوښتني د فدرالي ادارې د معلوماتو له مخي د پناه غوښتنې په شمیر کې د تیر کال په پرتله ۵۴،۴ سلنه زیاتوالی راغلی دی.

د آلمان د مهاجرت او پناه غوښتني فدرالي ادارې د رپوټ پراساس د منځني ختیځ له جنګ ځپلو هیوادونو څخه تولټال ۲۶۶،۲۵۰ «۳۶،۹سلنه» نوي د پناه غوښتنلیکونه ترلاسه شوي دي. د افغانانو شمیر ۱۲۷،۰۱۲ «۱۷،۶سلنه» ته رسیږي چې دویم ځای لري او ورپسې د عراق کډوال دي چې شمیر یې ۹۶،۱۱۶ «۱۳،۳سنله» کسان ښول شوي.

د ایراني وګړو د پناه غوښتنلیکونو شمیر ۲۶،۴۲۶ ښول شوي چې ۳.۷ سلنه دي. د ایریتیریا د غوښتنلیکونو شمیر ۱۸،۸۵۴ «۲.۶ سلنه»، البانیا ۱۴،۸۵۳ «۲،۱ سلنه»، پاکستان ۱۴،۴۸۴ «۲ سلنه»، نایجیریا ۱۲،۷۰۹ کسانو «۱.۸سلنه»، په آلمان کې د پناه غوښتنه کړې ده.

په ۲۰۱۶م کال کې کابو د دریمه برخه پناه غوښتونکو سن تر۳۰ کلونو ټیټ ښول شوی دی. د ۱۸ او ۲۵ کلنو ترمنځ کسانو شمیر ۱۹۶،۸۵۳ دی چې د ټولو پناه غوښتنلیکونو ۲۳،۵ سلنه ده او په دې ډول سره تر ټولو ستره ډله کسان دي. د ماشومانو چې عمرونه یې د ۴ کلونو څخه کم وی شمیر ۷۸،۱۹۲ دی چې ۱۰،۸ سلنه کيږي.

د آلمان چارواکو په ۲۰۱۶م کال کې له ټولو ۶۹۵،۷۳۳ کسانو څخه ۴۳۳،۹۲۰ کسانو ته په دې هیواد کې د اوسیدو اجازه ورکړې او د هغوی د پناه غوښتني ته یې مثبت ځواب ورکړی دی.

د آلمان د جنايي جرمونو ادارې خبر ورکړی چې د ۲۰۱۶م کال په اوږدو کې د مهاجرو د اوسیدو پر مرکزونو د قصدي او نفرتي جرمونو په ګډون شاوخوا ۹۰۰ بریدونه شوي دي. دغه شمیر بیا په ۲۰۱۵م کال کې ۱۰۳۱ پیښې ښوول شوي دي.

آلمان په ډسمبر مياشت کي تر ۳۰ زيات رد سوي افغان مهاجر افغانستان ته ولېږدول چي پر دې کار پخپله د حکومتي ګوند سوسيال ديموکرات سياستوالو نيوکي وکړې. اوس آلمان غواړي چي په مجموع کي هغه مهاجر چي د يونان له لاري آلمان ته راغلي وي، بيرته يونان ته ولېږي.

د يونان له لاري په ۲۰۱۵م کال کي اروپا ته ډېر مهاجر راغلل. د معلوماتو له مخي اکثره مهاجر چي په ۲۰۱۵ او ۲۰۱۶ کلونو کي اروپا ته راداخل سوي ول، لومړی يونان ته راغلي ول.

يونان ته ډېر پناه غوښتونکي له ترکيې څخه په کوچنيو کښتيو کي اوښتل چي په دې ترڅ کي زيات انسانان ډوب هم سول. دغه انځور يوه سوريايي کورنۍ ښيي چي د اوبو له لاري په ۲۰۱۵م کال د يونان کاوس ټاپو ته رسېدلې وه.

له آلمان څخه يونان ته د مهاجرو د بېرته لېږد په پروسه کي هغه وخت محدوديتونه رامنځ ته سول چي په ۲۰۱۱م کال داسي راپورونه خپاره سول چي په يونان کي د مهاجرو وضعه ښه نه ده. داسي ويل کېده چي يونان د مهاجرو د زياتوالي له کبله تر د هغوی تر هوده نه سي وتلای.

تردې دمخه چي په ۲۰۱۱م کال کي يونان ته د مهاجرو د بېرته لېږد په پروسه کي محدوديت راسي، د دبلين تړون سره سم مهاجر له آلمان څخه بېرته هغه اروپايي هيواد ته لېږدول کېدل چي له لاري يې اروپا ته راداخل سوي ول. يونان ته د مهاجرو د داخليدو دغه پروسه تر ۲۰۱۶م کال پوري په لوړه کچه روانه وه. دغه انځور د ۲۰۱۶م کال په اپريل مياشت کي د ليسبوس ټاپو په يوه مهاجرکمپ کي اخيستل سوی.

د ۲۰۱۷م کال د جنورۍ مياشتي پر۱۱مه نېټه اخيستل سوی د يونان سمندري ځواک د بېړۍ يو انځور چي و ليسبوس ټاپو ته يې په خپله وينا ۵۰۰ مهاجر ورسول. دغه مهاجر په سمندر کي له ستونزو سره مخامخ سوي ول او د دغي کښتۍ له خوا وژغورل سول.

يونان ته تر داخلېدو وروسته زياتره مهاجر، نورو اروپايي هيوادونو ته د رسېدو تلاښ کوي. خو کله چي د بالقان مسير په ۲۰۱۶م کال کي وتړل سو نو ډېر مهاجر په يونان کي بند پاته سول. د دې تر څنګ د اروپايي اتحاديې او ترکيې تر منځ د مهاجرو د بېرته لېږد تړون هم لاسليک سو. دغه انځور د مقدونيا او يونان تر منځ د ايدوميني مهاجر کمپ ښيي.

د «فرانکفرتر الګيماين» ورځپاڼي د راپور له مخي د آلمان د کورنيو چارو وزير توماس ديميزير د کډوالو پر فدرالې ادارې ږغ کړی دی چي له يونان څخه راغلو پناه غوښتونکو څخه صرف د مارچ تر ۱۵مې نېټي پناه غوښتني ومني. په دې توګه سره آلمان غواړي چي د يونان له لاري ورته راغلي مهاجر بېرته يونان ته ولېږدوي. دا په داسي حال کي چي مرستندويه ټولنو په يونان کي د سخت ژمي له کبله د مهاجرو وضعه د اندېښنې وړ بللې ده.

دا چي د آلمان د کورنيو چارو وزير توماس ديميزېر د مارچ ۱۵مه نېټه له يونان څخه د مهاجرو د منلو وروستۍ نېټه وړانديز کړې ده، ښايي په دې وجه چي تر هغه وخته به سخت ژمی پای ته رسېدلی وي. د ۲۰۱۷م کال د جنورۍ پر ۱۱مه نېټه د ليسبوس په ټاپو کي د مهاجرو کمپ دغه انځور د مهاجرو وضعه ښيي.

د اروپايي اتحاديې کميسيون د ۲۰۱۶م کال په دسمبر مياشت کي سپارښتنه کړې وه چي هغه مهاجر چي د ۲۰۱۷م کال د مارچ مياشتي تر۱۵مې نېټي وروسته يونان ته او بيا له يونان څخه «د اصولو خلاف» نورو اروپايي هيوادونو ته ولاړ سي، هغوی بايد بېرته يونان ته ولېږدول سي. ياد کميسيون دغه وړانديز په دې توجيه کړی ؤ چي په يونان کي د پناه غوښتني په پروسه کي موجودي ستونزي تر زياتي اندازې ليري سوي دي.

د آلمان د کورنيو چارو وزير د ۲۰۱۷م کال د جنورۍ مياشتي پر دويمه وويل چي د آلمان د حکومت اقدامات د دې سبب سوي چي په ۲۰۱۶م کال کي آلمان ته د ۲۰۱۵م کال په پرتله لږ مهاجر راسي. دا چي ديميزير اوس د دبلين تړون د بېرته عملي کولو پر لور گام اخلي او غواړي يونان ته د مهاجرو د بېرته لېږد پروسه پېل کړي، ښايي د آلمان د حکومت د هغو هڅو ادامه وي چي مهاجرو ته پيغام ولېږدوي چي آلمان ته مخه ونه کړي.

د پناه غوښتونکو د ملاتړ سازمان «پرو ازيول» د آلمان د حکومت پر هغو پلانونو سختي نيوکي کړي دي چي غواړي مهاجر بېرته يونان ته ولېږدوي. دغه سازمان ويلي چي د مهاجرو د سرپناؤ، له سخت موسم څخه د هغوی د ساتنې او د پناه غوښتنې د پروسې په ترڅ کي نيمګړتياوي لا تر اوسه په يونان کي پر ځای پاته دي.

په دغه کال جرمني ته ۳۰۵زره نوي مهاجر راغلل چي نژدې ۴۷۰۰۰ پکښې افغانان دي او نور د سوريې، عراق، ايران او ايريتريا وگړي بلل سوي دي.

د ۲۰۱۶م کال د نوامبر مياشتي تر پايه پوري ۷۲۳ مهاجرو د پناه غوښتني کړې چي د دوی ډېری په ۲۰۱۵م کال کي جرمني ته راغلي ول. له دې ډلي څخه د ۶۱۵۰۰ کسانو د پناه غوښتنه منل سوې ده.

د روان کال له جنورۍ څخه تر نوامبر مياشتي د «اروپا د اطلاعاتو بانک» کي د ۲۲۶زرو کسانو د پناه غوښتنه ثبت سوې ده چي له دې ډلي څخه ۸۴۸۵۰ کسانو ئې په يوه بل اروپايي هيواد کي هم ځانونه ثبت کړي ول. ۱۴۱۱۵۰ بيا داسي کسان دي چي په غير قانوني توگه د اروپايي ټولني يوه بل غړي هيواد ته تللي دي.

له جرمني څخه د روان کال د نوامبر مياشتي تر پايه پوري ۲۳۷۵۰ مهاجر اخراج سوي دي، چي تر ۲۰۱۵ ډېر او ۲۰۱۴م کال دوه برابره ډېر دي. په دوی کي ډېری افغانان هم دي.

د رسمي معلوماتو له مخي په ۲۰۱۶م کال کي له جرمني څخه نژدې ۵۵زره مهاجر بيرته پخپله خوښه خپلو هيوادونو ته ستانه سوي دي. له هغو کسانو سره چي پخپله خوښه ستنيږي د جرمني حکومت مالي مرستي هم کوي. ويل کيږي چي تر ۱۲۰۰ يورو پوري هم ورکول سوي دي.

د جرمني او اتريش ترمنځ سرحد د جرمني له خوا د موقت وخت له پاره کنترولیږي. د دغه سرحد کنترول به د ۲۰۱۷م کال تر فيبروري مياشتي پوري دوام وکړي. له دغي د بلکان مسير ډېر مهاجر جرمني ته ځانونه رسوي.

د جرمني يوې ورځپاڼي «نويه اوسنابروگه څايتونگ» د فدرالي پوليسو د معلوماتو له مخي ليکلي دي چي په ۲۰۱۶م کال کي د دغه هيواد له سرحدونو څخه نژدې ۲۰۰۰۰ مهاجر بيرته جواب سوي دي. د دوی ډېری افغانان بلل سوي دي.

د کابل نړيوال هوايي ډگر ته رسېدلي افغان مهاجر په نااميدۍ سره له هوايي ډگره وځي. دوی باید اوس خپل ژوند له صفره پيل کړي.

د جرمني له فرانکفورت هوايي ډگره د افغان مهاجرو د انتقال الوتکه. دوی د دوشنبې په ماښام په دغه الوتکه کي د کابل پر لور سپارل کړل سول.

د دغو مهاجرو الوتکه د سه شنبې په ورځ سهار وختي د کابل په نړيوال هوايي ډگر کي کښيناستله.

دغه اخراج سوي مهاجر د کابل په نړيوال هوايي ډگر کي افغان پوليسو ته وسپارل سول.

د دغو اخراج سويو افغانان مهاجرو هويت د کابل په هوايي ډگر کي يووار بيا وڅېړل سو.

کابل ته رسېدلي افغان مهاجر

دا دوهم وار دی چي له جرمني څخه په ډله ايزه توگه افغان مهاجر بيرته خپل هيواد ته لېږل کیږي.

د جرمني حکومت په دې نظر دی چي په افغانستان کي له امنيتي پوله د ډاډ وړ داسي سيمي سته چي دغه کسان پکښې ژوند وکړي.

په جرمني کي په وارو وار د افغان مهاجرو د اخراج پرضد مظاهرې سوي دي.

دا په جرمني کي د يوه افغان هندو د اخراج پرضد مظاهرې انځور دئ.

په دې انځور کي هغه رد سوي افغان مهاجر د کابل په نړيوال هوايي ډگر کي ښکاري چي نژدې يوه مياشت مخکي اخراج سول.

له جرمني څخه اخراج سوي افغان مهاجر وايي چي په افغانستان کي له دوی سره هيڅ ډول مرسته نه ده سوې.

په جرمني کي د هغو افغانانو شمېر زيات سوی چي د اخراج له ويري ئې کليساوو ته پناه وړې ده.