د واده دغې جوړې نکاح وتړله. دوستان او خپلوان یې ورته خوشحاله دي. ځینی پیغلې شاته انتظار باسی چی کله به ناوی خپله د گلانو گیډی شاته وغورځوي. ځکه داسي یو دود سته، هر هغې پیغلې چی دغه گیډۍ ونیوله، نو د هغې بخت به هم په اصطلاح ډیر ژر خلاص سي او په نزدې راتلونکې کي به واده وکړي.

داسی یوه عنعنه موجوده ده چي که زوم تر واده مخکې د ناوی کمیس ووینی، نو بدبختی راولي. که څه هم په اوس وخت کی ډیر کم کسان پر دغه ډول یوې عقیدې باندی باور لري، خو بیا هم ځینی کسان دغه دود په پام کی نیسي. اکثره زومان فقط څو دقیقې مخکی تر واده خپل د ناوی کمیس ویني.

مخکی له واده ناوی او زوم غواړی هر یو په جلا ډول د خپلو نزدو ملگرو یا خورلڼو سره د وروستي ځل له پاره د مجردۍ څخه خوند اخلي. هغوی یو ځای رستورانت ته ځي او یا هم لنډ سفرونه کوي. همدارنگه مخصوص کمیسونهیې اغوستي وي او خلکو ته شیرینۍ گاني تقسیموي او پیسې راټولوي. دغه پیسې بیا په واده کی مصرفيږي.

یو متل دی چی وایی «مات سوي لوښي خوشبختي راولي». له همدې کبله یوه شپه مخکی له واده کورنۍ او ملگري له خپلو کورونو څخه زاړه چینی لوښي راوړي او په گډه یې ماتوي. ویل کیږي چی د هغوی د ماتولو لوړ ږغ گواکی شیطانان او بلاوي لیری کوي. وروسته بیا ناوي او زوم ته وظیفه ورکوي چی ماتی سوي ټوټې راټولې کړي. دا په دې معنی چی هغوی په خپل گډ ژوند کی په گډه کار هم کولای سي.

په پخوانیو پیړیو کی به د یوې نجلۍ له پاره مخکی له واده میده پیسې راټولیدلې چي د واده له پاره د خوب ځای، لوښي او داسی نور توکي واخلي. همدارنگه به ناوی خپل د واده بوټان هم په هغو پیسو رانیول چی مخکی له مخکی یې ټولی کړي وې. دغه ډول یوې نجلۍ ته به په ښه سترگه کتل کیدل یعنی دا چی پیسې سپمولای سي. خو نن ورځ هر څوک کولای سی ځانته یو جوړه د واده بوټان په ارزانه بیه واخلي.

په آلمان کی رسمي نکاح خط ډیر مهم دی، نه دا چي په کلیسا کی واده تر سره سي. د نکاح خط د لاسلیک پر وخت شاهدان هم حاضر وي خو هغوی نور وظایف هم پر غاړه لري لکه د واده د مراسمو تنظیم، د ناوی او زوم د پخوانیو عکسونو راټولول، د میلمنو سرگرمه کول او داسي نور.

د نړۍ په اکثرو هیوادونو کی د واده چله د کیڼ لاس په گوته کیږي خو برعکس په آلمان کی بیا د ښي لاس په گوته. دا چی ولې؛ څوک پرې نه پوهیږي. خو داسی یو اټکل سته چی پخوا به ویل کیدل چی د آلمان قوم د مینی او محبت رگ د ښي لاس څخه تیریږي. همدارنگه ځینی بیا په دې عقیده دي چې که چله ورکه سي نو بدبختی رامنځته کیږي.

زوم او ناوی د یوې زړې روجایی په منځ کی د یوه قلب شکل قیچی کوي. وروسته بیا زوم مجبوره دی چی خپله ناوی له دغه قلبي شکله سوري څخه تیره کړي. دا په دې معنی چی هغوی به په خپل مشترک ژوند کی په گډه سره له خنډونو څخه تیریږي او پر مشکلاتو به برلاسي وي.

ځینی جوړې بیا په گډه سره د یوې ونې قوي تنه قطع کوي. کله چی دغه تنه تر پایه پوری قطع سي بیا نو د دې معنی ورکوي چی هغوی کولای سي د ژوند مشکلات هم په گډه سره حل کړي او په دې ډول یو خوشبخته ژوند ولري.

د واده جوړه په گډه سره کیک ماتوي. دا په دې معنی چی په مشترک ژوند کی به هر څه یو له بل سره تقسیموي. خو دلته بیا په سمبولیک ډول یو پر بل باندی برلاسي ښکاره کیږي. یعنی د هرچا لاس چی د کیک د ماتولو پر وخت پر هغه بل لاس سربیره وي د گډ ژوندانه پریکړې به هم هغه کس کوي. که څه هم اوس پر دې خبره دومره عقیده نه سته خو بیا هم دغه ډول صحنې ته ټول کسان په هیجان سره گوري.

کله چی د واده نوې جوړه خپل کورته راورسیږی نو زوم مجبور دی چی خپله ناوې پورته کړي. په دې ډول گومان کیږي چی هغه خپله ناوی له هغو بلاوو او شیطانانو څخه ساتي چی د هغوی د نیکمرغه ژوند خنډ گرځي. د بلی خوا بیا دا په دې معنی دی چی هغوی د خپل گډ ژوند لومړی قدم په گډه سره اخلي.