اروپايي ټولنه غواړي چې په راتلونکي کال کې د دفاع او پولو ساتنې لپاره زیاتې پیسې ځانګړې کړي. د اروپا پارلمان او د غړو هېوادونو استازو موافقه کړې ده چې د ۲۰۲۶م کال ټولیزه بودیجه به شاوخوا ۱۹۰ میلیارده یورو وي.

د ۲۰۲۶م کال د بودیجې زیات تمرکز به په امنیتي او دفاعي برخو کې وي.

د اروپا پارلمان او د غړو هېوادونو ترمنځ خبرې اترې یې تر سهاره پورې روانې وې او تمه کېږي چې په ځینو برخو کې به لا اوږده مذاکرات ترسره شي.

که څه هم د اروپايي ټولنې ټولیزه بودیجه یو څه راکمه شوې، خو د دفاع او سرحدي ساتنې لپاره لګښتونه لوړ شوي دي.

د تازه خپرو شویو معلوماتو له مخې، د امنیت او دفاع لګښتونه نږدې ۲۰۰ میلیونه یورو زیات شوي او اوس یې اندازه له ۲،۸ میلیارده یورو څخه اوښتې ده.

همدارنګه د مهاجرت د مدیریت او ټولو ساتنې لپاره هم شاوخوا ۲۳۰ میلیونه یورو نور زیات شوي، چې د دې برخې مجموعي بودیجه یې تر ۵ میلیارده یورو پورته کړې ده.

دغه هوکړه لا هم باید د اروپايي ټولنې او اروپا پارلمان لخوا رسمي تایید شي، خو دا پړاو عموماً یوازې تشریفاتي وي.

اروپایي پارلمان د لوړې بودیجې غوښتنه کړې وه

دغه پرېکړه د اروپايي کمېسیون د هغه وړاندیز پر بنسټ شوې ده چې تېر جون یې د راتلونکي کال لپاره نږدې ۱۹۳.۲۶ میلیارده یورو بودیجه وړاندیز کړې وه.

د کمېسیون په وینا، دا بودیجه باید د اوکراین د ملاتړ او د اروپايي هېوادونو د پیاوړتیا لپاره هم وکارول شي.

تېرکال د دغې ټولنې غړو هېوادونو او پارلمان د ۲۰۲۵م کال لپاره شاوخوا ۲۰۰ میلیارده یورو بودیجه تصویب کړې وه.

خو د ۲۰۲۶م کال لپاره غړو هېوادونو یوازې ۱۸۶.۲۴ میلیارده یورو وړاندیز کړي وو، په داسې حال کې چې پارلمان تل د لوړې بودیجې غوښتنه کوي او د ۱۹۳.۹ میلیارده یورو غوښتنه یې کړې وه.

جرمني د اروپایي ټولنې د بودیجې څلورمه برخه ورکوي

د ۲۰۲۶م کال بودیجه د څوکلن مالي چوکاټ (MFF) د ۲۰۲۱–۲۰۲۷م دورې شپږ کلن پلان دی.

په ټوله کې د اروپايي ټولنې بودیجه شاوخوا ۱.۱ ټریلیون یورو اټکل کېږي.

جرمني چې تر ټولو لوی خالص تمویل کوونکی دی، د دې بودیجې نږدې یوه پر څلورمه برخه ورکوي. د جرمني حکومت ټینګار کوي چې دا هېواد له اروپايي داخلي بازار څخه تر ټولو ډېر اقتصادي ګټه ترلاسه کوي.

اوس مهال په بروکسل کې د ۲۰۲۸–۲۰۳۴ د نوې مالي دورې په اړه خبرې روانې دي.

اروپايي کمېسیون د راتلونکې اوه کلنې دورې لپاره نږدې ۲ ټریلیونه یورو بودجه غواړي چې دا د اوسنۍ دورې په پرتله ۷۰۰ میلیارده یورو ډېره ده.

جرمنی د بوديجې د زياتولو وړاندیز په کلکه رد کړی دی

په پارلمان کې هم پر دې پلان نیوکې شوې دي، ځکه وړاندیز کوي چې د کرنې ګډې تګلارې او د وروسته پاتې سیمو لپاره جلا جلا صندوقونه ختم شي او پر ځای یې یو لوی صندوق جوړ کړي. تمه کېږي چې دا به اوږدې او سختې خبرې اترې وي.