د آلمان د اساسي قانون د ساتنې ادارې مشر هنس جورج ماسین، د دوشنبې په ورځ وویل چې د آلمان د اسلاميستو کورنیو ماشومان «یو داسې بالقوه ګواښ رامنځ ته کوي چې بې ارزښته» نه دی.
په آلمان کې د اساسي قانون د ساتنې اداره د دې هیواد کورنۍ استخباراتي اداره ده.
د آلمان د اساسي قانون د ساتنې ادارې په یوه نوي رپوټ کې چې د فونکه رسنیزې ډلې یې په حواله دغه خبر خپور کړی دی، ویلي دي چې داسې نخښې شته چې ښيي د «کم عمره ماشومانو او تنکیو ځوانانو افراطي کیدل» د پخوا په پرتله ډیر ممکن دي او تر پخوا په سرعت سره هم ترسره کیږي.
د دې استخباراتي ادارې په حواله په آلمان کې له دې کبله نزدې ۳۰۰ ماشومان اغیزمن شوي دي. په رپوټ کې راغلي دي چې په ځینو دغو کورنیو کې ماشومانو ته «د زیږدو له وخت راهیسې افراطي عقاید ښوول کیږي چې له مخې د نورو پر وړاندې تاوتریخوالی توجیه کیږي او هغو کسانو ته په کم نظر کتل کیږي چې د دوی ډلې پورې تړاو و نه لري.»
په رپوټ کې د هغو کورنیو په اړه چې په منځني ختیځ کې یې د جګړو سیمو ته سفر کړی او یا هم په آلمان کې پاتې شوې دي، اندیښنه ښول شوې ده. ماسین خبرداری ور کړی دی چې د هغه په خبره د ماشومانو جهادي تربیه کول «د اندیښنې وړ» موضوع ده او په راتلونکو کلونو کې به چارواکو ته په یوې جدي ننګونې بدل شي.
آلماني سیاستوال وايي د منځني ختيځ د جگړو سيمو ته تللي يو شمير کسان ډير کم عمره ولانځور: Getty Images/AFP/S. Hamed د کم عمره کسانو څارنه
د آلمان د اساسي قانون د ساتنې ادارې موندنې د دې لامل شوي چې د صدراعظمې انګلا میرکل، د عیسوي دیموکرات اتحاد د ګوند یو شمیر غړي د څارنې له پاره د ټاکل شوي حد اقل عمر د لا ټیټیدو غوښتنه وکړي.
د دې ګوند یوه غړي پاتریک سینسبورګ، د فونکه رسنیزې ډلې ته ویلي دي: «دا په دې معنی نه ده چې تر ۱۴ کلونو کم عمر لرونکي کسان دې مجرم وبلل شي، بلکې موخه یې داده چې زموږ له هیواد څخه دې ځینې ګواښونه لیرې کړای شي. د بیلګې په توګه اسلامي ترهګري چې ماشومان هم خپل هدف ګرځوي.»
په بایرن ایالت کې د انګلا میرکل متحد ګوند مسیحي سوسیال اتحاد د کورنیو چارو ویاند ستیفن مایر، هم ویلي دي چې دغه تدابیر به همداراز د زیانمنو شویو ماشومانو د ساتنې له پاره وي. هغه زیاته کړې ده چې په منځني ختیځ کې د جګړو سیمو ته تللې یو شمیر کسان ډیر کم عمره ول.
sm/bs (Reuters, AFP, dpa, KNA)
زموږ له آرشيف څخه:
په آلمان کي د کومو هیوادونو مهاجرو ډیر جرمونه کړي دي؟
د جرمونو په برخه کي يوې څېړنيزي ادارې په آلمان کې د مهاجرو د جرمونو په اړه نوي ارقام خپاره کړي دي. د دغو مهاجرو ډيری د کومو هیوادونو دي؟
انځور: Getty Images/AFP/A. Messinisپه آلمان کي د مهاجرو نژدې ۳۵ سلنه برخه سوریایان دي، خو په مجموع کې په دغه هیواد کې د مهاجرو د جرمونو ۲۰ سلنه برخه په دوی پوري تړل شوې. په ۲۰۱۷ م کال کې ۳۳ زره سوریایې مهاجر جرمونه کړي دي.
تیرکال تر ۱۸۶۰۰ ډیرو افغان مهاجرو په مختلفو جرمونو کې لاس درلود. په آلمان کې د موجودو مهاجرو ۱۱ سلنه یې افغان مهاجرو کړي دي.
په داسې حال کې چې د عراق مهاجر په آلمان کې د مهاجرو د مجموعي شمیر ۷،۷ سلنه برخه ده، خو په جرایمو کې د هغو ونډه ۱۱،۸ سلنه وه. تیرکال نږدې ۱۳ زره عراقي مهاجرو په آلمان کې په جرمونو کې ونډه لرله.
په داسې حال کې چې د مراکش مهاجر په آلمان کې د مهاجرو ۱ سلنه برخه ده، خو په جرایمو کې د دوی ونډه شاوخوا ۴ سلنه وه. د آلمان د جرایمو د څیړنې ادارې په حواله د مراکش مهاجرو ډير وخت تر یوه وار زیات په مختلفو جرمونو کې لاس درلودلی دی.
د مراکش د ګاونډي هیواد الجزایر مهاجرو هم په جرایمو کې د پام وړ ونډه درلودلې ده. تیرکال تر ۶۰۰۰ ډیرو مراکشي مهاجرو په مختلفو جرمونو کې لاس درلودلی دی.
تیرکال په آلمان کې د مهاجرو د جرمونو ۳،۵ سلنه یې د ایراني مهاجرو وه. نږدې ۶ زره ایراني مهاجرو په مختلفو جرمونو کې لاس درلودلی وو.
د البانيا ۵۷۰۰ مهاجرو په مختلفو جرمونو کې لاس درلود، په داسې حال کې چې تر دې یو کال مخکې یعنې په ۲۰۱۶م کال کې دغه شمیر بیا نږدې ۱۰ زره وو.
تیرکال د سربستان ۵۱۵۸ مهاجرو په مختلفو جرایمو کې لاس درلود، په داسې حال کې چې تر دې یو کال مخکې د دا ډول سربیایې مهاجرو شمیر ۷۵۰۰ وو.
تیرکال په مجموع کې د مهاجرو له خوا په ترسره شویو جرمونو کې د اریتریایې مهاجرو ونډه ۳ سلنه وه. په ۲۰۱۷م کال کې ۵ زره اریتریایې مهاجرو په مختلفو جرمونو کې لاس درلودلی وو، البته په آلمان کې.
په دې برخه کې په لسم نمبر کې د سوماليا مهاجر راځي. تیرکال ۴۸۴۴ سومالیایې مهاجرو په آلمان کې په مختلفو جرمونو کې لاس درلودلی وو.
په یولسم نمبر هم د یوه بل افریقایې هیواد(نایجیریا) مهاجر دي. په ۲۰۱۷م کال کې ۴۷۵۵ نایجیریایې مهاجر په آلمان کې په مختلفو جرمونو کې ښکيل شوي ول.
د آلمان د جرایمو د څیړنې ادارې په حواله تیرکال ۳۸۰۰ پاکستاني مهاجرو په مختلفو جرمونو کې لاس درلود. دا په داسې حال کې ده چې په ۲۰۱۶ کال کې تر ۴۳۰۰ ډیرو پاکستاني مهاجرو په مختلفو جرمونو کې لاس درلود یا یې ترسره کړي دي. په داسې حال کې چې پاکستاني مهاجر په آلمان کې د مهاجرو د مجموعي شمیر ۲،۳ سلنه برخه ده، تیرکال د مهاجرو له خوا په ترسره شویو جرمونو کې هم د دوی ونډه ۲،۳ سلنه وه.
