«د اسلامي دولت ډلي له کنتروله ډيري سيمي وتلي»
۱۳۹۴ فروردین ۲۵, سهشنبه![](https://static.dw.com/image/18289815_800.webp)
د امریکا متحدو ایالاتو د دفاع وزارت ویاند ستیفن وارن په واشنگټن کې وویل: «اسلامي دولت ډله په عراق کې اوس د هغو سیمو له ۲۵ څخه تر ۳۰ سلنه برخه کې د جگړې توان نه لري، چې په اگست میاشت کې په بشپړه توگه آزادې سره پکښې گرځیدل».
هغه زیاته کړه چې د «اسلامي دولت» ډلي جنگياليو له ۱۳۰۰۰ څخه تر ۱۷۰۰۰ کیلومتره مربع ساحه کې خپل کنترول له لاسه ورکړی دی. په ځانگړي توگه د عراق په مرکز او شمال کي.
یوه اوږده مبارزه
وارن وویل چې هوایې يرغلونو او د عراقي ځواکونو ځمکنیو عملیاتو د دغي افراطي ډلي توان، د نیول شوو سیمو ساتل او په دغو سیمو کې د آزاد گښت کمزوری کړی دی. د هغه په خبره دا تر وخت دمخه خبره ده چې وويل شي لوبي بدلون موندلی.
د پنټاگون ویاند دې خبري ته هم اشاره وکړله چې د «اسلامي دولت» ډله اوس کرار کرار پر شاتمبول شوې خو دا مبارزه به ډیر وخت ونیسي.
د تیرکال په اگست میاشت کې، کله چې د ترهگري ډلي اسلامي دولت پوځي بریالیتوبونو زور واخيست، د امریکا متحدو ایالاتو په مشرتوب نړیوال ايتلاف د دغې ترهگري ډلي پر ضد هوايي عملیات پیل کړل.
د امریکا د دفاع وزارت د معلوماتو له مخې له هغه وخت راهیسې تر اوسه پوري د اسلامي دولت ډلي پر ضد په دوامداره توگه ۳۲۴۴ هوایې يرغلونه شوي دي.
د دغو يرغلونو له جملې څخه ۱۸۷۹ یې په عراق او ۱۳۶۵ یې بیا په سوریه کې پر يادي ترهگري ډلي باندي شوي دي. نږدې۸۰ سلنه بمبارۍ د امریکا متحدو ایالاتو جنگي الوتکو کړي دي.
د۲۰۱۴م کال د دوبي تر تعرضي بریدونو وروسته «اسلامي دولت» ډلي په عراق او سوریه کې تر خپل کنترول لاندي سیمو کې «اسلامي خلافت» اعلان کړ.
د امريکا د دفاع وزارت وياند وارن، وايي چې اسلامي دولت ډلي تر ډیر وخته پوري په سوريه کې خپل پراخ نفوس ساتلی وو.
دغي ډلي له ترکیې سره د سرحدي ښار کوباني کنترول له لاسه ورکړ، خو د دمشق او حمص شاوخوا سیمي يې ونیولې. په دغو سیمو کې د سوریې په مرکزي ښار «یرموک» کې د فلسطیني کډوالو په کمپونو کې د دوی قرارگاوي هم شاملي دي.