د «اسلامي دولت» ډلې د غړو شمیر تر مخکنیو اټکلونو ډیر دی
۱۳۹۳ شهریور ۲۱, جمعه![](https://static.dw.com/image/17915682_800.webp)
امریکا متحده ایالات اوس وايی چی د «اسلامي دولت» نومې ترهگرې ډلې د غړو شمیر دری برابره له هغه څخه زیات دی چې په لومړې سر کې یې اټکل کیده. له دې سره د دغو ترهگرو د ځپلو له پاره د امریکا متحده ایالاتو په مشرۍ یو نړیوال ائتلاف د جوړیدو په حال کې دی. د CIA ویاند راین تریپنې، ویلي دي: «د مې او اگست د میاشتو د استخباراتي معلوماتو پر بنسټ CIA اټکل کوي چې د عراق او شام اسلامي دولت نومې ډلې د غړو شمیر په سوریه او عراق کې د ۲۰ زرو او ۳۱۵۰۰ تر منځ وي.»
راین زیاته کړه: «د دغه نوي زیاتوالي دلیل دا دی چې د جون په میاشت کې د جگړې په ډگر کې د نوموړې ډلې تر پر له پسې بریالیتوبونو، د یو اسلامی خلافت اعلان او د جگړې په ډگر کې د فعالیتونو د پراخیدو څخه وروسته هغه وتوانیده چې یو زیات شمیر نور کسان په خپلو لیکو کې جذب کړي.»
د «اسلامې دولت» نومې ډلې پر ضد نړیوال ائتلاف
CIA د «اسلامي دولت» د ملیشو د زیاتوالي په هکله دغه نوی اعلان یوه ورځ وروسته له هغې وکړ چې ولسشمر بارک اوباما د دغې افراطی ډلې پر ضد د هوايي بریدونو د پراخیدو ژمنه وکړه. د اوباما د پلان له مخې د نوموړو ملیشو پر ضد به نه یوازې په عراق بلکې په سوریې کې هم په هوایی بریدونو لاس پوری شي. سر بیره پر دې د متحده ایالاتو پوځيان به عراقي او کردي سرتیری وروزي او هغوی به په پوځي تجهیزاتو سمبال کړي.
په عین وخت کې د «اسلامي دولت» د ډلې پر ضد د امریکا متحده ایالاتو په مشرۍ یو نړیوال ائتلاف د جوړیدو په حال کې دی. د متحده ایالاتو د بهرنیو چارو وزیر جان کیری له خپلو عربي سیالانو سره له یوی لیدنې کتنې وروسته د سعودي عربستان په شمول لسو عربي هیوادونو د «اسلامي دولت» نومې ډلې پر ضد په یوې پراخې جگړې کې د برخې اخیستو له پاره موافقه کړې ده.
له دې سره نو اوس روښانه شوې ده چې اسلامي حکومت د خپلو ډیرو جنگیالیو په مرسته کولای شي لا ډیرې ستونزې رامنځ ته کړي. له همدې کبله ښايي اوباما د اسلامي دولت پر ضد په عراق او سوریه کې د نویو پراخو هوایي بریدونو پلان اعلان کړې وي. له بلې خوا د عراق نوي حکومت او د سوریې اپوزیسیون د اوباما د دغه پلان هرکلی کړی دی خو د سوریې ولسمشر بشارالاسد او نړیوال پیاوړي ملگري هیواد روسیې بیا د اوباما دغه نوی پلان غندلی دی.
سوریایي چارواکو ویلي دي چې د دغه هیواد د حکومت له موافقې پرته د هغه په خاوره کې عملیات کول په اصل کې پر سوریې باندې برید دی. د روسیې د بهرنیو چارو وزارت یوه ویاند هم روښانه کړې ده چې د سوریې تر موافقې پرته هر عمل د نړیوالو قوانیو سخت ماتول دي.
اوباما ویلي دي جې له اسلامي حکومت سره د مبارزې له پاره د چمتو کیدو په موخه عراق ته ۴۷۵ پوځي روزونکي استوي تر څو د دې هیواد پوځ وروزي. خو هغه روښانه کړه چې دا کار عراق ته بیا د جنگي ځواکونو د استولو په معنی نه ده. له بلې خوا د پنتاگون په حواله امریکايي پوځي الوتکې به هم په عراق کې خپل عملیات پراخ کړي.
د اسلامي حکومت ډلې د عراق او سوریې یو شمیر سیمې تر خپل کنترول لاندې راوستي دي او په کې ډیر سخت قوانین یې وضع کړي دي.