په ۱۹۳۰م کال کې د فوټبال د لومړني نړیوال جام غوره گول وهونکی، د ارجنټاین د ملي لوبډلې لوبغاړی گیلیرمو ستابیله، وو. ستابیله په دغه نړیوال جام کې د ارجنټاین د ټولو ۱۴ گولونه څخه اته گوله ووهله، چې یوازي په څلورو سیالیو کې یې دغه گولونه وهلي ول.

اولدریش نهیلدي، سړی کولای شي د شلمې پیړۍ د ۳۰مي لسیزي د فوټبال له سترو لوبغاړو څخه د یوه ستوري په توگه یاد کړي. اولدریش نهیلدي له ۱۹۳۱کال څخه تر ۱۹۴۱م کاله پوري د پراگ په سپارتا کلب کې په ۴۱۵ لوبو کې ۳۸۸ گولونه ووهل. که څه هم دغه لوبډلي په پاېلوبه کې پر کوربه لوبډلي پر ایټالیا باندي بايلوده، خو نهیلدي د پنځو گولونو په وهلو سره د سیالیو غوره گول وهونکی شو.

د برازیل د ملي لوبډلي فارورد لئونیداس (په انځور کې ښي لاس ته) کولای شو د فوټبال د مودرن ستوري په توگه یاد کړو. هغه د «تور الماس» په نوم شهرت موندلی وو. ده په ۱۹۳۸م کال په فرانسه کې په ترسره شوي نړیوال جام کې په اوو گولونو وهلو سره د غوره گول وهونکي لقب خپل کړ. کله چې دی له دغه نړیوال جام څخه خپل هیواد ته ستون شو نو د شکلات جوړولو یوې فابریکې د «تور الماس» په نامه یو محصول بازار ته وړاندي کړ.

آده میر (په انځور کې ښی لاس ته) د برازیل د ملي لوبډلي له هغو ستورو څخه دی چې څه نا څه له یاده ایستل شوی دی. هغه د ۱۹۵۰ کال د فوټبال په نړیواله سيالي کې چې خپله په برازیل کې تر سره شوه، په ۹ گولونو وهلو سره د دغو سیالیو غوره گول وهونکی وو. خو هغه څه چې په دغو سیالیو کې د برازیلیانو په ذهنونو کې پاته دي د اوروگوای په مقابل کې په پاېلوبه کې دوه د یو په مقابل کې ماته خوړل دي.

په سویس کې د ۱۹۵۴م کال د فوټبال په نړیوال جام کې د هنگري لوبډلي لوبغاړي شاندور کوچیش په ۱۱ گولونو وهلو سره د دغه سیالیو غوره گول وهونکی شو. هغه دغه ۱۱ گولونه په لومړینو څلورو لوبو کې وهلي ول. کوچیش د خپلي ملي لوبډلې له پاره په ۶۸ سیالیو کې ۷۵ گوله وهلي ول، چې له دې گولونو څخه ډېر يې په سر ووهل. له همدې کبله کوچیش (د طلایي سر) په نامه هم شهرت موندلی وو.

د فرانسې خطرناک فارورد، ژوست فونتین، د سیالیو په یوه دوره کې د ۱۳ گولونو ریکارډ جوړ کړ، چې تر اوسه لا مات شوی نه دی.

د ۱۹۶۲م کال د فوټبال په نړیوال جام کې ۶ لوبغاړو څلور څلور گولونه وهلي ول. په دغو کسانو کې د برازیل هیواد گارینشا، د هنگري هیواد فلوریان آلبرت، د پخواني شوروي اتحاد والنتین ایوانوف، د یوگوسلاویا هیواد دراژان جرکوویچ، د برازیل هیواد واوا او د چیلي هیواد و لئونل سانچز شامل وو. گارینشا د قرعې په گټلو سره د دغو سیالیو غوره گول وهونکی شو.

د پرتگال هیواد لوبغاړي اوزه بیو، چې د پرتگال د تور پړانگ په نامه هم مشهور دی، یوازي یو وار نړیوال جام ته لار ومونده، خو په نړیوال جام کې دغه یو ځل لوبیدل د ده له پاره کافي ول. هغه په ۹ گولونو وهلو سره د فوټبال د نړیوالو اتلوليو د غوره گول وهونکو په ليست کې شامل شو. هغه د پرتگال له پاره په ۶۴ سیالیو کې مجموعا ۴۱ گولونه وهلي ول.

گېرد مولر له ۱۹۶۶م کال څخه تر ۱۹۷۴م کاله پوري د آلماني په ملي ټیم کې ولوبید. هغه په دې اتوو کلونو کې د آلمان له پاره ۶۲ لوبې وکړې او ۶۸ گولونه يې ووهل. مولر د ۱۹۷۰م کال د فوټبال په نړیوال جام کې په لسو گولونو وهلو سره د دغو سیالیو غوره گول وهونکی شو.

گشگوش لاتو، د پولنډ لوبډلې له بهترینو فاروردانو څخه شمیرل کیږي. هغه د ۱۹۷۴م کال د فوټبال په نړیوال جام کې د ۷ گولونو په وهلو سره د سیالیو د غوره گول وهونکي لقب وگاټه.

د ۱۹۷۸م کال د ارجنټاین د پخواني ملي لوبغاړي ماریو کمپس له پاره د بریا کال وو. کمپس له خپل ملي ټیم سره نه یوازي په دغه کال کې په خپله خاوره کې د نړیوال جام اتل شو، بلکي په ۶ گولونو وهلو سره د دغو سیالیو غوره گول وهونکی هم شو.

په هسپانيا کې په ۱۹۸۲م کال کې په تر سره کیدونکي نړیوال جام کې د ایټاليا فوټبال د ملي لوبډلې لوبغاړي پائولو روسي، په شپږو گولونو وهلو سره د دغه سیالیو غوره گول وهونکی شو. روسي په همدغه کال کې د اروپا د غوره فوټبالر لقب هم وگاټه.

گري لینکر، سړی کولای شي په اتیایمه لسیزه کې، د بريتانيا لوبډلي د بهترین فارورد، په توگه یاد کړي. هغه له ۱۹۸۴کال څخه تر ۱۹۹۲ کاله پوري د بريتانيا له پاره په ۸۰ لوبو کې ۴۸ گولونه ووهل. د ۱۹۸۶م کال په نړیوال جام کې هغه په شپږو گولونو وهلو سره د غوره گول وهونکي لقب خپل کړ.

په ۱۹۹۰ کال کې په ایټالیا کې د فوټبال په ترسره شوي نړیوال جام کې د ایټاليا ملي لوبډلې د نړیوال جام د گټلو مدعیان ول، ځکه چې د کارنواله، ویالي او باجو په شان لوبغاړي یې درلودل. خو سالواتوره سکیلاچي، هغه لوبغاړی وو چې د ایټالویانو زړونه یې وگټل او هغه له اوو لوبو څخه په شپږو لوبو کې شپږ گولونه ووهل او د سیالیو غوره گول وهونکی شو.

د ۹۹۴م کال د فوټبال د نړیوال جام د سیالیو غوره گول وهونکي دوه تنه ول. په دغو کسانو کې یو د بلغاريا لوبغاړی هریستو ستویچکوف وو (په انځور کې ښی لاس ته) او بل د روسیې هیواد اولگ سالينکو وو. دغو دواړو کسانو شپږ شپږ گولونه وهلي ول.

په فرانسه کې د ۱۹۹۸ کال کې د فوټبال په نړیوالو سیالیو کې د کرواسيا لوبغاړي داور شوکر، د شپږو گولونو په وهلو سره د غوره گول وهونکي ځای خپل کړ. شوکر د کرواسيا له پاره په ۶۹ سیالیو کې د ۴۵ گولونو په وهولو سره د موفق گول وهونکي په توگه هم شمیرل کیږي.

د برازیل لوبغاړي رونالدو، د فوټبال د نړیوال جام په درو دورو کې حضور درلود او د برازیل لوبډلې په ۱۹۹۴م او ۲۰۰۲م کلونو کې نړیوال جام وگاټه. د ۲۰۰۲ کال په فوټبال نړیوال جام کې رونالدو، د ۸ گولونو په وهلو سره د دغو سیالیو غوره گول وهونکی شو.

د آلمان د فوټبال ملي لوبډلي په ۲۰۰۶ کال کې په دغه هیواد کې د فوټبال په نړیوال جام کې یوازي دریم مقام خپل کړ. په دغو سیالیو کې د آلمان لوبغاړي میروسلاو کلوزه شپږ گولونه وکړل او د غوره گول وهونکي لقب یې وگاټه. د یادولو وړ ده چې کلوزه تر اوسه د نړیوال جام په درو دورو کې حضور درلود او د ۲۰۱۴ کال په نړیوال جام کې چې په برازیل کې تر سره کیږي، هم حضور ولري.

د فوټبال د نړیوال جام سیالۍ چي په لومړي وار په افریقا کې تر سره شوې، آلمان پکښې یو وار بیا د دریم مقام په گټلو وتوانید. خو په دغو سیالیو کې یو لوبغاړی د فوټبال نړۍ ته وروپیژند چې تر هغه وخت پیژندل شوی نه وو: هغه توماس مولر وو. مولر په دغو سیالیو کې د پنځو گولونو په وهلو سره د دغو سیالیو غوره گول وهونکی شو.

د ۲۰۱۴م کال د فوټبال په نړیوال جام کې چې په برازیل کې تر سره کیږي، ډیر ستوري موجود دي، خو ښایي د دې دوو لوبغاړو تر منځ به سیالي سخته وي: د ارجنټاين ملي لوبغاړی لیونل میسي چي اوس د هسپانيا په بارسلونا کلب کې بازي کوي او بل د پرتگال د ملي لوبډلي لوبغاړی چې په ریال مادرید کې لوبیږي. دغو دواړو لوبغاړو په تیرو کلونو کې د نړۍ د ښه فوټبالر لقب د خپلولو له پاره هم یو له بل سره سیالي کړې ده.

د جمعې په ورځ د افغانستان او مالديو د فوټبال لوبډلو تر منځ لوبه مساوي ختمه شوه. دواړو لوبډلو د سویلي آسیا د فوټبالو اتلولۍ د سیالیو په لومړني پړوا کې دوې، دوې لوبې ګتلي دي او یوه، یوه يې مساوي کړي ده. دواړي لوبډلې اوه، اوه نمرې لري.

خو دا چې د مالديو هیواد لوبډلې په سیالیو کې تر ټولو زیات ګولونه وهلي ول، د «ب» ګروپ په سر کې يې ځای ونياوه. د مالديو او سریلانکا تر منځ سیالۍ کې مالديو لس ګولونه وهلي ول.

د افغانستان او مالديو تر منځ د سیالۍ پر وخت زیاتره وخت توپ د افغان لوبغاړو په کنترول کي وو، خو هغوی په کوم ګول وهلو و نه توانیدل. دواړو لوبډلو له خپلو ګولونو څخه ښه دفاع وکړه.

د افغانستان د فوټبال د ملي لوبډلې ویاند سید علي کاظمي د وینا له مخې لوبغاړو د لاس ته راغلو فرصتونو څخه سمه ګټه وا نه خیستله. د هغه په وینا که څه هم په لوبډله کې بدلونونه رامنځ ته شول، خو مالديو هم قوي دفاع کوله.

آرتش هاتفي چې د افغانستان د فوټبال د ملي لوبډلې د ښه لوبغاړي په توگه شمیرل کیږي، په دغه لوبه کې ګډون ونه کړ. ځکه چي هغه په تيرو لوبو کي دوه ژړ کارتونه اخيستي ول.

له مالديو سره د سیالۍ پر مهال معروف محمدي ته هم ژړ کارت ورکړل شو. په دې ترتیب هغه هم اوس دوه کارتونه لري او هغه نه شي کولای چې د افغانستان او کوربه هیواد نیپال تر منځ په تر سره کیدونکي نیمه پایلوبه کې ګډون وکړي.

په پام کې ده چې د یکشنبې په ورځ (۲۰۱۳ کال د سپتمبر ۸) افغانستان له کوربه هیواد نیپال سره نیمه پای لوبه تر سره کړي. د دوشنبې په ورځ به د هند او مالديو تر منځ لوبه وشي.

د یکشنبې او دوشنبې د ورځې تر سیالیو وروسته به معلومه شي، چې د سویلي آسیا د فوټبال اتلولي په سیالیو کې کومي لوبډلې پای لوبې ته وځي.

د افغانستان د فوټبال د ملي لوبډلې د ویاند د وینا له مخې هیله من دی، چې د افغان لوبډله له کوربه هیواد نیپال څخه لوبه وګټي. د هغه په وینا د افغان لوبډله به خپل ټول توان په کار واچوي چې د دغو اتلولۍ، اتله شي.

د سویلي آسیا د فوټبال اتلولۍ په تیرو سیالیو کې هم افغانستان پای لوبې ته لار موندلې وه او د هندوستان له لوبډلې سره مخامخ شوه، خو د افغانستان د ملي لوبډلې ګول کیپر د سور کارت په اخیستلو سره له لوبې ووت، او هند دغه لوبه څلور د صفر په مقابل کې وګټله او افغانستان دوهم ځای خپل کړ.