د افغانستان اقتصاد لس سلنه په ترياکو پوري تړلی
۱۳۹۲ اردیبهشت ۱۷, سهشنبه
دغه رپوټ د دوشنبې په ورځ (۲۰۱۳ کال د می ۶) په وين کي د ملگرو ملتو له مخدره موادو او جرمونو سره د مبارزې څانگي خپور کړی دئ.
په رپوټ کي راغلي دي چي د افغانستان د نشه يي موادو د راکړي ورکړي کارو بار ۱،۹ ميليارده ډالرو ته رسيږي. د ملگرو ملتونو په حواله د نړۍ ۹۰ سلنه مخدره مواد په افغانستان کي توليديږي.
رپوټ زیاتوي په افغانستان کي د مخدره موادو توليد د ۲۰۱۱ کال په پرتله پنځه سلنه لږ سوی دئ. دا په دې معنی نه چي د دغو موادو پرضد مبارزې رول لوبولی دئ، بلکي علت ئې خرابه هوا او د کوکنارو مرض وهل ول.
د روان کال د اپريل په مياشت کي ملگرو ملتونو په افغانستان کي د راتلونکي کال له پاره د مخدره موادو د کښت او توليد د يوې سونامي څخه خبر ورکړی وو.
د دغه سازمان د معلوماتو له مخي د کوکنارو د کښت ساحه د تير کال په پرتله ۱۸ سلنه ډېره سوې ده، چي په دې سره پر ۱۵۴۰۰۰ هيکټاره مځکه باندي کوکنار کرل کيږي.
په افغانستان کي د مخدره موادو د توليد په اړه د ملگرو ملتونو په تازه رپوټ کي راغلي دي، چي د مرستندويه ټولونو له خوا د مخدره موادو د مخنيوي هڅي چندان بريالۍ نه دي.
کارپوهان د ۲۰۱۴کال په پای کي له افغانستان څخه د بهرنيو ځواکونو تر وتلو وروسته د امنيتي حالت د خرابېدو اندېښنه لري.
د کارپوهاند په اند له افغانستان څخه د بهرنيو ځواکونو تر وتلو وروسته به له دغه هيواد څخه د مخدره موادو قاچاق نور هم ډېر سي.
د دوی په اند په افغانستان کي که پنځه کاله هم کوکنار و نه کرل سي، بيا هم په دغه هيواد کي د مخدره موادو زېرمي څو کاله د نړۍ د مخدره موادو بازارونه وچلوي.
څه موده مخکي د روسيې د مخدره موادو ضد ادارې چارواکو ويلي ول، چي په افغانستان کي له ۱۵ څخه تر ۲۰ زرو ټنو پوري تارياک زېرمه سوي دي.
روسيه يو له هغو هيوادونو څخه دئ، چي پکښې د هيروينو د استعمال کچه ډېره لوړه ده او وايي چي د مخدره موادو ډيره اندازه ئې له افغانستان څخه ورقاچاقيږي.