د افغانستان د فوتبال ملي ټیم چې په نړیوالو درجه بندیو کې ۱۵۱ ځای لري. دغه لوبډله په یوې بلې بریا سره کولی شي د ۲۰۲۷ کال د فوټبال اسیايي جام ته لاره پیدا کړي.
د افغانستان د فوټبال د ملي لوبډلې بریتانوي روزونکي اشلي ویستوود اوه میاشتې مخکې د افغانستان د ملي ټیم رهبري پرغاړه واخیسته او له هغه وخت راهیسي لوبډلې د نوموړي روزونکي په دوره کې تر اوسه پورې ډیر پرمختگونه درلودل.
افغان لوبغاړي د سه شنبې په ورځ د مقدماتي لوبو په وروستي پړاو کې د کویټ پر وړاندې د لوبې ډګر ته کوزیږي او په دې پوهیږي چې د هندوستان د لوبډلې په پرتله د قطر پر وړاندې باید ښه امتیاز په لاس راوړي تر څو راتلونکي پړاو ته لار پیدا کړي.
د افغانستان د فوټبال ملي لوبډله، تر دې وړاندې د آسیا د اتلې لوبډلې، قطر پر وړاندي هغه لوبه کې چې په سعودي عربستان کې سوې وه، د صفر په وړاندې صفر نتیجې ته ورسید.
د ملي لوبډلې روزونکي ویستوود تر لوبې وروسته وویل چې د نومبر په میاشت کې کله چې یې دغه دنده پر غاړه واخیسته، لږ وروسته یې په لومړۍ لوبه کې د قطر پر وړاندې لوبه یو پر اته ګولونو بایلوده او په هغه وخت کې لا دغې حیرانوونکې نتیجې ته رسیدل له امکانه لیرې بریښیده.
ویستوود زیاته کړه: «لوبغاړي هیجاني دي او موږ په دې باور یو چې افغانستان له پاره آسیایی او د نړیوال جام د مقدماتي لوبو دریم او وروستي پړاو ته د تګ له پاره واقعاً یو تاریخي چانس لرو.»
هندوستانۍ لوبډله هم هڅه کوي چې د لومړي ځل له پاره د نړیوال جام د مقدماتي لوبو دریم پړاو ته لار پیدا کړي.
د هند لوبډله چې گري ایگور شتیماتس یې رزونه کوي، په اوس وخت کې د افغانستان له ټیم څخه د گولونو په تفاوت د A گروپ کې تر قطر وروسته په دوهم ځای کی دی.
په داسې حال کې چې د کویټ تیم هم د پرمختگ په حال کې دی، نو د A په گروپ کې د شته لوبډلو ترمنځ د لوبو د پایلو وړاندوینه لاپسې سختیږي.
جاپان: د فوټبال لوبغاړي چې په ۸۰ کلنۍ کې هم لوبې کوي
ځیني کسان په ۳۰ کلنۍ کې د فوټبال لوبه پریږدي، خو په جاپان کې بیا زاړه خلک د فوټبال لوبې ته دوام ورکوي. یو شمیر کسان چې عمر یې تر ۸۰ کلنو اوښتی خپله توانمندي په اثبات رسوي.
انځور: KIM KYUNG-HOON/REUTERS۸۳ کلن ماتسوهیکو نومورا د تېرو ۷۰ کلنو راهیسې فوټبال کوي. په دې موده کې د فوټبال نړیوال جام تر ۱۸ زیاتې سیالۍ ترسره شوې دي. نن ورځ د جاپان د ملي لوبډلې پخوانی لوبغاړی د ۸۰ کلونو څخه د زیات عمر لرونکو لوبغاړو د نوي جوړ شوي لیګ غړی دی. دا لیګ چې د ژوند له پاره فوټبال «Soccer For Life» په نوم پیژندل کیږي، خپله لومړۍ لوبه د ۲۰۲۳ کال په اپریل کې ترسره کړه.
موتوسوهیکو نومورا فرانسې ته د خپل او د هغه د ۸۰ کلنې میرمنې جونکو د سفر زاړه عکسونه ښیي. هغوی په ۱۹۹۸ کې د فوټبال نړیوال جام د نندارې له پاره دغه هېواد ته سفر کړی وو. نومورا په ښوونځي کې یو نامتو لوبغاړی ګڼل کیده او وروسته بیا د جاپان د ملي ټیم غړی شو. هغه وایي: «زه چې کله ماشوم وم، د ۵۰ او ۶۰ کلونو نارینه راته د نیکونو په څیر ښکاره کیدل.»
شینګو شیوزاوا د «ژوند له پاره فوټبال» لیګ کې د ټیم ګول کیپر دی او د ۹۳ کلنۍ په عمر په میاشت کې څو ځلې تمرین کوي. ډېر فعالیت هڅولی وو، چې سګرټ څکول پریږدي او دې کار له هغې سره د ملا د شمزۍ د ستونزې په برخه کې ورسره مرسته کړي. شیوزاوا وایي: «که ما د فوټبال لوبه نه وی کړی، زه به تر اوسه مړ شوی وم.»
د ذهن ځوان ساتلو له پاره د ریاضي تمرینونه
د دې له پاره چې نه یوازې بدن بلکې ذهن یې هم ځوان پاتې شي، شینګو شیزاوا په خپل دفتر کې د هیروګلیف حروفو په مرسته د ریاضي تمرینونه کوي. په جاپان کې د اوسط ژوند اټکل په دوامداره توګه مخ پر زیاتیدو دی او د ۶۵ کلونو څخه پورته خلک د هیواد د ۱۲۶ میلیونه نفوس نږدې دریمه برخه جوړوي.
د توکیو په «Nihon Soccer OB Club» ورزشي کلب کې لنډ تمرینونه دوام لري. د ټیم د غړو اوسط عمر ۷۷ کاله دی. داسې ورزش چې ډیر تحرک پکې وي لکه فوټبال، یو وخت په دې هېواد کې د زړو خلکو له پاره منع ګڼل کیده. خو دا نظر نه یوازې د سپورت په ډګر کې بلکې په نورو برخو کې هم د بدلون په حال کې دی. نږدې یو پر پنځمه برخه د ۷۰ کلونو څخه پورته عمر لرونکي زاړه کسان کار ته ځي، څو دوی پر تقاعد سربیره عاید ولري.
فوټبال دومره ساده هم نه دی
د «سور ستوري» ټیم څخه ۸۶ کلن تاکاو یوکویامای په (له کیڼ لورې دویم کس) په توکیو کې د «ژوند له پاره فوټبال» د ۸۰ کلنو د فوټبال لیګ په جریان کې د مقابل ټیم له لوبغاړي څخه توپ اخلي. دا چې په زیات عمر کې فوټبال دومره آسانه نه دی، د «ژوند له پاره فوټبال» لیګ په لومړۍ لوبه کې معلومه شوه. لوبغاړو په سوزنده لمر کې په توپ پسې منډې وهلې چې ساه یې لنډه لنډه کیده.
موتسوهیکو نومورا (کیڼ اړخ ته) او د هغه ۴۸ کلنه لور یوریکو نومورا و د هغه ۱۳ کلن لمسۍ مونی نومورا د ټوکیو په یوه پارک کې د فوټبال تمرین کوي. د اونۍ په پای کې، ماتسوهیکو دوی ته د فوټبال مهارتونه ور زده کوي. یوریکو وايي: «کله ناکله زه د زړو خلکو د فوټبال لوبې وینم او دا احساس کوي چې زه باید سخت کار وکړم.»
د ماښام ډودۍ پر وخت هم سپورت د موتسوهیکو نومورا او د هغه د میرمن جونکو له پاره د پام وړ دی. جونکو هم د خپل میړه د فوټبال لوبې په شوق سره ګوري. هغه د خپل میړه له ټپي کېدو نه وېرېږي، خو د هغې د وينې فشار له نږدې څاري او وايي: «هغه (میړه مې) په لیوالتیا سره غوښه خوري. زه هڅه کوم چې هغه قانع کړم، چې سبزیجات وخوري. زه فکر کوم، چې فوټبال د هغې د روغتیا له پاره غوره درمل دي.»
GP/KH/AG
