د افغانستان شمال ختيځ کې ۱۳ حکومت پلوي ځواکونه وژل شوي
۱۳۹۹ اردیبهشت ۵, جمعه![Afghanistan | Militäroperation in Marja](https://static.dw.com/image/51820560_800.webp)
دوو افغان چارواکو د آلمان خبري اژانس ته ويلي دي چې د بادغيس ولايت په مرکز کې لږ تر لږه اووه تنه نور جنګيالي تښتول شوي هم دي. په خبره يې بريد کوونکو د هغوی وسلې او مرمۍ هم له ځان سره وړې دي.
بادغيس د افغانستان يو له هغو ناکرارو ولايتونو څخه دی چې طالبان پکې ډېر حضور لري. د ځايي چارواکو په حواله د دغه ولايت دوه ولسوالۍ په بشپړه توګه د طالب جنګياليو له خوا کلابندې دي. د ولايت په شمال ختيځ بالا مرغاب ولسوالۍ کې دوه سوه افغان جنګيالي په دوامداره توګه د طالبانو له بریدونو سره مخامخ دي. دغه خبره د ولايتي شورا غړي، بها الدين قادسي کوي. د هغه په خبره حکومت ورته د هوا د لارې اکمالات کوي.
په روانه اوونۍ کې د طالبانو بريدونو او بمونو ټول ټال څه باندې سل تنه وژلي دي. طالبانو د فبرورۍ مياشتې په پای کې له متحده آيالاتو سره يو تړون لاسليک کړی دی چې د زندانيانو تبادلې ته يې لاره هواره کړې ده. دغه لړۍ پيل شوې هم ده چې کېدای شي بين الافغاني خبرو اترو ته هم زمينه مساعده کړي. د دغه تړون له مخې به ټول نړيوال ځواکونه د طالبانو له خوا د امنيتي ضمانتونو په بدل کې د ۱۴ مياشتو په ترڅ کې له افغانستان څخه وځي.
د پنجشنبې په ورځ افغان ولسمشر اشرف غني له طالبانو وغوښتل چې د مسلمانانو سپېڅلې مياشت رمضان ته د احترام له پار اوربند ومني چې طالبانو دغه خبره سمدلاسه رد کړه.