د افغانستان وضعې يونان ته د مهاجرت بحران اندیښنې راولاړې کړي
۱۴۰۰ مرداد ۲۹, جمعه![Griechenland Lesbos | Umzug in neues Migranten-Lager](https://static.dw.com/image/54957852_800.webp)
رويټرز خبري آژانس وايي چې د یونان صدراعظم، کریاکوس میتسوتاکيس، به د افغانستان د وضعيت په اړه د ترکيې له ولسمشر رجب طیب اردوغان سره د جمعې په ورځ (د اګست ۲۰مه) خبرې وکړي. رويټرز د ميتسوتاکيس د دفتر په حواله ويلي دي چې یونان انديښنه لري، یو ځل بيا به د ۲۰۱۵م کال په څير د مهاجرو څپې وروسیږي.
یونان د اروپا د ۲۰۱۵م کال د مهاجرت بحران پر وخت اروپا ته د تلونکو مهاجرو پر لار د دروازې حيثيت درلود. په دغه کال کي نژدې يو ميلیون کسان په سوريه، عراق او افغانستان کې د جګړو له کبله د دغه هیواد جزیرو ته مهاجر شول چې اکثریت یې د ترکيې څخه روان شوي ول.
یونان هم د اروپايي اتحاديې د نورو غړو په څير انديښمن دی چې واک ته د طالبانو بیرته راګرځيدل به د دغه بحران د تکرار یو سبب واقع سي.
د یونان حکومت په وروستیو ورځو کې ويلي دي چې دوی نه غواړي ، دغه هیواد په افغانستان کې د جګړو له امله، اروپا ته د تلونکو افغان مهاجرو د داخلیدو دروازه وګرځي او زیاته کړې یې ده چې د یونان سرحدي ځواکونه تیار دي، ددې کار مخنیوی وکړي.
د یونان د صدراعظم دفتر ويلي دي چې ميتسوتاکيس او اردوغان به نن د ګرينويچ پر وخت د مازيګر په ۴نيمو بجو پر ټيلفون خبرې وکړي.
له دې نه علاوه د یونان د دفاع او د ملکي حفاظت وزیران غواړي نن جمعه، د دغه هیواد په شمال، ايوروس سیمه کې ترکيې سره پر سرحد د جوړ شوي دیوال لیدنه وکړي. ترکيې دغه دیوال د غیرقانوني مهاجرتونو دمخنيوي په موخه جوړ کړی دی.
آ/م.ک.ص./م.ق.ن.