افغان ځايي چارواکو تائيد کړې ده چي د کندز ولايت په ځينو ولسوالیو کي د داعش حضور اندېښمن کړي دي. تر دې دمخه ويل کېده چي داعش یوازي د افغانستان د ختيځ په يوه کوچنۍ سيمه کي حضور لري.
انځور: picture-alliance/AP Photo
اعلان
انترفکس خبري آژانس لیکي چي د کندز امنيه قوماندان جنرال محمد قسيم جنگل باغ، له ځايي رسنيو سره په خبرو کي ويلي دي چي د افراطي ډلي «اسلامي دولت» (داعش) غړي له درو اونيو راهيسي د دغه ولايت په چهار درې ولسوالۍ کي فعاليت کوي.
هغه ويلي دي، وروستي راپورونه ښيي چي داعش په دغه سيمه کي د ځوانو جنگياليو په جلب بوخت دي. هغه زياته کړې ده چي پر دې سربيره داعش په چهار دره ولسوالۍ کي د طالبانو ترمنځ تبليغ کوي.
د راپورونو له مخي په چهار درې ولسوالي کي اوس د داعش له ۱۰۰ تر ۱۲۰ پوري جنگيالي فعاليت کوي. ځايي اوسېدونکو هم ويلي دي چي د شپې له خوا په کوڅو کي داسي کسان ويني چي تور بيرغونه ورسره وي.
د کندز د دولتي مامورينو په خبره په چهار درې ولسوالي کي د مرکزي اسيا جنگياليو يوه ډله چي «جندالله» نومیږي هم د داعش تور بيرغونه پورته کړي دي.
تر اوسه پوري ويل کېده چي افراطي ډله «اسلامي دولت» یوازي د افغانستان په ختيځ یوه کوچنۍ سیمه کي حضور لري.
تيره اوونۍ یوه امريکايي جنرال ويلي ول چي داعش نه دی توانېدلی چي په افغانستان کي د پام وړ پرمختگ وکړي، او داچي غړي ئې يوازي په يوه کوچنۍ سیمه کي راټولېدو ته اړ سوي دي.
په افغانستان کي د میشتو امریکایي ځواکونو ویاند جنرال ویلسن شوفنر، ويلي ول چي د داعش ډله د افغانستان له ۴۰۴ ولسوالیو څخه په یوه کي راټولیدو ته اړ سوي دي.
خو پر دې ټولو سربيره شوفنر، ويلي چي داعش اوس هم په افغانستان کي يو ستراتيژيک گواښ دئ.
داعش څرنگه په افغانستان کي له کوچنيانو کار اخلي؟
په افغانستان کي د تروريستي ډلي «اسلامي دولت» (داعش) وروستي انځورنه ښيي چي دوی څرنگه له کوچنيانو څخه کار اخلي. په افغانستان کي د وسله والو طالبانو او داعش ترمنځ سيالۍ زور اخيستی.
انځور: picture-alliance/dpa/G. Habibi
په افغانستان کي د تروريستي ډلي «اسلامي دولت» (داعش) وروستي انځورنه ښيي چي دوی څرنگه له کوچنيانو څخه د تروريستي هدفونو او تبليغاتو له پاره کار اخلي.
انځور: picture-alliance/dpa/G. Habibi
دغه انځورونه د اگست مياشتي پر اوله نېټه په کونړ ولايت کي اخيستل سوي دي. کونړ له پاکستان سره اوږده پوله لري او ويل کيږي چي هلته ډېر پاکستاني طالبان پټيږي.
تروريستي سازماان «اسلامي دولت» تر دې دمخه د يوې جغرافيايي نقشې په خپرولو سره حتی د افريکا او اروپا ځيني برخي په خپل «خلافت» کي شاملي گڼلي دي.
له کوچنيانو څخه د تروريستي هدفونو له پاره کار اخيستل د داعش پخوانی کار دئ. کوم انځورونه چي د دغي تروريستي ډلي له خوا له عراقه خپاره سوي، ښيي چي دوی څرنگه کوچنيان پر تروريستي بريدونو کي کاروي.
انځور: picture-alliance/dpa/G. Habibi
څه موده مخکي وسله والو طالبانو په افغانستان کي داعش ته گواښ وکړ، چي د افغانستان په «جهاد» کي مداخله نه کوي. په افغانستان کي ځيني طالبان له داعش سره يو ځای سوي دي.
انځور: picture-alliance/dpa/G. Habibi
پر کوچنيانو باندي هر ډول خبره ډېر ژر اغېزه کوي او په دې سره په اسانۍ سره سړی کولای سي هغوی «جهاد» ته تيار کړي. ځکه نو تروريستي ډلو لکه داعش د کوچنيانو روزلو ته مخکه کړې ده.
انځور: picture-alliance/dpa/G. Habibi
څه موده دمخه د افغانستان د ملي امنيت ادارې خبر ورکړ چي په دغه هيواد کي ئې د حافظ سعيد په نوم د داعش يو قوماندان له خپلو ۳۰ انډيوالانو سره په يوه هوايي يرغل کي وژل سوی دئ.
انځور: picture-alliance/dpa/G. Habibi
په دې وروستيو کي د وسله والو طالبانو څو قوماندانان له تروريستي ډلي اسلامي دولت سره يو ځای سول او د افغانستان په ختيځ کي دغه ډله نوره هم پياوړې سوه.