پهافغانستان کې د طالبانو ادارې د روغتیا وزارت خبر ورکړی دی چې نن دوشنبه د ۱۴۰۳ لمریز کال د (چنګاښ میاشتې) پر ۱۸ نېټه د افغانستان په ۲۳ ولایتونو کې د پولیو کمپاین پیل شوی دی.

د روغتیا وزارت ویاند ډاکټر شرافت زمان امر دویچه ویله ته په استولي کلیپ کې ویلي دي، چې په دغه څلور ورځیني کمپاین کې به نیږدې اته میلیونه هغو مشاشومانو ته چې پنځه کلنۍ ته نه دي رسېدلي، د پولیو واکسین څاڅکي ورکړل شي.

په دې اړه: افغانستان کې د ګوزڼ ضد واکسین کمپاین پیل شو

د عامې روغتیا وزارت د معلوماتو له مخې، دغه کمپاین په لغمان، نورستان، کونړ، ننګرهار، کابل، کاپیسا، پروان، بامیان، دایکندي، بغلان، کندوز، تخار، هلمند، کندهار، نیمروز، روزګان، زابل، غزني، خوست، پکتیا، پکتیکا، فراه او هرات ولایتونو کې پیل شوی دی.

د دغې وزارت ویاند ډاکټر شرافت زمان امر زیاته کړه، چې روان لمریز کال پهافغانستان کې د پولیو کومه مثبته پېښه نه ده ثبت شوې، خو په خبره يې، په ځینو سیمو کې مثبتي بېلګې ثبت شوي او د ناروغۍ د مخنیوي له پاره یې وزارت لاس پکار شوی دی.

تر دې مخکي د روغتیا نړیوال سازمان په یوه رپوټ کې ویلي ول، چې د ۲۰۲۴ کال له پیله بیا د جون میاشتې تر ۳۰ نېټې پورې په ټول افغانستان کې د پولیو شپږ مثبتې پېښې ثبت شوي دي.

اړوند مطلب: پاکستان: د واکسیناتورانو د ټیم شپږ ساتونکي وژل شوي

دغه سازمان په یوه رپوټ کې دا هم زیاته کړې ده، چې له پاکستانه د افغان کډوالو ستنېدل هم د پولیو پر وړاندې مبارزه له ستونزو سره مخ کوي. د ماشومانو فلج یا پولیو هغه خپرېدونکې یا ساري ناروغي ده، چې تر پنځه کلنۍ کښته ماشومانو کې پیداکېږي او د دایمي فلج کېدو لامل ګرځي. افغانستان يو له څو هغو محدودو هيوادونو څخه دی، چې لا هم د پولیو له ویروس څخه په بشپړ ډول پاک شوی نه دی.

د رپوټونو له مخې، کلتوري او ټولنیزې ستونزې، افراطیت او د ځینو وسله والو ډلو شتون په افغانستان او ګاونډيپاکستان کې د پولیو واکسین د تطبیق پر وړاندې خنډونه دي، چې له امله یې ځيني کورنۍ خپلو ماشومانو ته دغه واکسین نه تزریقوي.