دا هوايي بريد د سه شنبې په ورځ د خان آباد ولسوالۍ په سيد رمضان کلي کې شوی دی. دا ولسوالي د طالبانو په ولکه کې ده. دوه تنو عيني شاهدانو د اسوشيتد پريس خبري آژانس ته ويلي چې په دې بريد ۲۴ ملکي وگړي وژل شوي او شپږ تنه ټپيان شوي دي.
خو د افغانستان د دفاع وزارت ويلي چې په دې هوايي حمله کې ۳۰ طالب جنگيالي وژل شوي دي. د وزارت له خوا زياته شوې چې د ملکي تلفاتو د ادعاو په اړه به څيړنې وکړي.
دا هوايي بريد په داسې حال کې کيږي چې د افغان حکومت او طالبانو استازي د جگړې د ختمولو په موخه د قطر په پلازمينه دوحه کې سره راټول شوي دي.
د خان آباد ولسوالۍ د دغه کلي اوسيدونکو ويلي چې د هوايي بريد هدف په لومړي سر کې د طالبانو د يوه جنگيالي کور وو چې طالبانو ترې په حکومت پورې د تړلو کسانو د موندلو له پاره د کنترول د يوې پوستې په توگه استفاده کوله. د دې پېښې يوه عيني شاهد لطيف رحماني وويل چې پر دغه کور د هوايي بريدونو له کبله شا او خوا کورونو هم اور واخیست او خلک په خپلو کورونو کې بند پاته شول.
رحماني د تليفون له لارې د اسوشتيد پريس خبري آژانس ته وويل کله چې د کلي خلک او بزگران د پېښې ځای ته ورغلل څو اور خاموش کړي او هلته بند پاتې کسان وژغوري، دويم برید وشو چې په نتیجه کې یې زيات کسان ووژل شول.
اړونده موضوع:ولې د سولې پر تړون سربیره هم ملکي تلفات رامنځ ته کيږي؟
نوموړي زياته کړه چې دی د بريد پر وخت په کور کې په کار بوخت وو او خپلو گاونډيانو ته یې د پېښې ځای ته له تلو څخه خبرداری ورکړی وو. هغه وويل: «ما خلکو ته زاري وکړه او ورته مې وويل چې مه ورځئ ځکه امکان لري بل بريد وشي خو هغوی د پېښې ځای ته ورغلل څو مرسته وکړي او اور کنترول کړي.»
د کلام الدين په نوم يوه بل عيني شاهد وويل چې د طالبانو هغه غړي چې په دې کور کې اوسيدل په لومړي بريد کې ووژل شول.
د وسله والو طالبانو وياند ذبيح الله مجاهد دا بريد غندلی دی او ويلي یې دي چې د بريد پر وخت یې په سيمه کې هیڅ ډول نظامي عمليات نه درلودل.
ملگرو ملتونو د افغانستان د جگړې پر دواړو لورو د ملکي تلفاتو له وجې سخت انتقادونه کړي دي. دې سازمان په څو ځلی په جگړه کې له ښکيلو خواو غوښتنه کړې چې د ملکي وگړو د ساتنې کوښښ وکړي.
زموږ له آرشيف څخه:
په افغانستان کې تر ټولو وژونکي بریدونه
د طالبانو په يوه برید کې د سه شنبې په ورځ په پکتیا ولایت کې تر۳۰ زیات کسان ووژل شول او تر۲۰۰ تنو زیات نور پکښې ټپیان شول. کومو وسله والو بریدونو په افغانستان کې ډیر تلفات رامنځ ته کړي؟
انځور: Reuters/O. Sobhaniد ۲۰۰۷ کال د نومبر ۶مه نیټه
یوه ځانمرګي برید په بغلان ولایت کې د ۵۹ ماشومانو او د پارلمان د شپږو غړو په ګډون ۷۹ کسان ووژل.
د ۲۰۰۸م کال د فبروري میاشتې ۱۷مه نیټه
په کندهار کې د سپو جنګولو په موخه د راټولو شویو کسانو په منځ کې ځانمرګي برید د ۵۰ امنیتي ځواکونو په ګډون ۱۴۰ تنه ووژل.
د ۲۰۰۸م کال د جولای میاشتي ۷مه نیټه
په کابل کې د هندوستان پر سفارت برید ۶۰ کسان ووژل.
د ۲۰۰۹ کال د اګست ۲۵مه نیټه
په کندهار کې یوه موټر بم ۴۳ ملکيان ووژل.
د ۲۰۱۰ کال د جون میاشتې ۹مه نیټه
یوه ځانمرګي برید کوونکي د واده په یوه محفل کې چاودنه وکړه او ۵۰ تنه یې ووژل.
د ۲۰۱۱م کال د دسمبر میاشتې ۶مه نیټه
په کابل کې د عاشورا مراسمو پر مهال یوه برید ۸۰ کسان ووژل.
د ۲۰۱۲ کال د اکتوبر میاشتې ۲۶مه نیټه
په شمالي ولایت فاریاب کې په یوه مسجد کې چاودنه وشوه چې له کبله یې ۴۲ تنه ووژل شول.
د ۲۰۱۳م کال د اپریل میاشتې ۳مه نیټه
طالبانو په فراه ولایت کې د محکمې مخې ته برید وکړ او د ۱۰ امنیتي ځواکونو په ګډون یې ۴۶ کسان ووژل. طالبانو غوښتل خپل هغه غړي آزاد کړي چې محاکمې یې جریان لره.
د ۲۰۱۴ کال د نومبر میاشتې ۲۳مه نیټه
طالبانو په پکتیکا ولایت کې د هغو کسانو په منځ کې چې د والیبال د یوې لوبې لیدو ته راټول شوي ول، چاودنه وکړه او ۵۷ کسان یې ووژل.
د ۲۰۱۵ کال د نومبر میاشتې ۹مه او ۱۰مه نیټې
طالبانو د کندهار پر هوایي ډګر برید وکړ او لږ تر لږه ۵۰ کسان یې ووژل.
د ۲۰۱۶م کال د اکتوبر۲۶مه نیټه
په داعش ترهګرې ډلې پورې تړلو کسان له غور ولایت څخه ۳۰ تنه برمته کړل او بیا یې ووژل. په وژلو شویو کسانو کې ماشومان هم شامل ول.
د ۲۰۱۶ کال د اپریل میاشتې ۱۹مه نیټه
په کابل له چاودیدونکو موادو ډکه یوې لارۍ موټر چاودنه رامنځ ته کړه چې بیا یې په تعقیب د سپکو وسلو جګړه پیل شوه. په پیښه کې ۶۴ کسان ووژل شول او ۳۴۰ تنه نور ټپیان شول.
د ۲۰۱۶م کال د نویمبر میاشتې ۲۱مه نیټه
داعش په کابل کې د شعیه مسلمانانو پر یوه مسجد د برید پړه پر غاړه واخیسته چې په پایله کې یې ۲۷ تنه ووژل شول او ۶۴ تنه نور ټپیان شول.
د ۲۰۱۷ کال د جنوري میاشتې ۱۰مه نیټه
په کابل کې پارلمان ودانۍ ته نزدې غبرګونۍ چاودنې وشوې چې پکښې ۳۸ تنه ووژل شول او ۸۶ تنه نور ټپیان شول.
د ۲۰۱۷ کال د مارچ میاشتې ۸مه نیټه
د ډاکترانو په جامو کې برید کوونکي د کابل پوځي روغتون ته ننوتل او تر ۵۰ زیات کسان یې ووژل. په دې برید کې تر ۱۰۰ ډیرو کسانو د وژل کیدو خبره هم کیږي. د برید پړه ترهگري ډلي داعش پر غاړه واخیسته.
د ۲۰۱۷م کال د اپریل ۲۱مه نیټه
طالبانو په مزارشریف ښار کې پر یوې پوځې اډې برید وکړ او ۱۴۴ تنه یې ووژل.
د ۲۰۱۷م کال د مې میاشتې ۳۱مه نیټه
په کابل کې د آلمان سفارت ته نزدې چاودني تر۱۵۰ ډیر کسان ووژل او په سونو تنه نور یې ټپیان کړل.
د ۲۰۱۷ کال د اګست میاشتې لومړۍ نیټه
په هرات ولایت کې په یوه مسجد کې چاودنې لږ تر لږه ۳۳ کسان ووژل. د برید پړه داعش ترهګري ډلې پرغاړه واخیسته.
د ۲۰۱۷ کال د اګست میاشتې ۲۵مه نیټه
په کابل کې د شعیه مسلمانانو په مسجد کې چاودنه وشوه چې له کبله یې ۲۸ کسانو خپل ژوند له لاسه ورکړ او ۵۰ تنه نور ټپیان شول. د اسلامي دولت ترهګرې ډلې د برید پړه پر غاړه واخیسته.
