د آخ او ډب په ترڅ کې څلور تنه په مرمیو لګیدلي دي چې ټول اریتریایي مهاجر دي او عمرونه یې د ۱۶ او ۱۸ کلونو تر منځ دي. دا خبره لا روښانه نه ده چې ډزې چا پیل کړي دي چې په پایله کې یې دغه څلور مهاجر ټپیان شول.
آخ او ډب د افغان او اریتریایي مهاجرو تر منځ شوی دی. چارواکو ویلي دي چې پولیسو مداخله وکړه څو «افغان مهاجر وساتي چې له ۱۵۰ څخه تر ۲۰۰ اریتریایي مهاجرو سره مخامخ وو.»
په سیمه کي د بشري مرستندویه ډلو کار کوونکي پر دې آند دي چې د «ځنګل» کمپ پر نړیدو سربیره هم په دغه ځای کې شا او خوا ۸۰۰ مهاجر پاتې دي. مهاجر په دې هیله په دغه سیمه کې پاتې دي چې له دغه بندري ښار څخه په تیریدونکو لاریو کې ځان بریتانیې ته ورسوي.
دوهم آخ او ډب
د کاله د څارنوالۍ دفتر ویلي دي چې دغه ځای ته څیرمه په صنعتي سیمه کې د دوهمې نښتې په ترڅ کې ۱۲ تنه ټپیان شوي دي چې د اوسپنو پر ډنډو وهل شوي دي. زیاته شوې ده چې یو بل کس د ترافیکي پیښې له کبله ټپي شوی دی.
دغو خپلمني نښتو د فرانسوي چارواکو پام ځان ته رااړولی دی او د دغه هیواد د کورنیو چارو وزیر ژیرار کولمب، اعلان کړی دی چې د وضعیت د معلومولو له پاره د پيښې ځای ته ورځي.
تیره میاشت د فرانسې ولسمشر ایمانویل مکرون، د یوې وینا په ترڅ کې له بریتانیې سره د سرحدي امنیت په هکله د یوه نوي تړون اعلان وکړ. هغه ویلي وو چې «په هیڅ صورت کې به موږ دلته د یوه بل [ځنګل] کمپ اجازه ور نه کړو.»
اوس به څه کیږي؟
مکرون هوډ څرګند کړی دی چې په کاله او یا د فرانسې په یوه بله برخه کې کې به د یوه بل «ځنګل» کمپ د جوړیدو اجازه ور نه کړي. له بریتانیې سره د نوې امنیتي سرحدي تړون له مخې به لندن فرانسې ته په کاله کې د امنیتي چارو د زیاتولو لګښتونه ورکړي.
انځور: picture-alliance/AP Photo/T. Camus
r.s/A.A (AFP, Reuters, dpa)
زموږ له آرشیف څخه یو انځوریز البوم:
د کاله په کمپ کي د مهاجرو حالت
د کاله په نامه مهاجرو کمپ کي عصبانیت وار په وار زیاتیږی. د فرانسې حکومت غواړي د نوموړي کمپ او یورو تونل ترمنځ چي بريتانيا ته ځي، یوه حایله سیمه جوړه کړي، خو کډوال د دغه کار په مقابل کي خپل مقاومت ښيي.
انځور: DW/D. Cupolo
تر جبري انتقالولو مخکي
داوطلبه کسان له مهاجرو سره د سرپناهوو په انتقال کي مرسته کوي. مخکي تر دې چارواکو له مهاجرو غوښتي ول چي د حایلي سیمي د رامنځته کولو له پاره ځای خالي کړي. دغه سیمه به د يورو تونل له خوا هغه لار بنده کړي چی ډېر مهاجر غواړي له هغه ځايه ځانونه بريتانيا ته ورسوي. یو داوطلب کس وايي چي موږ د کډوالو ملاتړ کوو، څو حیثیت یې وساتل سي.
انځور: DW/D. Cupolo
د اوبو لار او نور امکانات
د يورو تونل ته نژدې ولاړي خیمې. له دغه ځايه په وارو وار مهاجر هڅه کوي نقلیه وسایلو ته ځانونه واچوي او بریتانيا ته ورسیږي. پولیس په هر صورت هڅه کوي چي د هغو مخه ونیسی. یو ځوان سوریايي وايي چي اول پلان مي دا دی چی د یوې لارۍ په واسطه ځان بريتانيا ته ورسوم. دوهم پلان د ریل له لاري او دریم پلان مي د بیړۍ په واسطه د اوبو له لاري دی.
انځور: DW/D. Cupolo
په عاجل ډول د ځان ژغورنه
د تیري پنجشنبې په ورځ د حایل زون جوړولو کار پیل سو. دا چي څه وخت به د مهاجرو پاته سرپناوي په بشپړه ډول انتقالیږي، تر اوس لا معلومه نه ده. خو مهاجر باید په هر صورت له دې ځايه ولاړ سي. هغوی د داوطلبه کسانو په مرستو تر سلو زیاتي سرپناوي انتقال کړي دي. نورې ۴۰ غیر رسمي سرپناوي هم وراضافه سوي دي.
انځور: DW/D. Cupolo
د نورو خیمو له پاره نوی ځای
له کاله کمپ څخه د ملاتړي سازمان غړي هڅه کوي چی د خیمو د درولو له پاره نوې ساحه د وچو وښو او کثافاتو څخه پاکه کړي. د روټ بوگیوت په نامه یوه داوطلبه وايي، کله چي ما په افغانستان کی ژوند کاوه نو د هغو ډیره مېلمه پالنه می ولیدله، اوس غواړم چي د هغې یو څه عوض ورکړم.
انځور: DW/D. Cupolo
د نامعلومي ورځي په تمه
د ۱۵۰۰ او ۴۵۰۰ تنو ترمنځ مهاجر د انتقال له خطر سره مخامخ دي. ځیني بیا يوازي انتظار باسي. د سیف الله برات په نامه یو افغان وايي چي زه به خپله سرپناه بل ځای ته انتقال نه کړم. هغه چي له څلورو میاشتو راهیسي د کاله په کمپ کي اوسیږي، زیاتوي، که پولیس ما دې کار ته مجبور کړي زه به یې مخنیوی ونه کړم.
انځور: DW/D. Cupolo
د گوتو لگول؟ نه مننه!
چارواکي غواړي کاله ته نژدې یو بل کمپ هم جوړ کړي. د کانتینرونو په دغه کلي کي به ۲۰۰۰ کسان ځای پر ځای سي. ډیر مهاجر نه غواړي چي هلته ورسي، ځکه مخکي تر هغه باید د خپلو گوتو نخښي ورکړي. د دوی په نظر، هغوی ښايي په دې ډول په فرانسه کي پاته کیدو ته مجبوره سي او د خپلي خوښي هیواد بریتانیا ته ولاړ نه سي.