د جابر البکر کورنۍ غواړي چي د آلمان د زاکسن ايالت پر هغو چارواکو حقوقي دعوی وکړي چي په توقيف کي د البکر مسؤل ول. البکر هغه سوريايي مهاجر دی چي آلماني امنيتي چارواکو يې په کور کي په لوړه اندازه چاودېدونکي توکي موندلي ول او هغه تښتېدلی ؤ. وروسته البکر د نورو سوريايانو له خوا و پوليسو ته وسپارل سو. البکر په توقيف کي ځانوژنه وکړه.
د آلمان د لايپڅيګ ښار څارنوال په توقيف کي د البکر د مړيني پلټني کوي او دغه پلټني لا ادامه لري. خو د البکر کورنۍ تر مخه لا پرېکړه کړې چي د البکر د ځانوژنې مخه نيول کېدلای سوای. همدا وجه ده چي د نوموړي کورنۍ غواړي چي د آلمان د زاکسن ايالت اړونده چارواکي محکمې ته کش کړي. دا خبره د البکر د کورنۍ وکيل اليکزاند هيوبنر و آلمانۍ ورځپاڼي «زيوډ ډويچه څايټونګ»، NDR او WDR رسنيو ته کړې ده. د دغه وکيل په وينا دا چي چارواکو البکر په يو عادي توقيفځي کي اچولی ؤ نو اوس بايد پلټنه وسي چي ايا دغه کار سم ؤ که څنګه.
د شکمن ترهګر د کورنۍ وکيل زياته کړې چي البکر په داسي يو اطاق کي بندي کړل سوی ؤ چي هرې دېرش دقيقې وروسته به د چارواکو له خوا کنټرول کېدی. د وکيل په وينا دا د هغه باوجوده چي البکر په دغه توقيف کي د اطاق برقي څراغ مات کړی او په ساکټونو کي يې لاس وهنه کړې وه. خو د آلمان د زاکسن ايالت چارواکي ځان د شکمن ترهګر په ځانوژنه کي پړن نه بولي.
ورور يې پر ځانوژنه شک لري
د البکر يو ورور چي په سوريه کي ژوند کوي و آلمانۍ ورځپاڼي «ډي وېلټ» ته يې په يوه مرکه کي ويلي چي پر دې شک لري چي ورور به يې ځان وژلی وي. نوموړي ويلي: «حتی که هغه په رشتيا هم د داعش غړی ؤ، نو هغوی خو ځانونه نه وژني.» د البکر د دغه ورور په وينا ولي چي په اسلام کي ځان وژنه منعه ده.
د جابر البکر ورور و يادي آلمانۍ ورځپاڼې ته زياته کړې: «زه په پوره توګه په دې متيقين يم چي پوليسو هغه وژلی دی.» خو د آلماني چارواکو د معاينې د راپور له مخي د البکر په وژنه کي د هغه علاوه د بل چا فعاليت يا لاس لرل نه دي تثبيت سوي. د جابر البکر کورنۍ هم د البکر د ورور له لوري د ادعا څخه فاصله نيولې ده.
جابر البکر د اکتوبر په ۱۰مه نېټه د آلمان په لايپڅيګ ښار کي نيول سوی ؤ.
پر ورته موضوع یو انځوريز البوم زموږ له آرشيف څخه (22.07.2016):
انځورونه: د آلمان په مونيخ یا مونشن ښار کي وسله وال بريد
په مونشن کي د احتمالي ۳ وسله والو په ډزو کي لږ تر لږه ۷ انسانان وژل سوي دي. د جمعې په ورځ په ماښام د اولمپیا مارکېټ ته نژدې او بيا د هغه دننه ډزو مرګ ژوبله رامنځ ته کړه. د دغه بريد په تړاو انځوريز راپور دلته کتلای سئ:
انځور: picture-alliance/dpa/M. Balkد آلمان د صدراعظمې انګېلا مېرکل په دفتر کي د مونشن د بريد په تړاو بېړنۍ غونډه راوبلل سوه.
د پوليسو وياند مارکوس دا گلوریا مارتینز د مونشن د بريد په تړاو خبريالانو ته معلومات ورکول.
د خبرونو له مخي لومړۍ ډزي د مونيخ يا مونشن ښار په منځ کي واورېدل سوې..
د دغه بريد په تړاو په لومړي سر کي د ۶ او وروسته د ۸ انسانانو د وژل کېدو خبرونه ورکول سول.
پوليسو په لوړ شمېر سره د اولمپيا سر پټي مارکېټ شاوخوا سيمه محاصره کړه.
د پوليسو د ملاتړ له پاره د بريد په سيمه کي څرخي الوتکي هم ګرځېدلې.
بريدګر د ډزو وروسته و اولمپيا کارکېټ دننه ته په تښتېدلو بريالي سول.
پوليسو د تښتېدلو بريدګرو د موندلو له پاره و سيمي ته ورتلونکي ټولي لاري بندي کړې.
د مونشن د مرکزي برخي فضا د امبولانسونو، پوليسو د موټرو او څرخي الوتکو شور نيولې وه.
پوليس د اورګاډو د لويو تمځايونو تر څنګ د ښار نورو حساسو ځايونو ته د امنيت نيونې په مقصد ورسېدل.
پوليسو د بريد له سيمي څخه د خلکو په خوندي ځايونو ته انتقالولو کي مرسته وکړه.
د بريد شاهدانو په لومړي سر کي وويل چي درې وسله وال يې وليدل.
پوليسو په لومړي سر کي دغه بريد يو «وسله وال بريد» وباله. خو وروسته يې وويل چي کيدلای سي چي دغه يو «ترهګر بريد» وي.
د جمعې په ورځ د ماښام د شپږو بجو څخه مخکي د مونيخ په مرکز کي ډزي واورېدل سوې.
پوليسو د مونشن له اوسېدونکو وغوښتل چي په خپلو کورونو کي دننه پاته سي.
د مونيخ دننه د هر ډول عمومي ترانسپورت تګ راتګ بند کړل سو.
پوليسو له مځکي او هوا څخه وضعه څارله.
پوليسو په مونيخ کي له انسانانو وغوښتل چي و بازارونو او ښار نورو برخو ته له تګ څخه دي صرف نظر وکړي.
