د المان پولیسو ویلي دي چې د پراخو عملیاتو په لړ کې چې تر ۱۰۰۰ ډیرو پولیسو پکې ګډون کړی وو، ۱۰۱ سوداګریز او د استوګنې ځایونه یې پلټلي او ۱۰ شکمن کسان یې نیولي دي. په نیول شوو کې دوه وکیلان هم شامل دي. ګمان کیږي چې دې بانډ به د ډیرو پیسو ترلاسه کولو په بدل کې خپلو مشتریانو ته په المان کې د اقامې اسناد برابرول.
دغه بانډ ۳۵۰ بهرنیانو ته، چې اکثره یي چینایي اتباع دي په جعل کارۍ سره په المان کې د اقامې جواز په اخیستلو تورن دی.
دغه پراخ عملیات د المان فدرال پولیسو ادارې له خوا د المان په لویدیځ کُلن ښار کې څارل کیدل.
د مهاجرت ادارې کارمندانو ته د رشوت ورکول
د المان د پولیسو په وینا د المان بُن ښار ته نږدې په سنګت اوګوستین ښار کې د انساني قاچاقبرانو دغه بانډ د بهرنیو مسلکي کارګرو له پاره د المان له ځانګړي قانون څخه په استفادې د جعلي جوازونو په ترلاسه کولو تورن دی.
په بلغاريا کي د انساني قاچاقبرانو شبکه څرنگه فعاليت کوي؟
This browser does not support the video element.
ویل کیږي چې د دې بانډ مراجعینو د المان د ویزې ترلاسه کولو له پاره له پنځه تر شپږ رقمي (۳۰ تر ۳۵۰) زرو یورو پورې تادیه کړي دي.
د «بِلډ» المانۍ ورځپاڼې د رپوټ پر بنسټ، دې بانډ د المان د کډوالو او مهاجرت څو تنو کارمندانو ته هم بډې یا رشوت ورکړی دی.
ټول ۱۰ شکمن کسان د المان په لویدیځ نورد-راین- وستفالن ایالت کې، چیرې چې دغه عملیات متمرکز وو نیول شوي دي.
د پولیسو پر وینا د نورد-راین- وستفالن سربیره دغه عملیات د شلزویګ هولشتاین، هامبورګ، برلین، هِسن، راینلنډ فالتڅ، بادن وورتمبرګ او بایرن په ایالتونو کې ترسره شوي دي.
پولیسو ویلي دي چې په دغو عملیاتو کې پيسې او اسناد هم ضبط شوي دي. قانون پلي کوونکو ادارو د ټول المان په کچه په ۲۰۲۲م کال کې په مجموع کې د انساني قاچاق ۴۹۳۶ موارد ثبت کړي دي چې دا تر هغې د یوه کال مخکې په پرتله ۳۰ سلنه زیاتوالی ښيې.
آژانسونه: ش.ن/ ن.ز
انساني قاچاق وړونکي، افريقايي انجوني او بدلمني
د دویچه ویله دوو خبریالانو جان فلپ شولز او آدریان کریش، په نایجیریا کې د انساني قاچاقبرانو په هکله پلټنې کړي. د قاچاقبرانو د تعقیبولو ترڅ کې د دوی سر تر ایټالیا پورې ورسید، خو د خاموشۍ له یو دیوال سره مخامخ شول.
انځور: DW/A. Kriesch/J.-P. Scholzد دویچه ویله دوو تنو خبریالانو د انساني قاچابرانو پسې د لټون لړۍ له نایجیریا د ایدو ایالت څخه پیل کړ. دوی چې له هر چا سره لیدل د هغه یو نه یو خپلوان به ضرور په اروپا کې وو. په ایټالیا کې د بدلمنه ښځو دری پر څلورمه برخه د دغې سیمې نجوني دي. بې روزگارې له دغې سیمې څخه د مهاجرت اصلي لامل گڼل کیږي.
نن بیبینا ایمناها، د څو کلونو راهیسې په ځانگړي توگه ځوانو نجونو ته خبردارې ورکوي چې اروپا ته له سفر کولو څخه ډډه وکړي. ایمناها وایې: «ډیرې نجونې د درواغو ژمنو په جال کې بند پاتې کیږي. دوی ته ویل کیږي چې په کورونو کې به د خدمې یا ورته کارونه کوې، خو کله چې اروپا ته ورسیږي بیا نو دوی درواغ معلوم شي. له همدې امله ډیرې نجوني د مجرمو ډلو لاسو ته ولیږي.»
تر ډیرو هڅو وروسته یو قاچاقبر له دویچه ویله سره خبرو ته راضي شو. هغه وویل چې تر سلو ډیر خلک یې له نایجیریا څخه لیبیا ته رسولي دي. د هغه په خبره د «د ایدو خلک ډیر حریص دي او د ښې راتلونکي له پاره هر څه کولو ته تیار دي.»
دغه قاچاقبر چې ځان اسټیو معرفي کوي وایې چې له نایجیریا څخه تر لیبیا پورې له هر کس څخه ۶۰۰ ایرو اخلي. ډیرې پوهیږي چې له دښتې او صحرا له لارې لیبیا ته رسیدل څومره خطرناک دی. په دې ترڅ کې ډیر شمیر خلک خپل ژوند له لاسه ورکوي.
د «اگادیز» دښته د دویچه ویله د خبریالانو راتلونکې منزل وو. د دوی په خبره دا ډیره خطرناکه سیمه ده. په دې دښته کې دغه خبریالان یوازې د وسله والو محافظینو سره سفر وکولې شو.
هره دوشنبه تر لمر ولیدو وروسته د څو لاریو یوه قافله د اگادیز دښتې څخه د شمال پر لور روانیږي. په لیبیا کې د نا کراریو له امله انساني قاچاقبران بې له کوم ممانعت څخه دغه هیواد ته داخلیږي او د مدیترانې ساحل ته ځان رسوي.
د مهاجرو شمیر مخ پر ډیریدو دی او نجونې باید کم عمره وي
د نایجیریا ډیرې نجونې د فحشا بانډونو په لاسو کې ولیږي. مدني فعاله لیزا بیرتینې وایې: «د شمیرو له مخې په ۲۰۱۴ کال کې تر ۱۰۰۰ ډیرې نایجیریایې نجوني او میرمنې د مدیترانې له لارې ایټالیا ته رسیدلي دي. په ۲۰۱۵ کال کې دا شمیر ۴۰۰۰ ته لوړ شو.» نوموړۍ زیاتوي چې کوښښ کیږي د نجونو عمر کم تر کم وښودل شي.
د نایجیریا د یوه دوست په مرسته دغه دواړه ژورنالستان د ایټالیا په شمال کې یو «مادام» ته ورسیدل. نایجیریا کې دلالې ته مادام ویل کیږي. په ایتالیا کې یوې نایجیریایۍ نجلې وویل: «مادام پر موږ تشدد وکړ او بدلمنې ته یې مجبوره کړو.»
کله چې د دویچه ویله خبریالانو پر مادام د لگول شوو مختلفو تورونو په هکله پوښتنې وکړې، نو هغې ومنله چې په کور کې یې ۶ نجونې موجودې دي. خو دا رد کړه چې دغه نجونې یې بدلمنې ته اړ ایستلي دي.
د مونیکا اوشکوی په نوم یوې راحبې په دې برخه کې ایټالوي ادارې په نه پاملرنې تورنوي او انتقاد پرې کوي. نوموړۍ د تیرو ۸ کلونو راهیسې بدلمنۍ ته اړ ایستل شوو نجونو په برخه کې کار کوي. نوموړی زیاتوي چې سړي غواړي په ډیرو کمو پیسو خپل جنسي خواهش پوره کړي، چې دا کار په ایټالیا کې له نایجیریایې ښځو سره د ۱۰ ایرو په بدل کې کولې شي.
