د «افریکوم» په نوم په لیبیا کې د افریقایي- کوماندو امریکا ځواکونو په حواله، د لیبیا په سویل کې دغه عملیات په نړيواله کچه د لیبیا د په رسمیت پيژندل شوي حکومت سره په همغږۍ کې ترسره شوي دي. دا په تیرو څو ورځو کې د داعش یا «اسلامي دولت» ډلې د جنګیالیو پر وړاندې د امریکایي ځواکونو دریم هوایي برید دی چې ترسره کیږي.

د افریکوم په حواله د تیرو دوو هوایي بریدونو د بمباریو په نتیجه کې چې د سپټمبر میاشتې په ۱۹ او ۲۴ نیټو کې ترسره شول د دغې ډلې په مجموع کې ۱۹ شکمن جهادیان وژل شوي دي.

د لیبیا سویلي برخه په طرابلس کې د مرکزي حکومت له کنترول څخه وتلې ساحه ده چې د جدایې غوښتونکي پخواني جنرال خلیفه حفتر ځواکونه په کې پياوړي دي.

د خلیفه حفتر ځواکونو د اپریل په میاشت د پلازمېنې طرابلس د نیولو له پاره عملیات پیل کړل. د هغه وخت راهیسې حکومتي ځواکونه او جنرال حفتر ته وفادار واحدونه د طرابلس د کنترول نیولو له پاره مبارزه کوي.

کارپوهان د امنیتي خلا د رامنځته کیدو خبرداری ورکوي چې کیدای شي د «اسلامي دولت» ډلې له خوا ترې د دغه هیواد په نورو برخو کې استفاده وشي. 

nob/jj (afp, rtre)/sn-aa