د امریکا یو اټومي اوبتل منځني ختیځ ته رسیدلی دی
۱۴۰۲ آبان ۱۵, دوشنبه![USA U-Boot Marine Ohio-Klasse USS Ohio](https://static.dw.com/image/67313182_800.webp)
متحده ایالاتو د یوه بې ساري اقدام په ترڅ کې اعلان کړی دی چې د اوهیو Ohio ډول یو اوبتل یې په سیمه کې د امریکایي ځواکونو د مرکزي قوماندانۍ مرکز (سنتکام) ته رسیدلی دی. دغه انځور په ایکس یا پخواني تویتر شبکه کې خپور شوی دی چې دغه اوبتل په کې له سویس کانال څخه د تیریدو په حالت کې لیدل کیږي. امریکا معمولاً د خپلو اوبتلونو د مستقر کیدو ځای نه اعلانوي.
د دغه اوبتل نوم چې له سویس کانال څخه د تېريدو په حال کې دی، پټ ساتل شوی او دا هم نه ده په ډاګه شوې چې آیا دا اوبتل یو له هغو څلورو اوبتلونو څخه دی چې د توماهاوک کروز توغندي انتقالوي او یا یو له هغو ۱۴ اوبتلونو څخه دی چې د تریدنت-۲ ډول بالستیک توغندي انتقالوي.
خو په هر حال دا په سیمه کې د امریکایي ځواکونو د مقاومت د پیاوړې کولو او د اړتیا په صورت کې د حملې توان د زیاتولو ښکاره نښه ګڼل کیږي. سنتګام په ورته وخت کې پر اټومي وسلو سمبال د B-1 ډوله بم غورځونکي الوتکې یو انځور هم خپور کړی دی چې عملیاتي حوزه یې هم منځنی ختیځ اعلان شوی دی.
د لویدیځ رسنۍ د سنتکام له خوا په سیمه کې د خپل مقاومت توان پر زیاتولو ټینګار، ایران او متحدینو ته یې داسرائیل او حماس په روانه شخړه کې د نه ورګډیدو په هکله پټ او ښکاره خبرداری بولي.
بلنکین ترکیې ته تللی
د امریکا متحده ایالاتو د بهرنیو چارو وزیر انتوني بلینکن د حماس او اسرائیل د شخړې اړوند سیمې ته د خپل څو ورځني سفر په ترڅ کې له عراق وروسته ترکیې ته رسیدلی دی او په انقره کې یې له خپل ترکي سیال هاکان فیدان سره لیدلي دي.
د آنادولو خبري آژانس د رپوټ پر بنسټ د ناټو د دغو دوو غړو هیوادونو وزیران پر دې خبرې سلا شوي دي چې د مذاکراتو اصلي محور باید د غزې جګړه وي.
د ترکیې له ولسمشر رجب طیب اردوغان سره لیدنه د بلینکن په پروګرام کې شامله نه ده. اردوغان مخکې تر دې اسرائیل د غزې په جګړه کې «د بشریت پر وړاندې په جنایت» تورن کړی وو.
د امریکا د بهرنیو چارو وزیر مخکې تر دې منځني ختیځ ته د خپل سفر په ترڅ کې اسرائیل، اردن او عراق ته تللی وو او د دغو هیوادونو له مشرانو سره یې لیدلي وو.
فلسطینۍ فعاله عهد تمیمي نیول شوې
د اسرائیلي پوځ په وینا مشهوره فلسطینۍ فعاله عهد تمیمي چې د «د فلسطینیانو د مقاومت سمبول» بدل شوې ده، د اردن په لویدیځه غاړه کې د پوځي عملیاتو په ترڅ کې نیول شوې ده. اسرائیلي پوځ اعلان کړی دی چې تمیمي رام الله ته نږدې په نبي صالح ښار کې «تاوتریخوالي او ترهګریزو فعالیتونو ته د هڅونې» په تور نیول شوې ده.
دغه ۲۲ کلنه فعاله د اسرائیل امنیتي بنسټونو ته د پوښتنو او ګرویږدنو له پاره سپارل شوې ده. د اسرائیلي رسنیو په حواله هغې په خپل انستاګرام شبکه کې په ښارګوټو کې د میشتو اسرائیلیانو وژنې ته خلک را بللي وو.
عهد تمیمي د ۱۴ کلنۍ په عمر کې د هغې ويډیو له خپریدو وروسته مشهوره شوه چې دې په کې د خپل کشر ورور د خلاصولو له پاره پر یوه اسرائیلي سرتیري خوله (چک) لګولې وه. کله چې ۱۶ کلنه وه د کمرې مخې ته یې یو اسرائیلی عسکر په سپیړه وهلی وو او له همدې کبله نیول شوې وه، چې وروسته له هغې د فلسطینیانو د مقاومت پر سمبول بدل شوه.
نوموړې په ۲۰۱۸م کال کې وروسته له څو میاشتو بند څخه آزاده شوه. د تمیمي یو ډیر لوی انځور په بیت اللحم کې د اسرائیل او اردن د لویدیځي غاړې ترمنځ دیوال هم نصب کړای شوی دی.
د غزې له اوسیدونکو یو وار بیا لویدیځ لور ته د وتلو غوښتنه شوې ده
د اسرائیل د پوځ یوه ویاند په ایکس شبکه کې په عربي ژبه لیکلي چې پوځ د سهار له ۱۰ بجو څخه د ماسپښین تر ۲ بجو پورې په سویل کې د تیریدو یوه لاره پرانیزي. د پوځ دغه ویاند له خلکو غوښتي دي هر څومره ژر چې ممکن وي د ځان د خوندیتوب له پاره دې د سویل پر لور لاړ شي.
دقیق یوه اونۍ مخکې اسرائیلي پوځ د حماس ترهګرې ډلې پر وړاندې د ځمکنۍ جګړې نوی پړاو اعلان کړی وو. د اسرائیل پوځ په وار وار د غزې له اوسیدونکو څخه غوښتي دي چې د سویل پر لور دې تیښته وکړي. د اسرائيلي پوځ په حواله تر اوسه پورې شاوخوا ۷۰۰ زره کسانو پر دې سپارښتنې عمل کړی دی.
د ملګرو ملتونو سازمان د رپوټ بر بنسټ په غزې تراډه کې د یوه میلیون او ۴۰۰ زرو په شاوخوا کې انسانان د خپلو کورونو پریښودو ته اړ شوي دي. د نړۍ په دې ګڼ میشته نقطه کې شاوخوا ۲ میلیونه او ۲۰۰ زره انسانان ژوند کوي.
د اسرائیل پوځ تر ټولو ډیر د غزې تړاډې په شمال کې د حماس د تاسیساتو پر وړاندې د جګړې په حال کې دی، خو تر اوسه پورې یې څو ځله په سویل کې هم بمبارۍ کړي دي. د اسرائیلي پوځ په خبره په هغو سیمو کې چې د ملکیانو له پاره ټاکل شوي دي، یوازې د حماس د مشرانو پر وړاندې هدفمند بریدونه ترسره کیږي. دغه معلومات په خپلواکه توګه نه شي تائیدیدلی.
آژانسونه: ش.ن/ ب.ص