د کار نړیوال سازمان (ILO) د ارزونې له مخې په نړۍ کې تر۲۰ میلیونو ډیر انسانان د انساني قاچاق قرباني دي. ښځې د انساني تجارت د قربانیانو ۷۱ سلنه دي. ډیري دغه ښځې د «جنسي اړیکو تجارت» په موخه پیر او پلورل کیږي. د انساني تجارت ۲۵ سلنه قربانیان ماشومان دي. د دغو ماشومانو تر نیمایي ډیر یي په سویلي آسیا کې ژوند کوي.

د مخدره موادو او جرمونو پر وړاندې د مبارزې نړیوال سازمان (UNODC) د ارزونې له مخې انساني تجارت مختلف ډولونه لري. د انساني تجارت دوې اصلي برخې په جنسي استثمار او بیګارۍ پورې اړه لري، خو ۸ سلنه یي بیا د تحمیلي ودونو او سوالګرۍ ته د انسانانو په اړایستلو پورې تړلي دي.

فحشا او بد لمني د انساني تجارت له مهمو ډولونو څخه شمیرل کیږي، خو د کرهڼیز اقتصاد، د نشه یي موادو پیر پلور، کب نیونه، د کور کار او نورو برخو کې هم له انساني تجارت څخه ګټه اخیستل کیږي.

هر کال په ټوله کې تر دوه میلیونه او ۴۰۰ زرو ډیر انسانان د توکو په شکل پير او پلورل کیږي. دا له بشري حقونو څخه د سرغړونې یو ترټولو بد شکل ګڼل کیږي. د کار نړیوال سازمان د اټکلونو له مخې د انساني تجارت له طریقه د ترلاسه کیدونکي عاید کلنې کچه تر ۳۲ میلیارده ډالرو زیات ښودل شوی دی.

انساني تجارت سرحد نه پيژني! هم د هیواد په پولو کې دننه او هم په نړیواله کچه. د انساني قاچاق اکثره قربانیان د لږ پرمختیایي هیوادونو اتباع دي. د بیلګې په توګه د مودلداوي هیواد اتباع د ترکیي، روسیي او متحده عربي اماراتو په هیوادونو کې د مختلفو کارونو د ترسره کولو په موخه پلورل کیږي.

له یوې خوا بی وزلي، فقر او محرومیت، او له بلې خوا یوې ښې راتلونکي ته امیدواري د دې سبب کیږي چې هر کال په میلیونونو انسانان د قاچاقبرانو په دام کې بند پاتې شي. سربیره پر دې ډیر شمیر جنایتکاره بانډونه د ماشومانو په تښتونه لاس پورې کوي او دغه ماشومان بیا په نورو هیوادونو کې خرڅوي.

د هغو کسانو دقیق ارقام چې د انساني تجارت قرباني کیږي شتون نه لري. که څه هم د داسې کسانو شمیر شاوخوا ۲۰ میلیونه اټکل شوی دی، خو ویل کیږي چې حقیقي ارقام تر دې ډیر لوړ دي. په نړیواله کچه د انساني قاچاق پر ضد اعتراضونه دوام لري. په دې انځور کې د لاګوس هیواد خلک لیدل کیږي چې د انساني قاچاق او تجارت پر ضد یي په مظاهره کې ګډون کړی دی.