میرکل د آلمان د سیاست په ډگر کې لومړی د محافظه کار گوند تر رهبري ورسیده او بیا د آلمان صدراعظمه شوه. هغه تر اوسه پورې درې وارې پرله پسې لومړۍ وزيره ټاکل شوې او اوس يې پر دغه چوکۍ تقريبا ۹ کاله پوره کيږي.

کله چې وړوکې انگلا دوروتیا کیسنر لویده، څوک په دې خبره پوهیدل چې هغه به یو وخت د نړۍ تر ټولو پیاوړې ښځینه سیاستواله شي؟ میرکل د ختیځ آلمان په تیمپلن ښار کې په یوې مذهبي پروتیستانت کورنۍ کې وروزل شوه. د هغې پلار یو پروتیستانت روحاني وو نو له همدې کبله د میرکل ډیر پالنه د هغې د مور له خوا وشوه.

په دې انځور کې د میرکل نیا، نیکه او د هغې پلار لیدل کیږي. دغې کورنۍ په لومړي سر کې په پولند کې ژوند کاوه خو په ۱۹۳۰ کال کې بیا آلمان ته راغله. په ۲۰۱۳ کال کې د آلمانۍ صدراعظمې انگلا میرکل د پولندي ریښو په اړه معلوماتو لږ تر لږه په پولند کې یو څه توده بحثونه راوپارول.

میرکل په ۱۹۷۳ کال کې ښوونځې په بهترينو نمرو پای ته ورساو او تر هغه وروسته په رخصتۍ ولاړه. میرکل د پخواني ختيځ آلمان د آزادو آلماني کمیونست ځوانانو غړې وه. هغه لومړۍ آلمانۍ مشره ده چې په پخواني ختیځ آلمان کي لويه سوې ده.

انگلا په لا يپزڅيګ کې د فزیک په برخه کې تحصيل وکړ. هغې په همدې ځای کې خپل لومړی میړه وپیژند چې اونریش میرکل نومیده. اونریش وروسته وویل چې کله یې میرکل د لومړي ځل له پاره ولیده نو ورته یوه روښان انده، د پرانیستي فکر خاونده او طبعي نجلۍ ښکاره شوه. میرکل له سفر کولو سره مینه لري. دا انځور په ۱۹۸۲ کال کې په پراگ کې اخیستل شوی. هغې خپله دوکتورا په کیمیا کې د ختیځ آلمان د ساینس په آکاډمي کې ترلاسه کړه.

میرکل له سیاسي لحاظه د ختیځ آلمان په اپوزیسیون کې فعاله شوه. د ختیځ او لویدیځ آلمان تر یوځای کیدو وروسته د هغې گوند له مسیحي دیموکرات اتحاد (CDU) سره یوځای شو. د آلمان د هغه وخت صدراعظم هلموت كول له میرکل څخه ملاتړ وکړ او هغه ته یې په خپلې کابینې کې کار ورکړ.

میرکل په CDU کې ډیر پرمختگ وکړ او د دې گوند مشره شوه. کله چې دغه گوند په ۲۰۰۵ کال کې له سوسیال دیموکراتانو سره لوی ایتلاف وکړ، هغه د آلمان لومړۍ ښځینه صدراعظمه شوه.

میرکل د آلمان، اروپا او نړۍ په سیاسي ډگر کې قوي څرگنده شوې ده. هغې د اروپايي مالي کړکیچ پر مهال له خپل موقف سره د آلمان له گټو څخه دفاع وکړه. د هغې منتقدین نیوکه کوي چې میرکل ډیر سیاسي مانورونه ترسره کوي. په دې مورد کې هغوی په آلمان کې د امریکا متحده ایالاتو د جاسوسي بربنډونې د بیلگې په توگه یادوي.

پوتین او میرکل دواړه یو له بل سره په آلماني او روسي ژبو خبرې کوي. داسې ښکاري چې د دواړ اړیکې ښې وي خو د کریمیا موضوع د دواړو هیوادونو اړیکې یو څه ترینگلې کړې دي.

میرکل له خپل لومړي میړه نه بیله شوه. هغې بیا وروسته له یواخیم ساویر سره واده وکړ. که څه هم میرکل خپل اولادونه نه لري خو یواخیم له خپلې مخکینۍ میرمنې څخه دوه زامن لري. میرکل په برلین کې له خپل میړه سره په یوه اپارتمان کې ژوند کوي او پخپله خپله سودا رانیسي.

میرکل خپلې رخصتي په ایټالیا کې تیروي. هغه لمبا او قدم وهلو ته ځي. په ژمې کې هغه سکي کولو ته ورځي.

میرکل د آلمان د فوټبال ملي لوبډلې مینه واله ده او د دغې ډلې په مهمو لوبو کې د تماشه کوونکي په توګه گډون کوي. نوموړې د نړیوال جام د پای لوبې د کتلو لپاره هم ورغلې وه.