د اسوشيتد پریس خبري آژانس په حواله د سیمې د کميشنر مرستيال صاحب زاده اسفند یار، د چهار شنبې ورځې دا پېښه تائيد کړې ده او ويلي یې دي چې روښانه نه ده چې ايراني ځواکونو ډزې ولې کړي دي؟ نوموړي زياته کړې چې په دې اړه پلټنې روانې دي او ډېر ژر به یې جزئیات په ډاګه شي. 

هغه وويل چې وژل شوي او ټپيان ټول ملکي وګړي دي.

يوه بل دولتي مامور محمد عمر جمالي، هم د ایراني ځواکونو له لوري د فېرونو خبر تائيد کړی دی.

د چارواکو په حواله د پاکستان او ایران سرحد ته څېرمه په رامنځته شوې پېښه کې له وژل شويو څخه یې درې د ماشکيل سيمې سره تړاو لري او يو د کويټې د ښار اوسيدونکی دی. ويل شوي چې درې سره ټيپان روغتون ته ليږدول شوي دي.

د سيمې پوليسو ويلي دی چې جسدونه د هغوی کورنيو ته سپارل شوي دي.

د ایران او پاکستان د بهرنيو چارو وزارتونو له خوا په دې اړه لا کوم غبرګون نه دی ښوول شوی.

دا ډول پېښې مخکې هم رامنځته شوي

د پاکستان او ایران پر پوله دا ډول پېښې په ماضي کې هم رامنځته شوي دي چې په تازه پېښه یې د ۲۰۲۴م کال په جنورۍ میاشت کې شوې وه. هغه وخت د پاکستان په خاوره کې د بې پېلوټه الوتکو بريدونه تائيد شوي ول.

خو تر دې پريکړې سملاسي وروسته د پاکستان پوځ د جنورۍ میاشتې پر ۱۸مه نيټه ويلي ول چې پاکستان په ايران کې دننه پر هغه پټنځايونو اغیزناک بريدونه کړي دي چې په پاکستان کې د دغه بريدونو د مسئولو «ترهګرو» له خوا کاريدل.

دا په داسې حال کې ده چې د ۲۰۲۳م کال په اپريل میاشت کې هم د پاکستان پوځ ويلي ول چې «د ایران سره له پولې هاخوا د فعالو ترهګرو يوې ډلې په ډزو کې د پاکستان په کچ سيمې کې پر ګزمه بوخت امنيتي چارواکي وژلي دي.»

د ماشکيل سيمه د بلوچستان ايالت له مرکز کویټې ښار څخه ۱۰۵۰ کيلومتره لېرې پرته ده او د پاکستان او ایران ترمنځ مهم تجارتي پاټک دی. خو انساني قاچاق وړونکي دا مسیر د ایران او ترکیې له لارې اروپا ته د خلکو د رسولو له پاره هم کاروي.

د سرحد دواړو لوريو ته امنيتي ځواکونه د قاچاق وړونکو او وسله والو د نیولو په موخه هم وخت نا وخته عمليات کوي.

آژانسونه

زموږ له آرشيف څخه: