د بایرن ایالت پر پولو د سختو امنیتي تدابیرو غوښتنه
۱۳۹۴ آبان ۲۴, یکشنبه![Seehofer - CSU](https://static.dw.com/image/18850967_800.webp)
د کډوالو په اړه نور معلومات دلته ولولئ:
سربیره پر دې چې د آلمان ځینو وزیرانو ویلي دي چې د پاریس تر بریدونو وروسته باید د احساساتي پریکړې له نیولو څخه ډډه وشي خو د بایرن ایالت لومړي وزیرهورست زیهوفر په دې باور دی چې له دې غمیزې څخه وروسته باید پر پولو امنیت لا هم ټینګ شي.
هغه د آلمان له فدرالي حکومت څخه غوښتنه کړې ده چې یواځي د اروپا نه بلکه د آلمان د فدرالي ایالتونو پر پولو هم باید سخت امنیتي تدابیر ونیسي.
زیهوفر د بایرن ایالت پر پوله د هغه کس نیولو ته چې وسلې او چاودیدونکي مواد یې انتقالول په اشارې سره وویل: «د مهاجرت د لوړې کچې په پام کې نیولو سره باید موږ په دې پوه شو چې زموږ له پولو څخه څوک راتیریږي.»
آلماني چارواکي دا څیړنې کوي چې د بایرن ایالت پر پوله د نیول شوي کس او پر پاریس د بریدونو ترمنځ کوم تړاو شته او که نه.
«د غیرقانوني مهاجرت ادامه ناممکنه ده»
د بایرن ایالت د مالیې وزیر مارکس زودر، ویلت ام زونتاګ «Welt am Sonntag» ورځپاڼې سره په خبرو کې ویلي دي چې که چیرې د اروپایي اتحاديې پر پولو امنیتي تدابیر نه نیول کیږي نو آلمان باید پر خپلو پولو امنیت ټینګ کړي. د آلمان حکومت باید دا هم په پام کې ولري چېد اړتیا په وخت کې خپلې پولې وتړي.
زودر همداراز ویلي دي: «غیر قانوني او نا منظمه مهاجرت باید ادامه پیدا نه کړي. پاریس هر څه بدل کړل.»
د آلمان د کورنیو چارو وزیر توماس دیمیزیر د شنبې په ورځ وویل چې له فرانسې له غوښتنې سره سم یې د دې هیواد سره پر پوله امنیتي تدابیر سخت کړي دي. هغه همداراز وویل چې د فرانسې د غوښتنې پر اساس آلمان په موټرو، اورګاډو او هوایي ډګرونو کې تلاشي ګانې ډیروي.
دیمیزیر زیاته کړه چې د کډوالو پر ضد د بریدونو شمیر ډیر لوړ دی نو ځکه د دې کار له پاره د نورو خلکو له هڅولو څخه باید ډډه وشي.
د آلمان د صدراعضمې معاون زیګمار ګابریل، هم ګواښ وکړ چې د کډوالو پر ضد ښایي نور بریدونه هم تر سره شي، هغه د دې کار لامل داسې په ګوته کړ: «ځګه چې ډیر شمیر کډوال له هغو سیمو څخه راځي چې موږ ته او نړی ته تروریزم صادروي.»
د شنبې په ورځ انګلا میرکل هم د پاریس د پیښو په اړه خپله خواشیني څرګند کړه او دا پیښه يې وغندله. په دې پیښو کې لږ تر لږه ۱۲۹کسان وژل شوي دي.