د بایونتیک د درملن جوړونې شرکت مشر اوغور شاهین، چې له امریکایي شرکت فایزر سره یې په ګډه د کرونا واکسین جوړ کړی دی د بایوتکنالوژي شرکتونو په مجازې غونډه کې ویلي: «په اوس وخت کې داسې علایم موجود دي چې زموږ واکسین د کرونا ویروس د بدلیدونکو بڼو پر وړاندې د تطبیق وړ دی.»

د دغه واکسین دریم دوز کیدای شی مرسته وکړي

شاهین زیاته کړې چې د بایونتیک شرکت له لا زیاتو مهارتونو سره د واکسین د تخنیک او تولید په برخه کې کار کوي، څو د اړتیا په صورت کې د مناسب غبرګون له پاره تیاری ولري. هغه وویل چې بایونتیک په دوامداره توګه د کرونا ویروس د اوښتونکو بڼو پر وړاندې د دغه واکسین اغیزمنتوب تحلیل او تجزیه کوي.

شاهین د کرونا ویروس د ډولونو په اړه د توضیحاتو په ترڅ کې وویل چې اوس ډیر معلومات په لاس کې لري. د نوموړي په وینا په دې ارتباط چې د وخت په تیریدو سره د دغه ویروس پر وړاندې معافیت کمزری کیږي او نوې ډولونه یې رابرسیره کیږي هم معلومات شته. هغه وویل: «زه په دې باور یم چې د واکسین دریم دوز به د معافیت په لوړولو سره د دې ویروس پر وړاندې ډیر اغیزمن وي. خو سره له دې هم تر اوسه پورې نه پوهیږم چې تر کوم وخته او څو ځله به دوباره واکسین کیدو ته اړتیا وي.»

د دلتا ډول پراخیدل

د شاهین د څرکندونو پر اساس ټاکل شوې ده چې بایونتیک او فایزر به په همدې روان میلادي کال کې خپل د تولید ظرفیت ۳ میلیارده دوزو ته لوړ کړي. په پام کې ده چې دغه شمیر به په راتلونکي کې تر دې هم لوړ شي. لږ تر لږه ۵۰ سلنه د دغه واکسین به پخپله د بایونتیک له خوا تولید شي.

د کرونا ویروس دغه نوې بڼه لومړی په هندوستان کې خپره شوه. دا چې دغه د دلتا بڼه یې په څومره چټکۍ سره خپریږي د آلمان د هسن ایالت د روغتیا وزیر کای کلوزه په خبره په اوس وخت کې په دغه ایالت کې شل سلنه اخته کیدونکي کسان په همدې بڼې مبتلا شوي دي. کلوزه، د واکسینولو بهیر پر ګړندي کولو ټینګار کړی دی.

رابرت کُخ انستیتوب هم د اندېښنې په څرګندولو سره ویلي دي چې د دلتا په بڼې د اخته کسانو ناروغي شاید شدیده وي او دغه بڼه په ډیرې سادګۍ سره خپریږي.

په بریتانیا کې د واکسیناسیون پر ګړندي بهیر سربیره هلته اوس د کرونا ويروس دلتا بڼه په ډیر سرعت سره د خپریدو په حال کې ده. د پرتګال په پلازمېنه لیزبن کې د اونۍ په پای کې د کرونا د دغي بڼې د خپریدو په دلیل تګ راتګ په بشپړ ډول منع شوی دی. په مسکو کې د دې ډول د مبتلایاتو شمیر ډیر لوړ دی. د مسکو د ښاروال سرګئې سوبیانین په وینا په وروستیو مواردو کې په کووید-۱۹ د اخته کسانو نږدې ۹۰ سلنه په دلتا بڼې مبتلا شوي دي.

آژانسونه: ش.ن/ ن.ز