د پاکستان حکومت روانه اوونۍ ادعا وکړه چې د دغه هېواد په ځانمرګو حملو کې افغانان لاس لري. پاکستان خبرداری ورکړی دی چې ټول غیر راجستر شوي افغان مهاجر دې د نومبر میاشتې تر لومړۍ پورې له دغه هېواده ووځي، چې له دې پرته به ېې جایدادونه او کاروبارونه ضبط او خپله به جبراً اخراج کړل شي.

د پاکستان حکومت په خبره، په دغه هېواد کې شاوخوا ۱ اعشاریه ۷ میلیونه غیرقانوني افغان مهاجر ژوند کوي. په وروستیو کې د پاکستان په مختلفو ښارونو کې په سلونو افغان مهاجر نیول شوي دي.

د پاکستان دغه تصمیم د بشري حقونو سازمانو د اندېښنو سبب شوی دی؛ په ځانګړې توګه چې يو شمېر افغان مهاجر پاکستان ته د طالبانو د تعقیب او زورولو له بېرې تښتېدلې دي چې د اخراجولو په صورت کې ښايي له خطر سره مخامخ شي.

د ملګرو ملتونو د سرمنشي آنتونیو ګوتریش، ویاند ويلي دي چې د پاکستاني چارواکو دغه اعلان، «په روښانه توګه د اندېښنې وړ یو تحول» دی.

ویاند ستیفن دوشاري، په نيویارک کې د ملګرو ملتونو په مقر کې خبریالانو ته وويل: «د یو اصل په توګه دا ډېره اړینه ده چې هيڅ مهاجر باید بېرته اخراج نه شي، مګر دا چې بېرته ستنېدل په خپله خوښه او باعزته وي.»

د بخښنې نړېوال سازمان هم د یوې اعلاميې په خپرولو د پاکستان له حکومته غوښتي دي چې افغان مهاجر دې نه اخراجوي.

د جنوبي آسیا له پاره د دغه بشري سازمان موقتې مرستيالې، نادیه رحمان، ويلي دي: «د بخښنې نړېوال سازمان د پاکستان له حکومته غواړي چې له افغان مهاجرو سره خپل تاریخي ملاتړ ته ادامه ورکړي.» دغه سازمان زیاته کړې ده چې د اخراج په صورت کې افغان مهاجر په افغانستان کې د طالبانو له تعقیب سره مخ کېدی شي، په همدې دليل دې «هغوی ته دې د اخراج له وېرې پرته د کرامت ژوند ممکن کړي.»

دغه سازمان ويلي دي چې په پاکستان کې مېشت افغان مهاجر، د مهاجرو په چارو کې د ملګرو ملتونو په عالي کميسارۍ کې د راجستر کولو په پروسه کې د ځنډ او خنډونو د موجودیت په دليل او همدارنګه دريم هېواد ته د هغوی د انتقالولو له پاره فوری ملاتړ ته اړتیا لري.

د بخښنې نړېوال سازمان، د مهاجرو په چارو کې د ملګرو ملتونو له عالي کمیسارۍ څخه غوښتي چې د افغان مهاجرو په راجستر يا نوم لیکنه کې فوري اقدام وکړي او ټينګار ېې کړی دی چې د پاکستان حکومت دې د افغان مهاجرو نیول او زورول سمدلاسه ودروي.

طالبان: د پاکستان تصمیم غیرمنصفانه دی

په افغانستان کې د طالبانو حکومت د پاکستان په ناامنیو کې د افغانانو لاس لرل رد کړي او په دغه هېواد کې د مېشتو افغان مهاجرو په تړاو د پاکستانی چارواکو وروستي تصمیم ته ېې غبرګون ښوولی دی.

د طالبانو د دفاع سرپرست وزير د پاکستاني چارواکو دغه اقدام «ظلم، وحشت او بربریت» ښودلی دی.

ملا یعقوب مجاهد د پنجشنبې په ورځ، د پولیس افسرانو په فراغت غونډه کې وويل: «دغه تصمیم غندم. دغه تصمیم غیرعادلانه او غیرمنصفانه دی.»

تېره ورځ د طالبانو ویاند، ذبیح الله مجاهد هم پر ایکس شبکه چې پخوا په ټويتر یادېده وویل چې «په پاکستان کې له افغان مهاجرو سره چلند د منلو نه دی.»

مجاهد زیاته کړې چې پاکستاني لوری باید په دې هکله «پر خپل پلان باندې له سره غور وکړي.»