«سکای تراکس» په نړۍ کي د ۵۵۰ هوايي ډگرونو په اړه ۱۳ ميليونه مسافر پوښتلي دي. د سينگاپور هوايي ډگر څلورم وار په نړۍ کي تر ټولو ښه هوايي ډگر بلل سوی دئ.

د جنوبي کوريا اينجيون هوايي ډگر بيا هم خپل دوهم ځای ساتلی دئ. دغه هوايي ډگر دغه راز په نړۍ کي د ترانزيت او ښه پرسنل په برخه کي هم تر ټولو غوره بلل سوی دئ.

د جرمني د مونشن ښار هوايي ډگر هم په پرخپل دريم ځای پاته سوی دئ. دغه هوايي ډگر دغه راز په مرکزي اروپا کي تر ټولو ښه بلل سوی دئ. د دغه ډگر د دوهم ترمينال د پراختيا کار به هم ډېر ژر پای ته ورسيږي.

د توکیو هاندا هوايي ډگر توانېدلی دئ چي په نړۍ کي د ښو هوايي ډگرونو په برخه کي يو گام مخته څلورم ځای خپل کړي. دغه هوايي ډگر دغه راز د پاکۍ او کورنيو پروازونو په برخه کي تر ټولو شه بلل سوی دئ.

د هانکانگ نړيوال هوايي ډگر چي په ۲۰۱۲م کال کي ئې په نړۍ کي د ښوو هوايي ډگرونو په برخه کي لومړی مقام لاره، تير کال څلورم ځای نيولی او سږکال پنځم سوی دئ.

د جاپان په ناگويا کي پر مصنوعي جزيرې باندي جوړ سوی هوايي ډگر تر نورو کلونو يو گام رامخته سوی او په نړۍ کي ئې د ښوو هوايي ډگرونو په برخه کي شپږم ځای نيولی دئ.

په سويس کي د څوريخ هوايي ډگر چي مخکي ئې شپږم ځای لاره په ۲۰۱۶م کال کي اووم سوی، خو په نړۍ کي ئې په هوايي ډگرو کي د ښه امنيتي سيستم په برخه کي لومړی مقام گټلی.

د لندن هوايي ډگر چي په اروپا کي تر ټولو ستر دئ د ۲۰۱۵م کال په شان پر اتم ځای پاته سوی دئ.

په جاپان کي د کانزای هوايي ډگر چي پر يوه مصنوعي ټاپو جوړ سوی د نړۍ د ښوو هوايي ډگرونو په نظر پوښتنه کي په ۲۰۱۶م کال کي له دولسم ځای څخه نهم ته پورته سوی دئ.

همد قطر نړيوال هوايي ډگر چي په ۲۰۱۴م کال کي فعاله سوی توانېدلی چي له ۲۲ ځايه د نړۍ په لس ښوو هوايي ډگرونو کي خپل ځای ونيسي.

د جاپان په چيبا ښار کي ناريتا هوايي ډگر په نړۍ کي د ښوو هوايي ډگرونو په برخه کي يوولسم ځای نیولی دئ.

د فرانکفورت هوايي ډگر توانېدلی چي په ۲۰۱۶م کال کي ۱۲ ځای خپل کړي.

د امستردام هوايي ډگر په نړۍ کي د ترټولو ښوو لسو هوايي ډگرونو له کتاره وتلی او په ۲۰۱۶م کال کي ۱۳ ځای خپل کړی.

د کاناډا ونکوور هوايي ډگر په نړۍ کي د ښوو هوايي ډگرونو په ليست کي ۱۴ ځای نیولی دئ.

د فنلند د هلسينگی هوايي ډگر د مسافرانو له نظر توانېدلی دئ چي د نړۍ په پنځلسو ښوو هوايي ډگرونو کي وشمېرل سي.