د بشري حقونو د څار ادارې د نومبر پر ۱۳ د پنجشنبې په ورځ یوې خبرپاڼې کې وویل، د اسټرالیا د حکومت وړاندیز شوي اصلاحات په افغانستان کې د طالب چارواکو او د بشري حقونو نورو سرغړونکو د حساب ورکولو په برخه مهم ګام دی.
د بشري حقونو د دغه سازمان په وینا، د خودکاره بندیزونو د مقرراتو تعدیل د نویو معیارونو داسې ليست راپېژني، چې په ځانګړې توګه د افغانستان له پاره طرحه شوی.
د بشري حقونو د څار سازمان ویلي، چې دغه اصلاحات د استرالیا دولت ته دا اجازه ورکوي، چې پر هغو کسانو او بنسټونو هدفمند بندېزونه او د سفر ممنوعیت ولګوي، چې په افغانستان کې د ښځو، نجونو او لږهکیو په سرکوب کې رول لري.
په استرالیا کې د بشري حقونو د څار بنسټ مشرې، دانیلا ګاوشون وویل:« په افغانستان کې د ښځو او نجونو پر وړاندې د بریدونو او نورو جدي بشري حقونو سرغړونکو طالب مشرانو پر وړاندې د آسټرالیا حکومت دغه اقدام خورا مهم دی.»
پرافغان ښځو د طالبانو د بندیزونو کرونولوژي
له هغه وخت راهیسي (۲۰۲۱م کال په اګست میاشت کې) چې طالبان بيا واک ته رسېدلي، په ځانګړي توګه يې پر ښځو باندې بندیزونو ته دوام ورکړی دی. د ډسمبر میاشتې پر ۳ نېټه یې ښځې د روغتياپالنې په برخه کې هم له زده کړو منع کړي دي.
انځور: Wakil KOHSAR/AFPطالبانو د نجونو او هلکانو پر يوځايي زده کړې بندیز ولګاوه او نارينه یې نجونو ته له زده کړو ورکولو منع کړل.
طالبانو د ښځو پر سپورت بندیز وضع کړ.
نجونې تر شپږم ټولګي پورته له زده کړو منع شوې.
نجونې او ښځې په کابل پوهنتون کې له زده کړو څخه منع شوې.
طالبانو د محرم پرته له هېواده دباندې د ښځو پر سفر بندیز ولګاوه.
پوهنتونو ته د جنسيت پر بنسټ د جلا جلا ټولګيو لارښوونه وشوه.
طابانو د تلویزیون ښځينه وياندویانو ته د مخ پټولو لارښوونه وکړه.
طالبانو ورزشي کلبونو او پارکونو ته د ښځو او نجونو پر ورتګ بندیز اعلان کړ.
تر امر ثاني پورې دولتي او شخصي پوهنتونونه ته د ښځو پر تګ بندیز اعلان شو.
تر شپږم ټولګي وروسته نجونې شخصي کورسونو ته له تګ څخه هم منع شوې.
طالبانو په نړيوالو غیر دولتي موسسو کې د ښځو پر کار بندیز ولګاوه.
ښځې په بهرنيو غير دولتي موسسو کې په ښونیزو پروګرامونو کې له ونډه اخيستو څخه منع شوې.
د طالبانو د امر بالمعروف وزارت د ښځو پر سينګارتونونو بندیز اعلان کړ.
د طالبانو د روغتيا وزارت موسسو او پوهنیزو ادارو ته امر کړی دی چې ښځينه زده کوونکي دې نورې زده کړو ته نه ورپریږدي.
پر ښځو د محدودیتونو او بندیزونو اوږد لست
په ۲۰۲۱ کال کې پر افغانستان له ولکې وروسته طالبانو پر نجونو او مېرمنو یو لړ محدودیتونه او بندېزونه لګولي، چې د بشري حقونو سازمانونو په وینا، ښايي «د بشریت پر وړاندې جنایت» او «د جنسیت پر بنسټ ځورونې» وګڼل شي.
نړیوالې ټولنې او د بشري حقونو سازمانونو په ځلونو له طالبانو غوښتي، چې د ښځو او نجونو حقونو ته درناوی وکړي او په ځانګړې توګه دې پر نجونو د زده کړو او کار بندېزونه پای ته ورسوي.
د طالبانو ادارې تر اوسه د ښځو د حقونو په اړه د نړیوالې ټولنې یوې غوښتنې ته هم مثبت ځواب نه دی ورکړی او ادعا کوي، چې په افغانستان کې یې د شریعت پر بنیاد ښځو ته حقونه ورکړي دي.
آیا د ښځو پر وړاندې د طالبانو دریځ لا پسې سختیږي؟
This browser does not support the video element.
