د بنګله ديش پخوانۍ صدراعظمه د مرګ په سزا محکومه شوې
۱۴۰۴ آبان ۲۶, دوشنبه
د بنګله ديش يوې درې کسیزې ځانګړې جنايي محکمې د دوشنبې په ماسپښين د حسينه پر وړاندې قضیې په اړه خپله پريکړه اعلان کړه. پريکړه د شيخ حسينه په غياب کې شوې ده چې د محکمې په حواله په تېښته ده.
شيخ حسينه دمګړۍ په ګاونډي هېواد هند کې پناه اخيستې ده. نوموړې په دې وروستيو کې له څو رسنيو سره د مرکو په ترڅ کې ويلي ول چې دغه محاکمه يو طرفه ده او پريکړه یې لا تر مخه ترسره شوې ده.
اړونده موضوع: بنګله دیش: د شیخ حسینه غوښتنه او د احتمالي تاوتریخوالي اندېښنې
د محکمې له لوري تر دې اعلان وروسته د څو میاشتو راهېسې روانه محاکمه پای ته ورسېدله. نوموړې په ۲۰۲۴م کال کې د محصلينو په مشرتوب بغاوت ځپلو د حکم پر ورکړه مجرمه پيژندل شوې وه.
په پلازمينه ډهاکه کې د ځانګړې محکمې يوه قاضي وويل: «موږ [محکمه] هغې ته د يوې سزا د اورولو پريکړه کړې ده او هغه د مرګ سزا ده.»
پر شيخ حسينه کوم تورونه لګول شوي ول؟
د بنګله ديش پخوانۍ لومړۍ وزیره شيخ حسينه په بشريت ضد جرمونو تورنه وه.
محاکمې بايد په دې اړه پريکړه کړې وای چې آيا حسينه د ۲۰۲۴م کال په جولای او اګست میاشتو کې د نوموړې د استبدادي واکمنۍ پر ضد د محصلينو له خوا د بغاوت د ځپلو حکم شخصاً ورکړې وو او که څنګه.
په دغو مظاهرو کې په سونو کسان هغه وخت ووژل شول چې امنيتي ځواکونو پر احتجاج کوونکو فیرونه وکړل. د وژل شويو کسانو کره شمیره معلومه نه ده.
د ملګرو ملتونو د پلټنو په حواله ښايي د دې ډله ایزو مظاهرو د ځپلو په ترڅ کې رامنځته شوي تاوتريخوالي تر ۱۴۰۰ ډېر کسان وژلي وي.
د هېواد د روغتيا وزارت يوه مشاور بيا دا شميرې ۸۰۰ ښوولې وې او ويلي یې وو چې په دې ترڅ کې ۱۴۰۰۰ کسان ټپيان شوي هم ول.
څارنوالانو د وژنو په مخنيوي کې د پاتې راتلو په ګډون چې د بنګله ديش د قانون پر اساس بشريت ضد جرم تصور کيږي، د شيخ حسينه پر ضد پنځه تورونه درج کړي ول.
شيخ حسينه له ۱۹۹۶م کال څخه تر ۲۰۰۱ م کال پورې او بيا له ۲۰۰۹م څخه تر ۲۰۲۴م کال د بنګله ديش صدراعظمه وه.
دوو نورو کسانو ته سزاوې ورکړل شوي
په دې قضيه کې د شيخ حسينه ترڅنګ دوه نور کسان هم تورن ول. له دوی څخه یې يو د کورنيو چارو پخوانی وزیر اسدالزمان خان کمال او بل د هېواد د پوليسو پخوانی مشر چوهدري عبدالله المامون وو.
له دوی څخه یې يوازې المامون په محکمه کې حاضر وو او پر ده لګول شوي تورونه یې منلي دي او د پنځوو کلونو بند په سزا محکوم شوی دی. دا په داسې حال کې ده چې د کورنیو چارو پخواني وزیر اسدالزمان خان کمال ته هم د مرګ سزا ورکړل شوې ده.