د ترمپ زوم او مشاور جارېد کوشنر غواړي له چارواکو سره همکاري وکړي. همدا اوس له روسي استازو سره د هغه د ليدنو کتنو په هکله پلټنې روانې دي. کانګرس هم د دې غوښتنه کړې چې اف بي آی دې ورته د پلټنو په هکله اسناد په لاس ورکړي.
انځور: Reuters/K. Lamarque
اعلان
د متحده آيالاتو د ولسمشر، دونالد ترمپ، زوم، جارېد کوشنر، د هغه د وکيل د څرګندونو له مخې، غواړي چې د پلټنو له فدرالي ادارې يا اف بي آی سره همکاري وکړي. دغه اداره له روسيې سره د هغه د ارتباطاتو په هکله تحقيق کوي.
د کوشنر د مدافع وکيل، جېمي ګورليک، د جمعې په ورځ وويل: «ښاغلي کوشنر لږ مخکې ومنل چې د دغو ليدنو کتنو په هکله به خپل معلومات له کانګرس سره شريک کړي. هغه به دغسې عين کار هم وکړي که د نورو پلټنو له کبله ورسره تماس ونيول شي.»
دغه خبره په هغه ورځ وشوه چې يوه څېړنيز پلاوي له اف بي آی څخه لا زيات اسناد وغوښتل، چې ځينې يې تقريبا څلور کاله زاړه هم دي، او پکې د اف بي آی د پخواني مشر، جېمز کومي، له خوا له سپينې ماڼۍ او د عدليې له وزارت سره د راشې درشې په هکله معلومات راغلي دي. څېړنيز پلاوی همداراز د ۲۰۱۶ کال په ولسمشريزو انتخاباتو کې د روسيې د ممکنه لاسوهنې په هکله تحقيق کوي.
کوشنر د ترمپ د ادارې يو کليدي نفر
د واشنګټن پوست ورځپاڼې او د ان بي سي خبري شبکې راپور ورکړی دی چې په دې لړ کې په دسمبر کې د کوشنر او روسي چارواکو تر منځ ليدنې څېړل کيږي ځکه چې کېدای شي روسيې د امريکا په ټاکنو کې مداخله کړې وي.
کوشنر چې د سپينې ماڼۍ يو کليدي سلاکار دی، او د ترمپ له لور ايوانکا سره يې واده کړی دی، د راپورونو په حواله د تېر کال په پای کې د روسيې له سفير، سرګي کيسلياک، او د روسيې له يوه بانکر، سرګي ګورکوف، سره ليدلي دي. واشنګټن پوست د داسې «خلکو چې له دغو پلټنو سره بلد دي» په خوله، خو د هغوی د نومونو د نه بربنډولو په شرط ليکلي دي چې د اف بي آی پلټنې په دې معنی نه دي چې په کوشنر باندې د کوم جرم د تر سره کولو تور پورې شوی دی. کورکوف چې کوشنر ورسره ليدلي دي، د «ونېش ايکونوم بانک» رئيس دی. هغه يو دولتي بانک دی چې د ۲۰۱۴ کال د جولای مياشتې راهيسې ورباندې امريکايانو بنديزونه لګولي دي.
کوشنر په اول سر د دغسې ليدنو په هکله په سم ډول معلومات نه وو ورکړي. دا اصلا يو شرط دی د دې له پاره چې څوک په سپينه ماڼۍ کې د کار کولو له پاره اړين امنيتي مراحل طی کړي. د هغه له خوا موظف شوي حقوقپوه او وکيل وروسته وويل چې دغه کار يوه اشتباه وه او دا چې اصلاح به يې کړي. کوشنر اوسمهال د سپينې ماڼۍ يوازنی چارواکی دی چې د اف بي آی په پلټنو کې د يوه کليدي نفر په توګه ياديږي. خو دا په داسې حال کې ده چې د ترمپ د انتخاباتي کمپاين د ټيم د نورو غړو په هکله هم ښايي پلټنې پيل شي.
پر ورته موضوع یو انځوريز البوم زموږ له آرشيف څخه (20.05.2017):
«ابو ايوانکا» په سعودي عربستان کي
د امريکا د متحده ايالاتو ولسمشر دونلد ترمپ د ولسمشر کېدو وروسته و بهر ته لومړی سفر دی. دا چي هغه لومړی سعودي عربستان ته ورځي، د دواړو اړخونو له خوا يو سمبوليک او مهم اقدام بلل کيږي.
انځور: picture alliance/dpa/E.Vucci
لومړی په رياض کي
دونلد ترمپ د ولسمشر په توګه خپل لومړی سفر و سعودي ته وکړ. په رياض کي د هغه د ښه راغلاست له پاره ځانګړي مراسم نيول سوي ول.
انځور: Reuters
۹ ورځي سفرونه
دونلد ترمپ به ۹ ورځي پرله پسې و سعودي عربستان، اسرائيل، واټيکان او وروسته د ناټو غونډي ته سفر وکړي. په دغه سفرونو کي به هغه د زياتو دپلوماتيکو ننګونو په هکله جواب ويلو ته اړ وي.
انځور: picture alliance/AP Photo/E.Vucci
د مېرمني سره
د ترمپ مېرمنه ميلانيا ترمپ هم د هغه سره په دغه سفر کي ملګرې ده.
انځور: picture alliance/AP Photo/E.Vucci
د شاه سلمان له خوا ښه راغلاست
د ترمپ د ښه راغلاست له پاره پخپله د سعودي عربستان پاچا شاه سلمان د خپلو لوړپوړو دولتي چارواکو سره حاضر سوی ؤ.
انځور: Reuters/J.Ernst
ستړې مه شې
شاه سلمان د دونلد ترمپ د الوتکي ځينو ته نژدې د ښه راغلاست له پاره ورغلی ؤ.
انځور: Reuters/J.Ernst
لومړی روغبړ
کله چي دونلد ترمپ د خپلې مېرمني ميلانيا سره له الوتکې راکښته سو نو شاه سلمان هغه ته د ستړې مه شې لاس ورکړ او وروسته يې د ميلانيا سره هم د لاس روغبړ وکړ. دا لومړی ځل دی چي دغه دوه مشران په مستقيمه توګه سره ويني.
انځور: Reuters/J.Ernst
مهم موضوعات
يو شمېر عربي ژبو رسنيو و سعودي عربستان ته د دونلد ترمپ لومړی سفر ډېر مهم بللی دی. بعضو دغو رسنيو په خپلو مطالبو کي هغه ته «ابو ايوانکا» يا د ايوانکا د پلار خطاب هم کړی دی. نوموړی به په سعودي کي پر مهمو موضوعاتو خبري وکړي.
انځور: Reuters/B. Algaloud
ترهګري
په پام کي نيول سوې چي دونلد ترمپ به د سعودي عربستان د دولت سره د ترهګرۍ په تړاو تفاهم ليک امضا کړي.
انځور: Reuters/J.Ernst
اقتصادي تړونونه
سعودي عربستان د امريکايي وسله جوړونکو شرکتونو تر ټولو مهم خريدار هيواد بلل کيږي. اټکل کيږي چي دغه موضوع به هم و سعودي ته د ترمپ د سفر له اجندا څخه يوه وي.
انځور: Reuters/J.Ernst
د عربي هيوادونو ټلواله
بعضو رسنيو داسي راپورونه خپاره کړي چي ترمپ غواړي د عربي هيوادونو يو ټلواله رامنځ ته سي تر څو امريکا يې د ايران پر ضد په سيمه کي تقويه کړلای سي.
انځور: picture alliance/AP Photo/E.Vucci
بهرنی سياست
په داسي حال کي چي دونلد ترمپ په کورني سياست کي د يو شمېر ننګونو او لانجو سره مخامخ دی، کتونکي اټکل کوي چي ښايي هغه اوس غواړي د بهرني سياست له لاري لاس ته راوړنې ولري.
انځور: Reuters/Saudi Royal Court
اسرائيل
اسرائيل به د دونلد ترمپ د سفرونو په لړۍ کي دويم مقام وي. په داسي حال کي چي هغه د ولسمشرۍ له پاره د کانديدۍ په وخت د منځني ختيځ په هکله خبري نه کولې، اوس غواړي هلته د سولي خبرو اترو ته د لاره هوارولو هڅه وکړي. دغه موضوع به د سعودي عربستان سره هم مطرح کيږي.
