دغه مظاهره د شنبې ورځې (د جنوري ۲۱مې) له پاره په ستاکهلم کې د ترکيې سفارت ته نژدې پلان شوې وه. سويډن په ناټو سازمان کې د غړيتوب ترلاسه کولو ته عريضه کړې چې له پاره يې د ترکيې تصویب ته اړتیا لري او ترکيه تر اوسه دغه کار ته حاضره شوې نه ده.
د مظاهرې تنظیمونکي وايي تمه وه چې شاوخوا ۵۰۰ تر ۶۰۰ پورې کسان په مظاهره کې ګډون وکړي چې هغوی به د ناټو سازمان ته د سويډن د وړانديز پر ضد اعتراض او ترڅنګ د کردانو له مظاهرو سره خپل ملاتړ وښيي. تنظیمونکي وايي چې دوی د دغې مظاهرې له پاره د ستهاکلم د پولیسو اجازه ترلاسه کړې ده.
ترکیه اوس هم له ناټو سره د سویډن د یوځای کیدو مخالفت کوي
په یو بل جلا اقدام کې د مهاجرو ضد یو ښي اړخي سیاستوال، راسموس پالودان، پلان درلود چې د ترکيې سفارت ته نژدې د مسلمانانو د مقدس کتاب قرانکریم یوې نسخې ته اور واچوي. رويټرز له ستاکهلمه لیکي چې د ترکيې یوې طرفدارې ډلې هم د سفارت مخې ته د مظاهرې کولو اجازه ترلاسه کړې ده.
د ترکيې خارجه وزارت د جمعې په ورځ، د سويډني چارواکو له خوا دغه اعتراض ته د اجازې ورکولو په غبرګون کې د سويډن سفير احضار کړ. د مهالویش له مخې دغه اعتراض د شنبې په ورځ د سويډن پلازمینه ستاکهلم کې د ترکيې سفارت مخې ته پلان شوی چې په کې د مسلمانانو مقدس کتاب قران کریم ته اور اچول کیده.
سوېډن غواړي د کردانو په تړاو سياست کي ترکيې ته نژدې شي
د ترکيې دفاع وزير د شنبې په ورځ وويل چې د سويډن دفاع وزیر سره پلان شوې کتنه يې وروسته له هغې لغوه کړه چې سويډني چارواکو په ستاکهلم کې د ترکيې ضد یوې مظاهرې ته اجازه ورکړه.
خلوصي آکار ويلي دي: «په دې ارتباط د جنوري په ۲۷مه ترکيې ته د سويډن د دفاع وزیر، پال جانسون، سفر بې معنی شوی دی. ځکه خو موږ دغه کتنه لغوه کړه.»
د ترکيې د دفاع وزارت د یوې اعلاميه پر اساس، آکار ويلي دي چې «د دغو (اعتراضونو) جوړول يا په لاره اچول د منلو وړ نه دي. مهمو کارونو ته اړتیا وه چې باید ترسره شوی وی...»
اردوغان بيا په ناټو کې د سويډن او فينلنډ غړيتوب د مخنيوي ګواښ وکړ
د سويډن دفاع وزير، جانسون، پلان درلود چې راتلونکې اوونۍ د خپل ترکي سيال په بلنه انقرې ته ولاړ شي. دغه سفر په داسې وخت کې تنظیم شوی وو چې دغه سکانديناوي هیواد غواړي د ناټو د غړيتوب ترلاسه کولو له پاره د ترکيې رضایت په لاس راوړي.
سويډن او فنلند تېرکال د ناټو سازمان د غړيتوب له پاره عريضې وړاندې کړې چې د غړيتوب ترلاسه کولو له پاره د ناټو د ۳۰ غړو تصویب ته اړتیا لري. ترکيه چې د ناټو غړی دی، وايي په ځانګړې توګه سويډن باید د هغو ډلو پر وړاندې چې انقره يې ترویستان بولي روښانه دريځ غوره کړي، په تېره د کردي یاغیانو پر ضد چې ترکيه يې د ۲۰۱۶م کال ناکامې کودتا عاملان بولي.
له آرشیف څخه یو انځوریز البوم (20.02.2018):
د ناټو ائتلاف او روسیې مقايسه: څوک ډېر پیاوړی دی؟
د ناټو ائتلاف او روسیې ترمنځ د ځواک توازن څرنگه دی؟ کوم يو ډېري وسلې او عسکر لري؟ په دې اړه دويچه ويله د ستراتيژيکو مطالعاتو له نړيوال انستيتوت او نورو سرچينو څخه ارقام راټول کړي چې په دې انځوريز راپور کې وړاندي کيږي.
انځور: REUTERSروسيه ۱۸۰۰ داسي توغندي يا راکټونه لري چې د اتومي سرگولولو د ليږد توان لري. ناټو ائتلاف بيا په ټولیزه توگه ۲۳۳۰ دغه ډول راکټونه لري چې له دې څخه يې دوه زره له امريکا متحدو ايالاتو سره دي.
ناټو ائتلاف په ټوليزه توگه شا او خوا درې نيم ميليونه عسکر لري چې تر ۱،۶ ميليونه زيات يې د اروپايي هيوادونو په پوځونو کې، ۳۸۲ زره د ترکیې په پوځ او تقريباً څه کم ۱،۴ ميليونه يې د امريکا د پوځ عسکر دي. د دې په پرتله د روسیې د عسکرو شمير۸۰۰ زرو ته رسیږي.
د روسیې د ټانکونو شمير کابو ۱۵ نيم زره دی. دا په داسې حال کې ده چې د ناټو هيوادونه په ټولیزه توگه شا او خوا ۲۰ زره ټانکونه لري. په دې کې ۲۵۰۰ ترکي او ۴۰۰۰ امريکايي ټانکونه هم شامل دي.
روسيه په يو وار د څو راکټونو د فایرولو توان او کابو ۳ زره ۸۰۰ راکټ لانچر لري. ناټو بيا ۳۱۵۰ دغه ډول راکټ لانچر لري چې له دې څخه ۸۱۱ د ترکیې له پوځ سره دي.
روسيه ۴۸۰ جنگي څرخي الوتکې لري. د ناټو متحدين بيا تر ۱۳۰۰ زياتې څرخي الوتکې لري چې له دې څخه کابو ۱۰۰۰ د امريکا له پوځ سره دي.
د ناټو ائتلاف په تولیزه توگه ۴۷۰۰ بم غورځونکې الوتکې لري. له دې څخه کابو ۲۸۰۰ د امريکا متحدو ايالاتو، ۱۶۰۰ د ناټو د اروپایي غړو او ۲۰۰ له ترکیې سره دي. روسيه بيا ټول ټال ۱۴۰۰ دغه ډول طيارې لري.
د روسيې د جنگي الوتکو شمیر کابو ۷۵۰ ته رسيږي. ناټو بيا په ټولیزه توگه کابو ۴۰۰۰ جنگي الوتکې لري. په دې کې د امريکا ۲۳۰۰ او د ترکيې ۲۰۰ جنگي الوتکې هم شاملې دي.
روسيه يوازي يوه الوتکې ليږدونکې بيړۍ لري، خو ناټو ائتلاف دا ډول ۲۷ بيړۍ لري.
د ناټو د غړو د جنگي کښتيو شمېر په ټولیزه توگه ۳۷۲ ته رسيږي چې له دې څخه ۲۵ د ترکیې، ۷۱ د امريکا، ۴ د کاناډا او ۱۶۴ د ناټو د اروپايي هيوادونو له سمندري ځواکونو سره دي. روسيه بيا د سلو په شا او خوا کې جنگي کښتۍ لري.
د ناټو غړي هيوادونه کابو ۱۶۰ اوبتلونه لري. د روسیې د اوبتلونو شمېر بيا ۶۰ ته رسیږي. د ناټو د ټولو اوبتلونو څخه یې ۷۰ د امريکا، ۱۲ د ترکیې او ۷۲ د نورو اروپايي غړو هيوادونو سره دي.
د روسیې او ناټو دفاعي بودجه هم د مقايسې وړ نه ده. د روسیې دفاعي بودجه يوازې ۶۶ ميليارده ډالره ده. دا په داسې حال کې ده چې د امريکا دفاعي بودجه ۵۸۸ ميليارده ډالرو ته رسيږي. د ناټو ائتلاف ټولیزه بودجه کابو ۸۷۶ ميليارده ډالر ده.
