د بریتانیا حکومت په حواله، شتمنو روسانو د وروستیو اونیو په جریان کې د سرو زرو اخیستل ډير کړی تر څو ېې په دې کار د غربي هیوادونو د تحریمونه اغیز کمزوری کړی وي. په مارچ میاشت کې د روسېې د قیمتي فلزاتو اعتبار د «لندن بلین مارکيټ» (LBMA) له خوا د تعلیق په حال کې راوستل شوي دي. لندن بلین مارکيټ د اسهامو له بازار څخه بهر د سپينو او سرو زرو د سوداګرۍ تر ټولو ستره مرجع ده.
په دغه ځای کې له ۱۹۱۹م کال راهیسې په نړیوال بازار کې د سرو زرو بیه او له ۱۸۹۷ کال راهيسې د سپينو زرو بیه ټاکل کيږي.
د یو شمیر هیوادونو مشران او د جي۷ ډلې غړي هیوادونو رهبران به، د روسېې پر ضد دغه تصمیم په اړه تر سه شنبې ورځې پورې په خپلو کې سلا مشورې کوي.
جي۷ ډله، له آلمان، بریتانیا، فرانسې، ايټالیا، امریکا متحده ایالات او جاپان هیوادونو څخه متشکله ده. د جي ۷ غړو هیوادونو د سږنۍ غونډې کوربتوب د آلمان هیواد کوي.
پر ورته موضوع زموږ له آرشیف څخه یو انځوريز البوم (07.01.2022):
کوم هيواد تر ټولو زيات سره زر لري؟
د کرونا اوبا پر وخت د سرو زرو بيه ډېره لوړه سوې ده. د سرو زرو زياتي زېرمي مرکزي بانکونه لري او لا نور سره زر هم اخلي. دا چي کوم هيواد تر ټولو زياتي زيرمي لري، دلته يې وپېژنئ:
انځور: picture-alliance/dpa/K. Mathis
لسم مقام ـ هالند، ۶۱۳ ټنه سره زر
د اروپايي اتحاديې غړی هيواد هالند يو له هغو اروپايي هيوادونو څخه دی چي د سرو زرو زياتي زيرمي لري. د يو اس فنډس په نوم انټرنټپاڼي د راپور له مخي د دغه هيواد مرکزي بانک د ۲۰۲۰م کال په اګست مياشت کي تقريبا ۶۱۲ ټنه سره زر لرل او په دې توګه په ټوله نړۍ کي لسم لوی مرکزي بانک دی.
انځور: Imago Images/Hartenfelser
نهم مقام ـ هند، ۶۵۸ټنه سره زر
په هند کي نه يوازي په شخصي او خصوصي توګه د سرو زرو مينه وال زيات دي، بلکي د دغه هيواد مرکزي بانک هم په لوړه اندازه سره زر لري. د يو اس فنډس د راپور له مخي د دغه هيواد مرکزي بانک د ۲۰۲۰م کال په اګست مياشت کي ۶۵۷ ټنه سره زر لرل او په دې توګه تر ټولو زياته طلا لرونکی نهم بانک و.
انځور: picture-alliance/dpa/J. Nv
اتم مقام ـ جاپان، ۷۶۵ ټنه سره زر
جاپان د نړۍ تر ټولو لوی دريم اقتصادي قدرت دی. خو د سرو زرو د زيرمي په ترڅ کي دغه هیواد پر اتم مقام دی. د دغه هيواد مرکزي بانک د ۲۰۲۰م کال په اګست مياشت کي ۷۶۵ ټنه سره زر لرل.
چين چي د نړۍ په تر ټولو لويو اقتصادي قدرتونو کي شميرل کيږي، مرکزي بانک يې د ۲۰۲۰م کال په اګست مياشت کي ۱۹۴۸ ټنه سره زر لرل. له دغو څخه ۱۰۰ ټنه يوازي د ۲۰۱۸م کال د دسمبر او ۲۰۱۹م کال د اګست تر منځ رانيول سوي دي.
انځور: Getty Images/L. Chor
پنځم مقام ـ روسيه، ۲۳۰۰ ټنه سره زر
په تيرو ۷ کلونو کي د روسيې مرکزي بانک يو له تر ټولو لوی د سرو زرو رانيوونکی دی. د دغه مرکزي بانک د سرو زرو زيرمي د ۲۰۲۰م کال په اګست مياشت کي تقريبا ۲۳۰۰ ټنه او په دې توګه په نړۍ کي تر ټولو ستره پنځمه زيرمه وه.
انځور: picture-alliance/dpa/A. Ryumin
څلورم مقام ـ فرانسه، ۲۴۳۶ ټنه سره زر
د يو اس فنډس د راپور له مخي د فرانسې هيواد مرکزي بانک د ۲۰۲۰م کال په اګست مياشت کي ۲۴۳۶ ټنه د سرو زرو زيرمي لرلې. په دې توګه دغه مرکزي بانک په نړۍ کي څلورم نمبر تر ټولو زياتي د طلا زيرمي لرونکی مرکزي بانک دی.
انځور: picture-alliance/dpa/P. Kneffel
دريم مقام ـ ايټاليا، ۲۴۵۱ ټنه سره زر
د فرانسې او آلمان تر څنګ د ايټاليا د اروپا له تر ټولو قوي او سترو درو اقتصادونو څخه بلل کيږي. د ۲۰۲۰م کال په اګست مياشت د دغه هیواد د مرکزي بانک د طلا د زيرمو حجم ۲۴۵۱ ټنه او په دې توګه په نړۍ کي پر دريم نمبر و.
انځور: Getty Images/AFP/P. Huguen
دويم مقام ـ آلمان، ۳۳۶۳ ټنه سره زر
آلمان په اروپايي ټولنه او په ټوله اروپا کي تر ټولو لوی اقتصاد دی. د دغه هيواد مرکزي بانک د۲۰۲۰م کال په اګست مياشت کي په ټوليزه توګه ۳۳۶۳ ټنه سره زر لرل او په دې توګه په نړۍ کي تر ټولو زياته د سرو زرو لرونکی دويم مرکزي بانک دی.
انځور: imago images/Waldmüller
لومړی مقام ـ امريکا متحده ايالات، ۸۱۳۴ ټنه سره زر
امريکا متحده ايالات په ټوله نړۍ کي د نورو ټولو هيوادونو په پرتله د سرو زرو ستري زيرمي لري. د دغه هيواد مرکزي بانک د ۲۰۲۰م کال په اګست مياشت کي ۸۱۳۴ ټنه سره زر لرل. د يو اس فنډس وېبپاڼي د راپور له مخي په دې توګه د امريکا متحده ايالاتو مرکزي بانک تر ټولو زيات سره زر لرونکی بانک دی.
[ليکونکی: احمدولي اڅکزی]
