وروسته تر دې چې د ترکیې رسمي چارواکو په تیزابو کې د خاشقجي د جسد د ټوټو منحلیدل تائید کړل، د دغه هیواد د صباح ورځپاڼې رپوټ ورکړی دی چې په استانبول کې د سعودي عربستان د سر قونسل د کور په فاضلاتو یا د اوبو د بدرفت په کانال کې یې د قوي تیزابو شواهد موندلي دي.

ترکي چارواکو هم له هغه پیل څخه شک درلود چې قاتلانو د خاشقجي جسد په اسيد یا تیزابو کې حل کړی او د فاضله اوبو کانال ته يې وراچولی دی.

یوه ورځ مخکې «حریت» او د ترکیې نورو ورځپاڼو په استانبول کې د الجزیره شبکې د خبریال په حواله ویلي وو چې په استانبول کې د سعودي عربستان د سرقونسل په استوګنځای کې د تیزابو آثار موندل شوي دي.

الجزیره د ترکیې د څارنوالۍ د یوه باخبره چارواکي (د نوم د پټ ساتلو په شرط) په حواله اعلان کړی دی چې د خاشقجي پارچه پارچه کړای شوی جسد د سرقونسل د استوګنځای په یوه کوټه کې په تیزابو کې منحل یا ویلې کړای شوی دی.

د ترکیې د ولسمشر رجب طیب اردوغان سلاکار یاسين آکتاي، تیره اونۍ ویلي وو چې د خاشقجي ټوټې ټوټې کړای شوی مړی په تیزابو کې منحل شوی، تر څو آثار یې ونه موندل شي. 

د ترکیې ولسمشر د شنبې په ورځ (د نومبر میاشتې په ۱۰) اعلان وکړ چې د خاشقجې د قتل پيښې غږیز فایل د آلمان حکومت ته هم سپارل شوی دی. اردوغان وویل چې ترکیې د دې غږیز فایل یوه کاپي د آلمان، فرانسې، امریکا، سعودي عربستان او بریتانیې حکومتونو ته سپارلی دی. نوموړي زیاته کړې: «ټولو دغه خبرې اوریدلي او په جریان کې دي».

ترکیه وایې چې دغه ثبت شوی غږیز يا اوډیو فايل، د سعودي عربستان حکومت د منتقد خبریال جمال خاشقجي د قتل حالت او څرنګوالی مستند کوي.

سعودي عربستان په پيل کې تر انکار کولو وروسته بالاخره ومنله چې خاشقجي په استانبول کې د سعودي عربستان په قونسلګرۍ کې د امنیتي ځواکونو د زورزیاتي په پایله کې وژل شوی دی. د سعودي حکومت د دغه منتقد خبریال وژل کیدل، په ځانګړي توګه د سعودي د متحدینو ترمنځ او په نړیواله کچه د دغه هیواد پر وړاندې ډیر شدید غبرګونونه را وپارول.