د سعودي عربستان پادشاه سلمان او د هغه ۳۲ کلن زوی شهزاده محمد په ۲۰۱۷ م کال کې د شاهي کورنۍ له خوا رایج کړای شويو په کلونو پخواني قوانين، ټولنیز دودونه او د کاروبار کولو دودیزو طریقو کې د بدلون راوسته. دغه دواړه شخصیتونه اوس پر ځوان نسل تکیه کوي چې د بدلون هیله لري او له مالي فساد څخه هم په تنګ راغلي دي.

د همدې کال په سپتمبر میاشت کې حکومت د ښځو پر موټر چلونې د بندیز لیري کولو اعلان وکړ. سعودي عربستان د نړۍ هغه یوازنی هیواد وو چیرې چې د ښځو پر موټر چلونې بندیز لګول شوی وو. له ۱۹۹۰ م کال راهیسې به هغه ټولنیز فعالان نیول کیدل چې د ښځو د موټر چلونې حق له پاره به یې غږ پورته کاوه.

په ۲۰۱۸ م کال کې به ښځو ته د موټر چلونې لائسنس یا اجازنتامې د ورکړې لړۍ پيل شي. تر هغې وروسته به دوی د موټر تر څنګ د موټرسائکل د چلونې اجازه هم ترلاسه کړي. دا په ځانګړي توګه د سعودي عربستان د هغو ښځو له پاره یو ډیر لوی بدلون دی چې د هر کار له پاره پر نارينه و تکیه کوي.

په ۲۰۱۸ م کال کې به ښځې اجازه ولري چې په سټیډیم یا لوبغالي کې د ورزشي لوبو د سیالیو ننداره وکړي. په سټیډیم کې به د ښځو له پاره مشخص ځای موجود وي. په ۲۰۱۷ م کال کې محمد بن سلمان د ولس د غبرګون معلومولو له پاره په ریاض کې ښځو ته سټیدیم ته ورتګ اجازه ورکړه، چیرې چې د ملي ورځې په مناسبت مراسم ترسره کیدل.

وروسته له ۳۵ کلونو څخه په سعودي عربستان کې یو وار بیا سنیما فعالیږي. په ۱۹۸۰ لسیزه کې سنیماګانې بندې شوې وې. د دې هیواد ډیر شمیر علماء د فلمونو لیدل ګناه ګڼي. د ۲۰۱۸ م کال په مارچ میاشت کې به سنیماګانې خپل فعالیت پيل کړي. مخکې تر دې به سعودی اتباع بحرین یا دوبئ ته پر لویې پردې د فلمونو د لیدو له پاره ورتلل.

په ۲۰۱۷ م کال کې ریپر نیلي او ګیمز آف تهرونز، دو هنرمندانو له سعودي عربستان څخه لیدنه وکړه. جان تراولتا، هم دغه هیواد ته تللی وو چیرې چې هغه له خپلو مینه والو سره ولیدل او د امریکا متحده ایالاتو د فلمي صنعت په اړه یې ورسره خبرې وکړې.

سعودي عربستان به په ۲۰۱۸ م کال کې د سیاحتي ویزو د ورکړې لړۍ پيل کړي. نوموړی هیواد د یوه داسې سیاحتي سیمې د جوړونې اراده لري چیرې چې به د جامو یا لباس اړوند د سعودي عربستان سخت قوانين نه نافذ کیږي. د سعودي شهزاده محمد بن سلمان ویلي دي چې سعودي عربستان باید د «معتدله اسلام» پر لور را وګرځي.