د آلمان په پارلمان کې د چپیانو ګوند له خوا د یوې پوښتتنې په ځواب کې ويل شوي چې آلماني چارواکو د روان کال د فبرورۍ میاشتې له پیل څخه د جولای تر پایه پورې ۳۴۴ تنه هغه پناغوښتونکي تر تعقيب لاندې نیولي دي چې په آلمان کې یې د پنا غوښتنې غوښتنلیکونه رد شوي دي.
د دوشنبې په ورځ په یوه آلماني ورځپاڼه کې د خپور شوي یوه رپوټ پر بنسټ دغه مهاجر به له آلمان څخه اخراج او د اروپایې اتحادیې نورو غړو هیوادونو ته واستول شي.
د دوبلين د مقرراتو له مخې پناغوښتونکي کولی شي یوازې د اروپایې اتحادیې په هغه هیواد کې د پناه غوښتنه وکړي، د کوم هیواد له مسير څخه چې د دغې اتحادیې حدودو ته ننوتی وي.
د دوبلین د مقرراتو له مخې هغه پناغوښتونکي تر تعقيب لاندي نیول کیږي چې آلمان ته تر راتګ را رسیدو مخکې یې د اروپایې اتحادیې په یوه بل غړي هیواد کې د پناه غوښتنليک وړاندي کړی وي.
له همدې امله دا ډول پناغوښتونکي تر تعقيب لاندي نیول کیږي، تر څو بیرته د اروپایې اتحادیې هغه غړي هیواد ته یې واستوي چې په لومړي سر کې ورته داخل شوی وي او د سیاسي پناه د غوښتنلیک پاتې پروسه یې هم یوازې په هم هغه اروپایې هیواد کې پر مخ وړل کیږي.
د آلماني چارواکو په حواله که د دا ډول کسانو په اړه شک پیدا شي چې هغه د نوموړي هیواد (د اروپایې اتحادیې هغه غړي هیواد چې دی ورته په لومړي سر کې ننوتی دی) پر ځای د دغې اتحادیې کوم بل غړي هیواد ته د تيښتې هڅه کوي، نو په هغه صورت نوموړی شخص نیول کیږي او وروسته بیا له آلمان څخه اخراجیږي.
په دې توګه نو د داسې کسانو د تر تعقيب لاندې نیول کیدو پروسه د داسې رد شویو مهاجرو د نیول کیدو له پروسې سره توپير کوي چې تر نیول کیدو وروسته بیرته خپل پلرني هیواد ته استول کیږي.
د آلمان په پارلمان کې د وړاندي شویو شمیرو له مخې په دې موده کې د آلمان پولیسو د دغه هیواد اداري محکمو ته د دوبلین د مقرراتو پر بنسټ۳۶۴ داسې پناغوښتونکو تر تعقيب لاندې نیولو غوښتنه کړې ده چې د هغو له جملې څخه۲۰ کسان یې رد شوي دي.
د دوبلین د مقرراتو له مخې له آلمان څخه د مهاجرو د بیرته ستنولو پروسه د آلمان له پاره چندان ګټور نه دی ثابت شوی، ځکه چې د روان کال په دریمه ربع کې تر۱۸۰۰ ډیر پناغوښتونکي د اروپایې اتحادیې نورو غړو هیوادونو ته استول شوي، خو په بدل کې یې بیا په همدې موده کې د یادې مقررې له مخې۱۷۰۰ تنه پناغوښتونکي له نورو اروپایې هیوادونو څخه بیرته آلمان ته استول شوي دي.
د همدې شمیرو پر بنسټ د آلمان د چپي ګوند سیاستوالی اولا یلپکی، د آلمان په مرکزي پارلمان کې د نیوکې په ترڅ کې وویل: «دا څه ډول لوبه ده چې مرکزي حکومت وایې چې د مهاجرو له پاره د آلمان د فدرالي ادارې ۳۱۶ کارکوونکي د دوبلین مقررې اړوندو قضیو پر بررسۍ بوخت دي، په داسې حال کې چې له دغو کسانو څخه د هغو پناه غوښتونکو د دوسیو په عادلانه او چټکې څیړنې کې کار اخیستنه ډیره ګټوره ده چې په آلمان کې یې د پناه غوښتنلیکونه وړاندي کړي دي».
dpa,epd(S.N/N.Z)
زموږ له آرشیف څخه:
له آلمان څخه د افغانانو د اخراج پروسه ـ انځوريزه کرونولوژي
له آلمان څخه د افغان مهاجرو ډليز اخراجونه وروسته له هغې پيل شوه چې افغانستان د ۲۰۱۶ کال د اکتوبر میاشتې په سر کې د بروکسل په غونډه کې د مهاجرت پر موضوع د اروپايي اتحاديې سره يوې هوکړې ته ورسيد.
انځور: Imago/J. Heinrichد ۲۰۱۶ کال د اکتوبر مياشتې په لمړيو کې د بروکسل په غونډه کې افغانستان له اروپايي اتحاديې سره د مهاجرت پر موضوع يوې هوکړې ته ورسيدل، د دغې هوکړې له مخې د اروپايي اتحاديې غړو هيوادونو څخه افغانستان ته د رد شويو افغان مهاجرو د اخراج اسانه کړل شو.
د بروکسل د توافق له مخې، افغانستان دې ته حاضر شو چې د اروپايي اتحاديې د غړو هيوادونو لخوا رد شوي افغان مهاجر ومني.
د بروکسل په غونډه کې افغانستان د اروپايي اتحاديې لخوا مالي ملاتړ ترلاسه کړ، خو د بشر حقونو سازمانو پر دغې اتحاديې نيوکې وکړې چې دغه ملاتړ نبايد د مهاجرو له اخراج سره تړلي وي.
تر هوکړې وروسته د آلمان په مختلفو ښارونو کې د افغان مهاجرو د اخراج پر ضد ډیرې مظاهرې وشوي. افغان مهاجر او د هغو بهرني ملاتړي وايي چې افغانستان امن ندی.
آلمان څخه کابل ته د افغان مهاجرو لمړنی ډليز اخراج د ۲۰۱۶ کال په سپټامبر مياشت کې ترسره شو. په دغه پرواز کې ۳۸ تنه ردشوي افغان مهاجر کابل ته بيرته وليږدول شول.
آلمان څخه د رد شويو افغان مهاجرو دويم ډليز اخراج د ۲۰۱۷ کال په جنورۍ مياشت کې ترسره شو. په دا ځل پرواز کې ۲۶ تنه افغانان کابل ته اخراج شول.
که له ېوې خوا ډليز اخراجونه ترسره کيږي ورسره جوخت په ټول آلمان کې افغانانو ته دا حق ورکول کيږي چې د افغان مهاجرو د اخراج په ضد مظاهرې وکړي. په مظاهره کې يوازې افغانان نه بلکه آلمانان هم برخه اخلي. انځور په هامبورک ښار کې د مظاهرې يوه برخه.
آلمان څخه د افغان رد شويو مهاجرو دريم ډليز اخراج د ۲۰۱۷ کال په فبرورۍ مياشت کې ترسره شو. په دې پرواز کې ۱۸ تنه افغانان کابل ته اخراج کړل شول.
آلمان کې د مهاجرو ملاتړ کونکو او بشري سازمانونو په وار وار د افغان مهاجرو د اخراج ضد مظاهرو کې د افغانانو تر څنګ خپل اواز اوچت کړی دی. د آلمان ځيني ګوندونو هم د افغان مهاجرو له اخراج سره مخالفتونه ښکاره کړي دي. د بيلګې په توګه د ۲۰۱۷ کال په اپريل کې د آلمان د شلزويګ هولشتاين ايالت صدراعظم تروستن البیک د رد شويو افغان مهاجرو د اخراج بهير د درولو غوښتونکی شو.
اخراج شوي مهاجر او راتلونکې
افغانستان ته اخراج شوي افغان مهاجر ناهيلي ښکاره کوي. نور ايم رحمن له آلمان څخه په څلور پرواز کې کابل ته اخراج شو. د رحمن په څير اخراج شويو افغان مهاجرو لپاره تر ټولو ناهيلې کونکې خبره دا ده چې زيات وخت يې بې ګټي تير شوی دی. دوی له پاره په افغانستان کې له سره د نوی ژوند پيلول ګران کار بريښي.
آلمان څخه کابل ته د ردشويو افغان مهاجرو څلورم ډليز اخراج د ۲۰۱۷ کال په مارچ مياشت کې ترسره شو. په دغه ځل ۱۵ تنه افغانان اخراج شول.
په کابل ښار کې د آلمان سفارت مخته د می مياشتې په ۳۱ نيټه د موټر بم ستره چاودنه وشوه. په دغې چاودنه کې شاوخوا ۱۵۰ تنه ووژل شول. د آلمان سفارت ودانۍ هم سخته زيانمنه شوه. آلمان دا ځل د افغانانو پنځم ډليز اخراج وځنډاوه.
کابل کې د ۲۰۱۷ کال د می مياشتې د ۳۱ مې بريد وروسته آلمان افغانستان ته د افغان مهاجرو اخراج د نامعلوم وخت لپاره ودراوه. دغه هيواد وپتيله چې د افغانستان د امنيتي وضعيت په اړه له سره کتنه وکړي. د مي ۳۱ بريد د آلمان سفارت مخته شوی وو چې دغه سفارت په کې سخت زيانمن شو.
تر درو مياشتو ځنډ وروسته د اخراج لړۍ بيا پيل
د رد شويو افغان مهاجرو وروستي ډلييز اخراج د ۲۰۱۷ کال د سپټمبر په ۱۲ نيټه د دوسلدورف له هوايي ډګر څخه ترسره شو. په دغه پرواز کې لږ تر لږه ۱۲ تنه افغانان کابل ته اخراج کړل شول. دا له هغه وخته چې آلمان حکومت د افغان مهاجرو اخراج تر يو نامعلوم وخت پورې درولی وو، لمړی ډليیز اخراج دی چې له دغه هيواده ترسره کیږي.
کابل ته رسيدلی یو نوی رد شوی افغان مهاجر. دغه ځوان د ۲۰۱۷ کال د سپټمبر په ۱۳ يعنې په وروستي پرواز کې افغانستان ته اخراج شوی دی.
اخراج د رايو ترلاسه کولو لپاره
د آلمان د مهاجرو له حقونو څخه د ملاتړ ادارې مشر ګهونتر بورکهارت د افغان مهاجرو د وروستي اخراج په اړه د آلمان حکومت پر اعلان سختې نيوکې وکړې. بورکهارت ویلي وو چې هغوی ځکه د انتخاباتو څخه يوازې څو ورځې د مخه دغه کار کوي تر څو وښيي چې د اخراج په مسئله کې جدي دي او په دې ترتيب رايي ترلاسه کړي. سرچينې: آژانسونه، انځورنه د دويچه ویله له آرشیف څخه
