دغه دوه ګونې خويندې ايرون او پريفينا نوميږي. دوی سره نښتي دنيا ته راغلي ول او د ډاکټرانو په وينا چې د وينو شريانونه يې هم ګډ ول چې په ګډه يې دواړو بدنونو ته وينه ورکوله. د دوی جراحي عمليات ډير خطرناک او پيچلی وو، خو جراحان وتوانيدل چې هغه په بريا سره پای ته ورسوي.
په ايټالیا کې د جراحۍ دغه عملیات په خپل ډول کې لومړنی عملیات دي چې د پلازمينې روم ښار په «ګيسو پيډياټرک روغتون» کې چې د واټيکان ملکيت دی، ترسره شوی دی. د طب داکټران وايي په دوو ميليونو ماشومانو کې يوازې په يوه مورد زيږون کې د دې امکان شته چې دوه ماشومان په نښتي سرونه سره دنيا ته راشي.
د ايرون او پريفينا له يو بل څخه د جلا کولو په عمليات کې ۳۰ تنو جراحي او نورو ډاکټرانو او نرسانو برخه اخیستې وه. دوی پر دغه عملیات ۱۸ ساعته کار وکړ.
تر جراحي عمليات وروسته ايرون او پريفینا په جلا جلا توګه د خپلې مور په غيږ کېانځور: picture-alliance/AP Photo/Bambino Gesu Hospital خو ډاکټران وايي چې د عفونت خطر لا اوس هم موجود دی او د دې اړتيا شته چې دغه ماشومان د څو اوونيو له پاره حفاظتي خوليانۍ پرسر کړي. ډاکټرانو هيله ښودلې چې دغه ماشومان به په راتلونکې کې عادي ژوند ولري.
د جراحۍ دغه عمليات د تيرې مياشتې (جون) په پنځمه ترسره شوی وو. اوس چې له هغه وخت څخه يوه مياشت تيره شوې، ډاکټرانو ويلي دي چې دواړه ماشومان له ښه روغتيايي وضعيت څخه برخمن دي.
دغه دوګونې نجونې د ۲۰۱۸م کال په سپتمبر کې د مرکزي افريقا هيواد له پلازمينې، بانګي څخه ايټاليا ته راوستل شوي وې.
د ايټالوي روغتون مشر، دغه ماشومان هغه مهال د بانګي ښار په يوه روغتون کې ليدلي وو چې هغه مهال يې د اعلاج په موخه د هغوې د مور او پلار سره ايټاليا ته راوستلي وو.
زياته شوې چې د ايرون او پريفینا د جراحۍ عملیات ځکه ډير سخت او پيچلی وو چې دواړو ګډ عصبي سیستم درلود. د روغتون په يوې اعلاميه کې راغلي دي چې په دغه عملیات کې تر ټولو لويه ستونزه د دواړو ماشومانو د وينو د رګونو ګډه شبکه وه چې د عملیات پر مهال ډير رګونه او د سر کاسې له يو بل څخه جلا کړل شوي دي.د اروپا په سطحه د تيرو شلو کلونو په جريان کې د جراحۍ دا ډول يوازې دوه کامياب عملیاتونه ترسره شوي دي.
دويچه ویله ا/م.ک.ص/ن.ز
له آرشيف څخه يو انځوريز البوم:
هندوستان: د سړک د غاړي د غاښونو ډاکټران
په هندوستان کې اوس هم د سړک د غاړې د غاښونو ډاکټران شته. خو د منځني قشر د ودې له کبله د هغوی فعالیت له گواښ سره مخامخ دی. په ځانگړې توگه په لویو ښارونو کې ډیر مشتریان د پاکو او ښو صحي خدماتو غوښتنه کوي..
انځور: Getty Images/AFP/M. Kiran۱۴ کاله تر مخه الله بخش، له خپل ورور او وراره سره په گډه په بنگلور کې د سرویسونو تمځای ته څیرمه تر شنه آسمان لاندې د غاښونو کلینک پرانیست. هغه په ورځ کې په اوسط ډول شل ناروغان تداوي کوي.
الله بخش وایي چې «بې وزله خلک هم د ښو غاښونو درلودلو حق لري.» د غاښونو د ډاکټرانو رسمي اتحادیه وایي چې د بې وزلو خلکو له پاره د راجستر شوو ډاکټرانو د معالجې لگښت ډیر ناڅیزه دی او له همدې کبله «غیر قانوني» ډاکترانو ته اړتیا نه لیدل کیږي.
نوي مصنوعي غاښونه په هندوستان او چین کې جوړیږي. لکه په انځور کې چې لیدل کیږي د دغه سړي د لاندینۍ او پاسنې ژامې لگښت ۱۰ یورو کیږي او څلور کاله باید دوام وکړي.
د غاښونو په دغو کلینکونو کې هر ډول مصنوعي ژامې او انفرادي غاښونه موجود دي او بیلا بیل قیمتونه لري. د یوه غاښ قیمت له یوې یورو څخه لږ دی. خو لکه د نوي ډهلي په شان ښار کې د منځني قشر له ودې سره چې د غاښونو د صحي درملنې غوښتنه کوي، د سړک د غاړی کلینکونو کاروبار له ستونزو سره مخامخ کړی دی.
د الله بخش، زوی پاشا یوه نوې ژامه چمتو کوي. د خپل پلار په شان هغه د غاښونو د ډاکټر په توگه کومه تخصصي روزنه نه ده لیدلې. په ۱۹۴۸م کال کې په دې هکله په هند کې تصویب شوی قانون د الله بخش په شان د سړک د غاړې ډاکټرانو ته لاره اواره کړې چې خپل دغه «طبابت» ته دوام ورکړي.
له دې سره سره چې په هندوستان کې هر کال ۳۰ زره د غاښونو ډاکټران خپلې زده کړې سر ته رسوي، خو د دغه هیواد په ښارونو کې د غاښونو د ډاکټرانو کمبود شته او په متوسطه توگه د هرو لسو زرو کسانو له پاره یو ډاکټر موجود وي. په لیرې پرتو سیمو کې خو آن د ۲۵ زرو کسانو له پاره یو ډاکټر وي. نو له دې کبله د الله بخش په څیر د سړک د غاړې د ډاکټرانو د کاروبار د پای ته رسولو ورځ لا تر اوسه معلومه نه ده.
د نوي غاښ د کښیودلو وروسته له ناروغ څخه غوښتنه کیږي چې په یوه کلک شي، غاښ ولگوي، تر څو د غاښ کلکوالی وازمویل شي.
