د آلمان د کورنیو چارو وزير هورست زيهوفر غواړي د رد شوو مهاجرو د اخراج له پاره لا سخت قانون تصویب کړي. په دې لړ کې به يو هم په دولتي مرستو کې د کمښت رامنځ ته کول وي.
اعلان
د آلمان د کورنيو چارو وزير هورست زيهوفر د آلمانۍ ورځپانې «پاساور نويه پروسه» سره په مرکه کي ويلي دي چې غواړي په دې اړه د راتلونکي کال په لومړيو کې د آلمان حاکم ائتلافي حکومت ته يو وړانديز وړاندې کړي.
د آلمان د کورنيو چارو وزير وويل: «موږ بايد له ټولو امکاناتو کار واخلو تر څو ردشوي مهاجر بيرته خپلو اصلي هيوادونو ته واستوو، په ځانګړې توګه کله چې هغوی دلته د يو جرم مرتکب ګرځي. که پام کې وي چې يو کس بايد اخراج شي، بايد هغه توقیف کړل شي تر څو د اخراج پر وخت ځان پټ نه کړي.»
د دغو اقداماتو د ترسره کولو له پاره بايد يو قانوني اساس رامنځ ته شي. زيهوفر زياته کړه: «موږ بايد دغې موضوع ته په جدي توګه رسيدګي وکړو. سربيره پر دې باید اجازه ور نه کړو چې د هغو مهاجرو د اخراج مخنيوی وشي کوم چې د خپل هويت په اړه له درواغو او دوکې څخه کار اخلي او وايي چې اسناد يې له لاسه ورکړي دي.»
د هغه په خبره په دې برخه کې د «اقداماتو يوه جامع طرحه ترتيب شوې ده» چې پکښې يو هم په دولتي مرستو کې د کمښت راوستل شامل دي. زيهوفر وايي: «ټول اقدامات به پر دغه اساس ترسره کيږي: هر څوک چې د پناه غوښتنې حق لري، زموږ په هيواد کې به ورڅخه محافظت کيږي. خو هغه اشخاص چې د پناه غوښتنې حق نه لري، بايد دغه هیواد په ډيره چټکۍ بيرته ترک کړي.» د آلمان د کورنيو چارو وزير زياته کړه: «يو قانوني حکومت بايد اجرايې ځواک ولرې.»
زيهوفر وویل چې د آلمان د کورنيو چارو ايالتي وزيران د ده له ملاتړه برخمن دي. هغه زياته کړه: «د بهرنيانو د جرمونو په اړه اسناد بايد په امنيتي او د بهرنيانو د چارو په اړوندو اداو کې يو ځای شي، تر څو وشو کړای له پخوا څخه په لا چټکه توګه هغو بهرنيو مجرمانو ته مو پام اړولی وی چې د اوږدې جرمي سابقي لرونکي دي. همدا ډول به د دغو افرادو له خوا د لا ډيرو جرمونو د ترسره کولو مخنيوی وکړو. موږ د درنو جرمونو په هکله په پرله پسې توګه دا تجربه ترلاسه کړې چې کله جرمونه ثابت شوي، معلومه شوې چې متخلف کس د پوليسو په ادراه کې دوسيه لرلې ده.»
د آلمان د کورنيو چارو وزير يادونه وکړه چې هغه نه غواړي له ټاکلې مودې څخه د مخه له خپلې دندې پر شا شي، ځکه په وينا يې په حاضر وخت کې په هيواد کې د ثبات ساتنه ډيره مهمه ده.
هورست زيهوفر د مهاجرت په قوانينو کې د سختوالي راوستلو په موخه په جولای مياشت کې خپل د «مهاجرت ماسترپلان» معرفي کړی وو. له هغو پلانونو څخه چې په دغه «ماسترپلان» کې شامل دي يو هم پر هغو مهاجرو د دولتي مرستو کمښت او له سخت چلند څخه کار اخيستل دي کوم چې آلمان څخه وتلو ته اړ دي. همدا ډول د اخراج په موخه د ردشوو مهاجرو د توقيف مودې اوږدول هم پکې شامل دي.
په ياد «ماسترپلان» کې په مبدا يا اصلي هيوادونو کې د مهاجرو وضعيت ښه کيدو او ترانزيت ته پاملرنه شوې تر څو د تيښتو او مهاجرتونو مخه نيول شوي وي.
Me, si (epd)
له آرشيف څخه يو انځوريز البوم:
آلمان ـ د افغانانو د اخراج سره مخالفتونه زیات سوي
په آلمان کي د سوسيال ډيموکراټ او زرغون ګوندونو سياستوالو او په همدې شان د بشري د حقونو سازمانونو د دې غوښتنه وکړه چي له آلمان څخه په وتلو مکلف سوي افغان مهاجر دي نور افغانستان ته نه لېږدول کيږي. يو انځوريز راپور:
په دغه ټېل ماټېل او اخ و ډب کي ۹ پوليس ژوبل سول او ۵ کسان په مؤقتي توګه د پوليسو له خوا ونيول سول. د دغې صحنې ويډيو کومه چي پر فيسبوک خپره کړل سوې وه، صرف په څو ساعتونو کي تر يو مليون څخه زيات واري وکتل سوه.
د افغان مهاجرو د اخراج پر ضد په آلمان کی په څو څو ځله احتجاجونه سوي دي. احتجاج کوونکي په دې نظر دي چي افغانستان د بېرته لېږد له پاره خوندي او امن ځای نه دی.
انځور: picture-alliance/dpa/S. Prautsch
د برېمن ښاروال
د آلمان سوسيال ډيموکراټ ګوند سياستوال او د آلمان د برېمن ښاروال کارسټن زيلينګ د فُنکه په نوم د رسنيو ډلې ته ويلي دي چي د کابل وروستی خونړی بريد دا حتمي کوي چي «د المان حکومت بايد د افغانستان د امنيتي وضعي په تړاو پر خپله ارزيابي له سره غور وکړي.»
د آلمان په پارلمان بُنډسټاګ کي د سوسيال ډيموکراټ ګوند د فراکسيون وياند راينر ارنولد غوښتنه کړې چي حد اقل د افغانانو بېرته لېږد دي په مؤقتي توګه ودرول سي. نوموړي په «پاساور نوين پرېسه» نومي ورځپاڼي ته ويلي چي په افغانستان کي انسانان هيڅ چيري امن ژوند نه سي کولای او له همدې کبله دغه هيواد ته د افغانانو بېرته لېږد «مسؤلانه» کار نه دی.
انځور: picture-alliance/dpa/H.Hanschke
اميد نوريپور
د آلمان د زرغون ګوند د بهرنيو چارو سياستوال اميد نوريپور د آلمان پر حکومت تور پوري کړی دی چي ګواګي د افغانستان امنيتي وضعه تر هغه ښه ښيي لکه چي په واقعيت کي ده. نوموړي د «هايلبرونر شټيمه» نومي ورځپاڼي ته د کابل د وروستي بريد په هکله ويلي دي که د آلمان حکومت د افغان مهاجرو د اخراج له کبله د افغانستان د وضعې ښايسته کړل سوې ارزونه بېرته اصلاح نه کړي، نو به دا يو ناوړه کار وي.
انځور: Imago/C. Thiel
پرو ازيول
د مهاجرو د ملاتړ سازمان پرو ازيول غوښتنه کوي چي و افغانستان ته دي د مهاجرو بېرته لېږد په مکمله توګه ودرول سي او دا چي هغه کسان چي د اخراجولو په مقصد په توقيف کي دي، هغوی دي آزاد کړل سي.
انځور: picture-alliance/dpa/S. Stache
توماس ديميزير
خو د المان د کورنیو چارو وزير توماس ديميزير غواړي چي د ټولو تنقيدونو باوجوده د افغانانو د اجراج لړۍ ته ادامه ورکړي. د کورنيو چارو وزير ديميزېر ويل چي د چهارشنبې له پاره پلان سوې اخراجونه يې په دې خاطر ځنډولې ولي چي په کابل کي د آلمان د سفارت کار کوونکي د بريد په ترڅ کي تر دې نور مهم کارونه لري چي د اخراجونو مراقبت وکړي. د ديميزېر په وينا ځنډول سوی ډليز اخراج به وروسته عملي کړل سي.