د سعودي عربستان ولیهد محمد بن سلمان د متحده ایالاتو د ولسمشر دونالد ترمپ د څرګندونو په اړه محتاطانه غبرګون ښودلی. محمد بن سلمان ویلي چې د ریاض حکومت له امریکا سره د اړیکو له پيل راهیسې د پیرل شویو وسلو قیمت ادا کړې دی.
انځور: Reuters/J. Ernst
اعلان
تیره اوونۍ د امریکا ولسمشر دونالد ترمپ ویلي وو چې د سعودي عربستان واکمنان بې د امریکا له نظامي مرستو څخه دوه اونۍ هم په قدرت کې نه شي پاتې کیدلی، نو له دې امله سعودي عربستان باید د دې حفاظت په بدل کې امریکا ته پيسې ورکړي.
د سعودي عربستان ولیعهد محمد بن سلمان تیره شپه له بلومبرګ رسنۍ سره په مرکه کې د امریکا او سعودي ترمنځ اړیکو کې د کوم ممکنه درز شتون په ظاهره کې بې ارزښته ښکاره کړ او ويې ویل چې د دواړو هیوادونو اړیکي ډیرې مستحکمې دي.
محمد بن سلمان وویل: «دا حقیقت باید ومنل شي چې هر دوست به ښې خبرې هم کوي او بدې هم. تاسې دا توقع نه شئ کولی چې یو دوست دې تل ستاسې په هکله سل په سلو کې ښې خبرې وکړي. د دوستانو تر منځ غلط فهمیانې هم وي، نو له همدې امله دغه څرګندونې موږ همداسې په خپل ځای پریږدو».
د سعودي ولیعهد دا هم وویل چې د اوباما د واکمنۍ پر مهال امریکا په سیمه کې د سعودي عربستان د ګټو ضد کار وکړ، خو اوس به دوی د ترمپ له حکومت سره په ګډه په سیمه کې د ایران د نفوذ مخه ونیسي.
سعودي عربستان په نړۍ کې د تیلو تر ټولو ستر تولیدونکی هیواد دی. محمد بن سلمان تیره ورځ په یوه مرکه کې ویلي وو چې ریاض له واشنګټن سره ژمنه کړې وه چې پر تهران د بندیزونو تر لګولو وروسته به په نړیواله کچه د تیلو د اړتیا پوره کولو په برخه کې خپل رول ولوبوي او خپله ژمنه یې پوره کړې ده.
په دې اړه زموږ له آرشیف څخه انځوریز رپوټ:
«ابو ايوانکا» په سعودي عربستان کي
د امريکا د متحده ايالاتو ولسمشر دونلد ترمپ د ولسمشر کېدو وروسته و بهر ته لومړی سفر دی. دا چي هغه لومړی سعودي عربستان ته ورځي، د دواړو اړخونو له خوا يو سمبوليک او مهم اقدام بلل کيږي.
انځور: picture alliance/dpa/E.Vucci
لومړی په رياض کي
دونلد ترمپ د ولسمشر په توګه خپل لومړی سفر و سعودي ته وکړ. په رياض کي د هغه د ښه راغلاست له پاره ځانګړي مراسم نيول سوي ول.
انځور: Reuters
۹ ورځي سفرونه
دونلد ترمپ به ۹ ورځي پرله پسې و سعودي عربستان، اسرائيل، واټيکان او وروسته د ناټو غونډي ته سفر وکړي. په دغه سفرونو کي به هغه د زياتو دپلوماتيکو ننګونو په هکله جواب ويلو ته اړ وي.
انځور: picture alliance/AP Photo/E.Vucci
د مېرمني سره
د ترمپ مېرمنه ميلانيا ترمپ هم د هغه سره په دغه سفر کي ملګرې ده.
انځور: picture alliance/AP Photo/E.Vucci
د شاه سلمان له خوا ښه راغلاست
د ترمپ د ښه راغلاست له پاره پخپله د سعودي عربستان پاچا شاه سلمان د خپلو لوړپوړو دولتي چارواکو سره حاضر سوی ؤ.
انځور: Reuters/J.Ernst
ستړې مه شې
شاه سلمان د دونلد ترمپ د الوتکي ځينو ته نژدې د ښه راغلاست له پاره ورغلی ؤ.
انځور: Reuters/J.Ernst
لومړی روغبړ
کله چي دونلد ترمپ د خپلې مېرمني ميلانيا سره له الوتکې راکښته سو نو شاه سلمان هغه ته د ستړې مه شې لاس ورکړ او وروسته يې د ميلانيا سره هم د لاس روغبړ وکړ. دا لومړی ځل دی چي دغه دوه مشران په مستقيمه توګه سره ويني.
انځور: Reuters/J.Ernst
مهم موضوعات
يو شمېر عربي ژبو رسنيو و سعودي عربستان ته د دونلد ترمپ لومړی سفر ډېر مهم بللی دی. بعضو دغو رسنيو په خپلو مطالبو کي هغه ته «ابو ايوانکا» يا د ايوانکا د پلار خطاب هم کړی دی. نوموړی به په سعودي کي پر مهمو موضوعاتو خبري وکړي.
انځور: Reuters/B. Algaloud
ترهګري
په پام کي نيول سوې چي دونلد ترمپ به د سعودي عربستان د دولت سره د ترهګرۍ په تړاو تفاهم ليک امضا کړي.
انځور: Reuters/J.Ernst
اقتصادي تړونونه
سعودي عربستان د امريکايي وسله جوړونکو شرکتونو تر ټولو مهم خريدار هيواد بلل کيږي. اټکل کيږي چي دغه موضوع به هم و سعودي ته د ترمپ د سفر له اجندا څخه يوه وي.
انځور: Reuters/J.Ernst
د عربي هيوادونو ټلواله
بعضو رسنيو داسي راپورونه خپاره کړي چي ترمپ غواړي د عربي هيوادونو يو ټلواله رامنځ ته سي تر څو امريکا يې د ايران پر ضد په سيمه کي تقويه کړلای سي.
انځور: picture alliance/AP Photo/E.Vucci
بهرنی سياست
په داسي حال کي چي دونلد ترمپ په کورني سياست کي د يو شمېر ننګونو او لانجو سره مخامخ دی، کتونکي اټکل کوي چي ښايي هغه اوس غواړي د بهرني سياست له لاري لاس ته راوړنې ولري.
انځور: Reuters/Saudi Royal Court
اسرائيل
اسرائيل به د دونلد ترمپ د سفرونو په لړۍ کي دويم مقام وي. په داسي حال کي چي هغه د ولسمشرۍ له پاره د کانديدۍ په وخت د منځني ختيځ په هکله خبري نه کولې، اوس غواړي هلته د سولي خبرو اترو ته د لاره هوارولو هڅه وکړي. دغه موضوع به د سعودي عربستان سره هم مطرح کيږي.
