د رویټرز خبرې آژانس د رپوټ پر بنسټ د امریکا او روسیې د بهرنیو چارو وزیرانو جان کېري او سرګېلاوروف د جمعې په ماښام(د سپټمبر میاشتې۳۰) تلیفونې خبرې وکړې، خو د کېري په خبره کومه په زړه پورې لاسته راوړنه یې نه درلوده.
ټاکل شوې ده چې د دواړو خواو تر منځ اړیکې دوام پيدا کړي، البته د خبرو اترو د قطع کیدو ویره هم موجوده ده. امریکا متحده ایالاتو د پنجشنبې په ورځ روسیې ته ګواښ کړی وو چې د سوریې په ارتباط به له دغه هیواد سره خپلې دیپلوماتیکې اړیکې وشلوي.
رویټرز د روسیې د بهرنیو چارو وزیر په حواله رپوټ ورکړی دی چې ماسکو په حلب کې د وضعیت د عادي کیدو له پاره د ګامونو پورته کولو په فکر کې دی.
لاوروف په عین وخت کې امریکا په ضمني توګه تورنه کړه چې له خپل سیاست او دریځ سره په سوریه کې جګړې او شخړې ته لمن وهي، دا ځکه چې دوی «د منځلاري یاغیانو او ترهګرو ډلو تر منځ توپير ته نه قائل کیږي.»
شاوخوا یوه نیمه اونۍ مخکې په سوریه کې اوبند د ماتې سره مخامخ شو او د جګړې د اور لمبو یو وار بیا په دغه هیواد کې زور واخیست. د امریکا په مشرۍ پوځي ائتلاف په تیروتنې سره د سوریايې پوځ مرکزونه د یوه هوایې برید په ترځ کې په نښه کړي ول.
د اوربند له پای ته رسیدو سره سم د سوریې پوځ د روسیې د هوایې ځواکونو په ملاتړ د حلب ښار د نیولو له پاره پراخ عملیات پيل کړي ول.
د یوه مرستندویه کاروان څو لارۍ چې ټاکل شوی وه د حلب جګړه ځپلو سیمو ته مرستې ورسوي بمباري شوې. امریکا په دې برخه کې روسیه او د سوریې حکومت تورن کړ چې د دې برید امر یې ورکړی دی. خو ماسکو دغه تورونه ردوي.
د ملګرو ملتونو سازمان مشر بان کي مون د جمعې په ورځ اعلان وکړ چې یوه داخلي شورا به پر مرستندویه کاروان د برید دوسیه وڅیړي، ترڅو د دغه بريد جزویات روښانه شي.
د اوربند د پریکړه لیک مسودې له پاره تازه هڅې
بل لور ته د نړۍ پنځو هیوادونو چې د ملګرو ملتونو د امنیت د شورا دایمي غړي او د ویتو له حق څخه برخمن دي د جمعې په ورځ په حلب کې د اوربند د یوه پریکړه لیک د مسودې له باره سلا مشورې وکړې. د دغه پریکړه لیک د مسودې متن د فرانسې له خوا وړاندي شو.
د فرانسې خبري آژانس، د دیپلوماتیکو کړیو په حواله خبر ورکړی دی چې د دغه پریکړه لیک د مسودې متن به په راتلونکو ورځو کې د کارپوهانو له خوا تر بحث او بررسۍ لاندی ونيول شي.
د دغه پریکړه لیک هدف په سوریه کې یو وار بیا د اوربند رامنځته کیدل دي، تر څو د حلب جګړه ځپلو سیمو ته بشري مرستې ورسول شي. د نوموړي دیپلومات په خبره فرانسه به دغه طرحه د دوشنبې په ورځ د ملګرو ملتونو د امنيت شورا ټولو غړو ته وړاندي کړي.
پر ورته موضوع زموږ له آرشیف څخه انڅوریز البوم:
په حلب کې ویجاړۍ او ورځنی ژوند
حلب د سوریې ستر اقتصادي ښار وو. خو نن دا یوه ویجاړه دښته ده. د سوریې د حکومتي ځواکونو او یاغیانو ترمنځ نښتو دلته خپلې نخښې پريښي دي. د یوه کلابند ښار ویجاړۍ او ورځنی ژوند په دې انځورونو کې کتلای شئ.
انځور: picture-alliance/dpa/WYD Krakow2016په داسي حال کې چې د ښار یوه برخه د ولسمشر بشارالاسد څواکونو په لاس کې ده، له بلې برخې څخه یې یاغیان دفاع کوي. دواړي برخي سختې زیانمنې شوي لکه دغه د بني زید سیمه.
ځينې کوڅې او محلونه په بشپړه توګه لوټي شوي دي. مرستندویان تر هر برید وروسته د قربانیانو لټه کوي.
ژغورونکې عمله په کار بوخته ده
د یاغیانو په دې سیمه کې د اسد ځواکونو تر بریدونو وروسته د درنو ماشینونو په مرسته د ملبې د ټولو کار روان دی.
د یاغیانو سیمې ته د اسد ځواکونو د داخلیدو د مخنیوي په موخه له هري وسیلې کار اخیستل کیږي. په دې انځور کې لیدل کیږي چې په مشهد سیمه کې ټایرونو ته اور ورته کړل شوی څو برید ګر څه ونه لیدلای شي.
چا چې کور له لاسه ورکړی باید ځانته یوه بله سرپنا پيدا کړي. خلک نه یوازې په خیمو کې اوسي، بلکې د ویجاړو شویو موټرو څخه هم د سرپنا په توګه کار اخیستل کیږي.
د سوریې حکومت د یاغیانو په ولکه کي سیمې پر اوسیدونکو د سیمې څخه د وتلو غږ کړی. دوی باید د ښار په شمال کې دغه کورونو ته پنا یوسي.
مسجدونه هم لکه دلته د قمر الحمرا د ناحیې د عمر بن حطاب مسجد هم له څو کلونو راهيسي له کورنۍ جګړې خوندي نه دی پاته.
جګړه د شپې له خوا هم روانه وي.سرې لمبې آسمان ته پورته کیږي. دا ځل د حکومتي ځواکونو د وسلې یو ډیپو په نخښه شوې.
د ویجاړیو په منځ کې باغچه
د ټولو ویجاړیو ترڅنګ انسانان باید د خپلې خیټې غم هم وخوري. عبدالله الختموي په یوه کوچنۍ ټوټه ځمکه ترکاري کرلې او په دې توګه په قسمي توګه ځان ته خواړه برابروي.
د وچې ډوډۍ د ترلاسه کولو له پاره هم بايد زیاتره وخت خلک په اوږدو کتارونو کې ودریریږي. لکه دلته د حلب په شمالي برخه کې یعني د یاغیانو تر کنترول لاندې سیمه.
د یو څو شیبو له پاره جنګ هیرول
د لوبو په دې ځای کې د حلب د ورځني ژوند یعني جګړو څخه د ماشومانو پام د یو څو شیبو له پاره اوښتې دی. د لوبو دا ځای د جولای میاشتي په سر کې په اتارب ناحیه کې جوړ کړل شو.
په حلب کې داسې صحنې هم لیدل کیږي: د یاغیانو د سیمې ماشومان په کوڅو کې له پلاستکي توپکچو سره لوبې کوي.
ټول ځایونه لا وران نه دي. د سانته ماتلده دغه کلیسا تر اوسه په امان ده. دلته په سونو ځوانانو همدا څو ورځې تر مخه د ځوانانو نړیواله ورځ ولمانځله.
