په آسترالیا کې د ځنګلونو شدیدو اورونه ډېر زیانونه اړولي دي. دغه اورونه د آسترالیا په تاریخ کې د ځنګلونو تر ټولو بد او پراخ اورونه بلل شوي دي چې له کبله یې شاوخوا ۱۴۰۰ کورونه سوځیدلي، زرګونه تنه نور د خپلو کورونو او سیمو ترک کولو ته اړ شوي او لږ تر لږه ۱۷ تنو پکې خپل ژوند له لاسه ورکړی دی.

د آسترالیا په نیو ساوت ویلز کې د چارم هاون په سیمه کې د اور وژنې عمله د اور د قابو کولو په هڅه کې ده. د تیر کال د دسمبر په ۳۰مه نیټه په نیو ساوت ویلز ایالت کې اورونو سلګونه جایدادونه ویجاړ کړل او تلفات یې هم واړول. د شدید باد په نتیجه کې د اور وژنې د یوه موټر د چپه کیدو له کبله د اور وژنې د عملې یوه کارمند خپل ژوند له لاسه ورکړ او درې تنه نور یې ټپیان شول.

د آسترالیا د ویکتوریا ایالت په مالاکوټا کې یو شخص د ځنګلونو د اورونو سیمې ته نیږدې مجهز ولاړ دی او د شدیدو اورونو له کبله ان آسمان خپل رنګ ته تغيیر ورکړی دی. د آسترالیا په دغه ساحلي ښار کې د نوي عیسوي کال په شپو او ورځو کې زرګونو کسانو ته د خپلو سیمو د پرېښودو امر شوی وو. له اورونو څخه د ځان ساتلو په موخه، شاوخوا ۴۰۰۰ کسانو د نوي کال شپه د ساحل په څنډو کې تر آسمان لاندې تیره کړه.

د آسترالیا د سیډنې ښار شمال لویديځ ته د کولو هسکو سيمې ته نیږدې د ګوسپرز پر غرونو باندې د اور وژونکو مواد لیږدونکې یوه الوتکه پر اورونو باندې خاص مواد پاشي. تر اوسه پورې د دغې سیمې شاوخوا ۶۴ زره هکتاره ځنګلونه د اور په لمبو کې ایرې شوي دي.

د دسمبر په ۲۱مه نیټه د آسترالیا د سیډنې ستر ښار په څنډو کې پروت د بارګو په ښارګوټي کې یو سوځیدلی بایسکل د یوه سوځیدلي کور مخې ته پروت دی. دغه ښار هم شدیدو اورونو سخت ځپلي دی او د سیمې ګڼ شمیر کورونه یې په ایرو بدل کړل.

د تیرکال په نومبر میاشت کې شدیدو اورونو د آسترالیا ولیمي ملي پارک هم زیانمن کړ او له دې اورونو تښتیدلې یوه کانګرو اوس د خوراک په لټ کې ده. د دغو اورونو او شدیدو لوګيو له کبله نه یوازې د انسانانو روغتیا له ګواښونو سره مخ ده بلکې ګڼ شمیر څاروي هم د ناروغیدو له ګواښ سره مخ دي.