د اوروگوای استازي چې اوس د ملگرو ملتونو د امنیت شورا دوره یي مشري پر غاړه لري ویلي دي چې شورا د سه شنبې په ورځ یوه غونډه کوي. دغه غونډه د شمالي کوریا د توغندی د نوي آزمويني په تړاو تر سره کیږي.
شمالي کوریا په دوو اوونیو کې د یوه بل بالستیک توغندی ازموینه وکړه. د ورکړل شوو رپوټونو له مخې توغندی تر۷۰۰ کیلومترو واټن وهلی وروسته د روسیې له پولې ۵۰۰ کیلومتره وړاندي په سمندري کې لگیدلی دی.
داسې ویل کیږي چې د شمالي کوریا د توغندي نوې ازموینه د امریکا متحدو ایالاتو پر وړاندي د خبرداري په توگه انگیرل کیږي. د سویلي کوریا خبري آژانس یونهاپ، ویلي دي چې د شمالي کوریا دولتي خبري آژانس کې سي ان اې، د دغه هیواد د واکمن کیم جونگ اون، له قوله ویلي دي چې امريکا باید واقعیت له پامه و نه غورځوي. هغه ویلي دي چې د امریکا وچه په پاسفیک کې د امریکا ماموریتي ساحې د دوی د توغندیو تر برید لاندې راتلی شي او په وینا یې د غچ اخیستنې له پاره ټول وسایل لري.
په سویلي کوریا کې د مون جای ان، د ولسمشرۍ د دورې له پیلیدو راهیسې دا د شمالي کوریا لومړنۍ ازموینه وه. د سویلي کوریا د معلوماتو له مخې دغه توغندی د گاونډي هیواد په شمال لویدیځ کې پروت له کوسونگ څخه توغول شوی دی.
په پاسفیک کې د امريکا متحدو ايالاتو د قوماندې مرکز د توغندي توغول تائید کړي دي. خو د هغوی په خبره ښایي دا د کوم لیري واټن ویشتونکی توغندی نه وي.
چین چې د شمالي کوریا له کمو شریکانو څخه یو دی د آرامه پاتېدو غږ کړی او متحدو ایالاتو د موجودو بندیزونو د لا سختولو غوښتنه کړې ده. په ملگرو ملتونو کې د امريکا استازې نیکي هیلې، د ټویټر په خپل لنډ پیغام کې لیکلي دي چې «داسې کومې بهانه نه شته چې د شمالي کوریا کړنې توجیه کاندې. دا خطر ریښتنی دی.»
ناټو هم د شمالي کوریا د توغندیو پروگرام ته په انديښنې سره گوري. د ناټو یوې ویاندې ویلي دي چې دا د ملگرو ملتونو د امنیت شورا له پریکړه لیکونو څخه ښکاره سرغړونه ده. د دغې ویاندې په وینا د توغندیو ازموینه د «نړیوالې سولې له پاره یو گواښ دی.»
په عین وخت کې شمالي کوریا ادعا کړې ده چې د یکشنبې ورځې د توغندي ازموینه د توغندیو نوې بڼه ده چې اتومي سرگلولې هم انتقالولی شي. خو د چارو پوهان وایي چې د شمالي کوریا توغندي ښایي تر۴۰۰۰ کیلومتره واټن ووهلي شي او په گاونډ کې پراته سویلي کوریا او جاپان په نخښه کړی شي، خو د متحدو ایالاتو وچې ته نه شي رسیدای.
زموږ له ارشيف څخه:
د شمالي کوريا پوځي تمرينونه او په دغه ټاپو وزمه کي کړکېچ
امريکا په جنوبي کوريا کي دفاعي سيستم نصبوي. په عين حال کي د کوريا په اوبو کي د امريکا د اټومي اوبتل د ځای پر ځای کولو خبره کيږه. شمالي کوريا بيا خپل پوځي قدرت نندارې ته وړاندي کړی.
انځور: Reuters/D. Sagoljامريکا په جنوبي کوريا کي د «تاد» په نوم توغنديو دفاعي سيستم نصبول پيل کړل. دغه اقدام نه يوازي د سولي د پلويانو له غبرگون سره مخامخ سوی، بلکي روسيې او چين هم غبرگون ښوولی دی.
په دې انځور کي د توغنديو دفاعي سيستم آزموينه ښوول کيږي. د دغي آزمويني ځای او وخت روښانه سوی نه دی.
شمالي کوريا په تيرو اوونيو کي د کيم ايل سونگ د زېږېدو د ورځي او پوځ د تاسيس په وياړ ستر پوځي پريډونه وښوول او پوځي تمرينونه پيل کړي دي. دغو هڅو ته د شمالي کوريا د پوځي قدرت ښوولو په سترگه کتل کيږي.
د شمالي کوريا د پوځ له جوړښته ۸۵کاله تيريږي. دوی دغه ورځ په پوځي پرېډونو ولمانځله. جنوبي کوريا او امريکا متحدو ايالاتو بيا گډ پوځي تمرينونه پيل کړي دي.
د پوځ د تاسيس په ورځ د کيم ايل سونگ او کيم يونگ ايل مجسمو ته پوځي پرېډ.
د شمالي کوريا ښځي په دغه شان ورځو کي ميدان ته راوځي او ژاړي. دا ځل دوی د شمالي کوريا د بنسټ ايښوونکي کيم ايل سونگ د زېږېدو د ورځي په وياړ راوتلي او ژاړي.
د شمالي کوريا د تاسيس ورځ.
د کيم ايل سونگ د زېږېدو د ورځي په وياړ پوځي پرېډ.
شمالي کوريا گواښ کړی دی چي د توغنديو آزموينو ته به دوام ورکړي. امريکا ويلي دي چي د صبر کاسه ئې نوره ډکه سوې ده او روسيې په کوريا ټاپو وزمه کي د کړکېچ له ډېرښت څخه خبرداری ورکړی دی.
د شمالي کوريا د توغنديو نوي آزامويني يو روښانه پيام لاره، هغه دا چي د دغه هیواد رهبران په لوی لاس غواړي چي کړکېچ ته لمن ووهي.
د کيم ايل سونگ د زېږېدو د ورځي په وياړ د ښځو پوځيانو پرېډ.
د شمالي کوريا د دولت او پوځ پيام يو دی. دوی دواړه د خپلو رهبرانو فرمانونو ته غاړه ږدي.
د کيم ايل سونگ د زېږېدو ورځ ئې د «لمر ورځ» نومولې ده. د هغه د زېږېدو په ورځ پوځ اسمان ته گوري.
د کيم ايل سونگ د زېږېدو په ورځ شمالي کوريا بيا د توغنديو آزموينه وکړه. دې ته امريکا غبرگون وښود او دغه ټاپو وزمه ته ئې الوتکي وړونکي بېړۍ ولېږلې. شمالي کوريا به د خپل پوځي قدرت د ښوولو له پاره پوځي تمرينونه پيل کړل.
معمولاً له شمالي کوريا څخه ډېر لږ انځورونه رسنيو ته رسيږي. خو کله چي د توغنديو ازموينه، پوځي تمرينونه يا د پوځ قدرت نندارې ته وړاندي کوي رسنيو ته ئې انځورونه په اختيار کي ورکوي څو خپل ځواک گاونډیانو ته وښيي.
