د جنوبي کوریا د معلوماتو پر اساس د شمالي کوریا واکمن کيم جونگ اون مرستیال لومړی وزیر کيم یونګ جن، اعدام کړی دی. په سیول کې د فاع وزارت یوه ویاند وویل چې د ښووني او روزني د برخي مسئول کيم یونګ جن، په جولای میاشت کې په ډزو وژل شوی دی.
د جنوبي کوریا د یونهاب خبري آژانس په حواله نوموړی ۶۳ «په انقلاب ضد چلند» تورن شوی وو. ویل شوي دي چې نوموړی په یوه رسمي غونډه کې لکه یو عسکر نه وو دریدلی.
د شمالي کوریا حکومت تر اوسه د نوموړي د اعدام خبر نه دی تائيد کړی.
تر «اعدام» وروسته ژوندی لیدل شوی
د جنوبي کوریا د استخباراتي ادارو په حواله په۲۰۱۱م کال کې د کيم جونګ اون، واک ته تر رسیدو وروسته ډېر لوړپوړي چارواکي د سیاسي «تصفیې» قرباني شوي دي.
د ۲۰۱۳م کال په پای کې کيم د خپلې کورنۍ یو غړی یانګ سونک تایک، د خیانت په تور اعدام کړ. همدا پرون، سه شنبه رسنیو رپوټونه ورکړي چې په روانه میاشت کې ښايي دوه لوړ پوړو چارواکو کيم جونګ اون ته د بې احترامۍ کولو له امله خپل سرونه بایللي وي.
خو کله کله د جنوبي کوریا له خوا په شمالي کوریا کې د لوړ پوړو چارواکو د اعدام په اړه ورکړل شوي خبرونه د وخت په تیریدو سره ناسم ثابتیږي. یو مثال یې د پوځ پخوانې مشر ري یونګ ګِل، چې احتمالا په فیبرورۍ میاشت کې اعدام شوی وو، دی درې میاشتې ورووسته روغ رمټ ولیدل شو.
په اوس وخت کې د نړۍ ۹ هیوادونه ۱۶۳۰۰ اتوم بمونه لري. د اتمې وسلو په برخه کې د محدودیت راوستلو له غوښتنو سره سره په دې شمیر کې کموالې نه دی راغلې. په دې انځوریز رپوټ کې به ولیدل شي چې کوم هیواد څومره اتوم بمونه لري.
انځور: Reutersپه ستاکهولم کې د سولې د بین المللي تحقیقاتي موسسې( سِپري) په خبره د اتومي وسلو د شمیر په برخه کې روسیه تر ټولو مخکې ده. پخواني شوروي اتحاد د لومړي ځل له پاره په ۱۹۴۹ کال کې د اټومي وسلو ازمیښت ترسره کړی وو. روسيه په اوس وخت کې ۸۰۰۰ اتومي وسلي لري.
امریکا متحده ایالاتو په ۱۹۴۵ کال کې تر خپل لومړني اټومي ازمیښت لږ وخت وروسته د جاپان پر هیروشیما او ناگاساکي ښارونو باندی اټوم بمونه وغورځول. د سپري په حواله امریکا اوس هم ۷۳۰۰ اتوم بمونه لري.
فرانسه په اروپا کې تر ټولو ډیرې اتومي وسلې لري. د دغو وسلو شمیر ۳۰۰ ښودل شوې دی. فرانسې په ۱۹۶۰ کال کې د اټوم بم جوړولو ټکنالوژي ترلاسه کړی وه.
د آسیا تر ټولو لوې اقتصادي قدرت او د نړۍ تر ټولو لوې د وچې پوځ درلودونکې هیواد چین د پوځ شمیر په هکله دقیق ارقام نه دي ورکړل شوي. اټکل کیږي چې چین ۲۵۰ اټوم بمونه لري. چین په ۱۹۶۴ کال کې خپل لومړنې اټومي ازمیښت ترسره کړی وو.
د ملگرو ملتونو د امنیت شورا دایمي غړي بریتانیې په ۱۹۵۲ کال کې خپل لومړنې اټومي ازمیښت ترسره کړی وو. د امریکا له نږدې متحد هیواد بریتانیې سره اوس وخت ۲۲۵ اټومي وسلې موجودې دي.
پاکستان د ۱۰۰ او ۱۲۰ تر منځ اتومي وسلو درلودونکې دی. کله چې پاکستان په ۱۹۹۸ کال کې اټوم بم جوړ کړ تر هغه وروسته د پاکستان او هند تر منځ کومه جگړه نه ده رامنځته شوې. مخکې تر دې د هند او پاکستان تر منځ دری جنگونه ترسره شوې دي. که څه هم پاکستان وایې چې د دوی اټومي وسلې د دفاعي مقاصدو له پاره دي، خو څارونکي ویره لري که د دغو دواړو هیوادونو تر منځ جگړه رامنځته شي، نو کیدای شي پر یوې اټومي جگړې واوړي.
په ۱۹۷۴ کال کې د لومړي ځل او په ۱۹۹۸ کال کې د دویم ځل له پاره د اټومي وسلو ازمیښت ترسره کونکی هیواد هندوستان له ۹۰ څخه تر ۱۱۰ پورې اوټوم بمونه لري. له چین او پاکستان سره د سرحدي پولو پر سر د شخړې سربیره هندوستان ژمنه کړی چې دغه هیواد به د اتوم بم د کارونې په برخه کې هیڅ کله هم لومړيتوب ونه کړي.
له ۱۹۴۸ څخه تر۱۹۷۳ کاله پورې له عربي هیوادونو سره دری واره جنگیدلې هیواد اسرائيل ۸۰ اټومي وسلې لري. د اسرائیلو د اټومي پروگرامو په برخه کې ډیر لږ معلومات موجود دي.
د اټکلونو له مخې شمالي کوریا لږ ترلږه ۶ اټومي بمونه لري. که څه هم شمالي کوریا له جنوبي کوریا سره شخړه لري، خو د دغه هیواد اټومي پروگرامونو لویدیځ هیوادونه هم اندیښمن کړي دي. د ملگرو ملتونو له خوا د لگول شوو بندیزونو سربیره هم دغه کمونستي هیواد په ۲۰۰۶ کال کې د اټومي وسلو ازمیښت ترسره کړ.
