د فرانسې د جزأ محکمې د دغه هیواد پخوانی صدراعظم، فرانسوا فیون د خپلي کورنۍ غړو ته د«ساختګي شغل د جوړولو» په تور په ۵ کاله بند او نقدي جریمې محکوم کړ. هغه ددغه جعلي شغل په خاطر کلونه کلونه دولتي معاش ترلاسه کاوه.
انځور: Getty Images/B. Guay
اعلان
د فرانسې د جمهوري غوښتونکو د حزب دغه ښئ اړخي سیاستمدار، چي ځان یې یووار جمهوري ریاست ته هم کاندید کړی ؤ، تیره دوشنبه (دجون میاشتي ۲۹ مه) په پاریس کي د جزأ د محکمې لخوا په ۵ کاله بند سو. پرهغه باندي تور لګیدلی دی، چي د خپلي ښځی لپاره یې ساختګي شغل رامنځته کړی وو او د هغې لاري یې دولتي معاش تر لاس کاوه.
محکمې اوس د فیون لپاره دوه کاله قطعي او درې کاله تعلیقي بند تعین کړ. دی باید ۳۷۵۰۰۰ یورو نقدي جریمه هم ورکړي. سربیره پردې هغه د ۱۰ کلو دپاره د هرډول دولتي دندې د اخیستلو څخه محروم سو.
فیون د ۲۰۰۷ څخه تر ۲۰۱۲ م کال پوري د جمهورریس نیکولا سرکوزي د رياست جمهورۍ پر مهال د فرانسې صدراعظم ؤ. هغه نه یوازي د خپلي ماندینې، بلکه د خپل ځای ناستي، مارک ژولود لپاره هم د فرانسې په پارلمان کي کار پیدا کړی ؤ. د پاریس د جزأ د محکمې د قاضیانو په خبره د دغو «شرم اوره» اعمالو په دلیل د ژولود پر ضد هم د تعلیقي بند حکم صادر سوی دی.
قاضیانو همدارنګه ویلي دي، چي د فیون د ښځي، پنه لوپه فیون کار د هغې د معاش متناسب نه ؤ. هغې اکثرأ یوازي خطونه لیږله او د پارلمان د اسیستانتي په حیث یې معاش تر لاسه کاوه. خو دوی دواړو په تکرار سره دغه تورونه رد کړي دي. د محکمې ددغه حکم تر اعلان وروسته، فیون اعلان کړی دی، چي ددې حکم پرضد به د استیناف غوښتنه وکړي.
د فامیل لپاره د ساختګي شغل ایجادول د ۲۰۱۷ م کال د جمهوري ریاست تر انتخاباتو لږ دمخه افشأ سو. فیون چي اوس ۶۶ کلن دی، پر خپلي ماندینې سربیره خپلو اولادونو ته هم په پارلمان کي د کار زمینه مساعده کړې وه.
ددغي موضوع افشأ کیدل په فرانسه کي «سیاسي زلزله» رامنځته او ټوله فرانسه یې سره ولړزوله. دغه تور بلاخره په انتخاباتو کي د هغه د ناکامۍ سبب هم سو. دا هم پداسي حال کي ده، چي فیون د انتخباتي مبارزې پر مهال په ولس کي ډیر محبوبیت په لاس راوړی ؤ. برعکس د د ه ناکامي ایمانوييل ماکرون ته په انتخاباتو کی د کامیابه کیدو زمینه برابره کړه او دجمهوري ریاست مقام ته یې ورساوه.
زموږ له آرشيف څخه:
د نړۍ هغه سیاستوال چې په بوټونو ویشتل شوي دي
له څه مودي راهیسې د ځينو هیوادونو پر ولسمشرانو او سیاستوالو د بوټ غورځولو دود پراخ شوی دی. خو تر ټولو مشهور بیا د امریکا د پخواني ولسمشر جورج بوش دا وو. دا ډول پیښې په یوه انځوریز پوټ کې وگورئ.
انځور: AP
جورج ډبلیو بوش
د امریکا متحدو ایالاتو پخوانی ولسمشر جورج ډبلیو بوش په ۲۰۰۸م کال کې له عراق څخه د لیدنې پر مهال په بوټ وویشتل شو. دغه بوټ د یوه عراقي خبریال منتظر الزیدي له خوا د بوش پر لور وغورځول شو.
انځور: AP
د چين پخوانی لومړی وزیر
د ۲۰۰۹م کال په فبروري میاشت کې په لندن کې یوه آلماني تبع مارتين ژانکي، د چين د هغه وخت پر لومړي وزیر وین جیا باؤ، د بوټ ګزار وکړ. که څه هم بوټ پر جیا باو، ونه لګید، خو هغه ته نږدې ولوید.
انځور: Getty Images
د ایران پخوانې ولسمشر
د ایران په لویدیځ اذربایجان ولایت کې په ارومیه ښار کې پر پخواني ولسمشر محمود احمدي نژاد د بوټونو کزار شوی وو. دغه پيښه د ۲۰۰۹م کال د مارچ میاشتې پر ۶ نیټه رامنځته شوې وه. احمدي نژاد په ۲۰۰۶م کال کې هم د تهران له یوه مشهور پوهنتون څخه د لیدنې پر مهال له ورته عمل سره مخامخ شوی وو.
انځور: fardanews
د هند پخوانی لومړی وزیر
د ۲۰۰۹م کال د اکتوبر میاشتې پر ۲۶ نېته په احمد آباد ښار کې د ټاکنیز کمپاین پر مهال یوه ځوان د کانګرس ګوند پر مشر او د هغه وخت لومړي وزیر منموهن سینګه د بوټ کزار وکړ چې یو څو قدمه لیري لوېد.
انځور: Reuters/B. Mathur
د سوډان ولسمشر عمر البشیر
د ۲۰۱۰م کال په جنوري په میاشت کې د سوډان په پلازمېنه خرطوم کې د دغه هیواد پر ولسمشر د څپلۍ ګزار وشو. خو د سوډان د صدارت دفتر تر اوسه پورې دا پيښه ردوي. خو د عیني شاهدانو په حواله دا کار شوي وو.
انځور: picture-alliance/AA/E. Hamid
رجب طيب اردوغان
د ۲۰۱۰م کال په فبرورۍ کې یوه کردي ځوان د ترکیې پر اوسني ولسمشر رجب طیب اردوغان د بوټ ګزار وکړ او د کردستان زنده آباد شعار یې ورکړی وو. دغه کردي د سوریې تابعت درلودونکی وو.
انځور: picture-alliance/AA/O. Akkanat
د پاکستان پخوانې ولسمشر اصف علي زرداري
د برتیانيا په برمنګهم ښار کې یو پنځوس کلن شخص (سردار شمیم خان) د پاکستان پخوانی ولسمشر آصف علي زرداري په خپلو دواړو بوټونو وشتلی وو. دا پيښه د ۲۰۱۰ م کال د اګست میاشتې پر ۷ رامنځته شوې وه.
انځور: Getty Images
د بريتانيا پخوانی لومړی وزیر توني بلير
د ۲۰۱۰م کال د سپتمبر مياشتي پر ۴ نېټه د بریتانيا پخوانی لومړی وزیر توني بلير په هګیو او بوټانو ویشتل شوی وو. دا پيښه په ډبلن کې د هغه د «ای جرني» کتاب د معرفي کولو پر مهال رامنځته شوې وه.
انځور: Imago/i Images/E. Franks
د استرالیا پخوانی لومړی وزیر جون هوارډ
د ۲۰۱۰م کال د نوامبر مياشتي پر ۴ په کیمبرج پوهنتون کې د جوړو شویو مراسمو پر مهال د استرالیا پر پخواني لومړي وزیر جون هوارډ، د بوټ ګزار وشو. د دغه عمل ترسره کوونکی یو استرالیایې زده کونکی وو.
انځور: picture-alliance/dpa
د پاکستان پخوانی ولسمشر پرویز مشرف
په لندن کې یوې غونډې ته د وینا پر مهال د پاکستان پر پخواني پوځي واکمن پرویز مشرف د یوه پاکستاني الاصله بریتانوي له خوا د بوټ ګزار شوی وو. دا پيښه د ۲۰۱۱ م کال د فبرورۍ پر ۶ رامنځته شوې وه.
انځور: picture-alliance/dpa
د تائیوان پخوانی ولسمشر ما یِنګ جو
د ۲۰۱۳م کال د سپتمبر مياشتي پر اتمه یوه مظاهره کوونکي د تائیوان پر پخواني ولسمشر ما یِنګ جو، د بوټ ګزار وکړ. خو بوټ تر هغه نه وو رسیدلی.
انځور: Reuters/E. Munoz
د پاکستان پخوانی لومړی وزیر نواز شریف
د پاکستان د سترې محکمې له خوا نا اهل ګڼل شوی پخوانی لومړی وزیر نواز شریف د ۲۰۱۸م کال د مارچ مياشتي پر ۱۱ نیټه په یوه مدرسه کې تر وینا مخکې د یوه تن له خوا په څپلۍ وویشتل شو. په دې توګه نو هغه دریم پاکستانی سیاسي رهبر دی چې د څپلۍ یا بوټ له ګزار سره مخامخ کیږي.