د فرانسې خبري آژانس د اپريل ۱۵مه رپوټ کې د پولیس او څارنوالانو له قوله ليکي، وژل شوی کس چې ظاهراً افغان وو، پوليس يې په چړې سره ګواښلي ول. پيښه د پاريس ښار شمال لور يوې څنډه کې رامنځ ته شوې ده.
د پوليسو په يوه اعلاميه کې ويل شوي چې پر بایسکلونو سپرو پولیسو په لکورنو (La Courneuve) سیمه کې ګزمه کوله او له يوه کس ته يې پام شو چې يوه اوږده چاړه يې په لاس کې ده.
په اعلاميه کې زياته شوې ده چې دغه کس پوليسو ته ګواښ وکړ او بيا د پولیسو پر لور ورغی چې په نتيجه کې پولیسو پر هغې پر له پسې ډزې وکړې او وې واژه.
څارنوالانو د وژل شوي کس په اړه ويلي دي چې هغه «ظاهراً داسې ښکاري چې په افغانستان کې زيږيدلی» وو.
د پوليسو يوې بلې سرچينې د دغې پيښې په اړه ويلي دي: «هيڅ نظريه نشي رد کيدای، خو داسې کومې نخښې چې تروریستي انګيزه ولري نه دي ليدل شوي.»
تر دې وړاندې د اپريل پر ۴مه د فرانسې په سويل ختيځ کې يوه سوډاني، دوه کسان په چړې وژلي ول. دغه سوډانی تر هغې وروسته د تروريزم سره په تړاو جرمونو باندې تورن دی.
فرانسه له ۲۰۱۵م کال راهيسې د افراطي جهاديانو د بمي او وسله والو بريدونو شاهده ده. له هغه وخت راهيسې په دغه هیواد کې څه باندې ۲۵۰ کسان په مختلفو تروريستي حملو کې وژل شوي دي.
آژانسونه/م.ک.ص/ن.ز
grd-tll-sjw/har
له آرشيف څخه يو انځوريز البوم:
د پاریس سړه هوا او په خېمو کې د مهاجرو ژوند
د فرانسې پلازمېنه پاریس په دې ورځو شپو کې د اروپا د نورو سیمو په شان د یخنۍ له څپې سره مخامخ ده. د ځلا او ښکلا د دغه ښار په څنډه کې هغه مهاجر چې له جګړو او بې وزلۍ تښتیدلي دي په خیمو کې ژوند کوي. انځور: Getty Images/J.Saget دا د پاریس په څنډه کې د افغان او نورو مهاجرو یو مؤقتي کمپ دی. خیمې يې واورو پوښلي دي او په خېمو کې پراته نه پوهیږي چې څومره وخت کولی شي له دغه وضعیت سره مقابله وکړي. په خېمو کي زياتره پراته کسان افغان مهاجر دي.
انځور: Getty Images/J.Saget دا هیڅ د حیرانتیا وړ خبره نه ده چې پولیس او یا خلک دغه مهاجر دي اړ باسي چې دغه ځای پریږدي. هغوی کله نا کله خپل ځایونه بدلوي. د فرانسې په کاله سیمه کې په خپل سر د جوړ شوي مهاجر کمپ له بندیدو وروسته ډیر شمیر مهاجرو پاریس ته مخه کړه.
انځور: Getty Images/J.Saget د بشري حقونو او د مهاجرو د حقونو مدافع سازمانونه زیاتره وخت په دغه خیمو کې د مهاجرو د وضعیت په هکله انديښنه څرګندوي. دغو مهاجرو د «سنت مارتین» کانال دواړو خواوو ته خیمې وهلي دي. د ځایي اوسیدونکو له پاره دغه وضعیت منل هم آسانه کار نه دی.
انځور: Getty Images/J.Saget مرستندویه سازمانونه هم په دغو خیمو کې د ځوانو مهاجرو د وضعیت په هکله اندیښمن دي او مهاجر له بیلا بیلو خطرونو سره مخامخ دي. هغوی پیسې، خواړه ګرم کالي نه لري. سږ کال د اروپا ژمی یو له سړو ژمو شمیرل کیږي.
انځور: Getty Images/J.Saget دا چې په کاله کې د «ځنګل» په نوم د کمپ تر تړلو وروسته بریتانيا ته په غیر قانوني توګه د رسیدو چانس ډیر کم شوی دی، خو بیا هم دغه مهاجر په دې هڅه کي دي چې ځانونه بریتانيا ته ورسوي.
انځور: Getty Images/J.Saget ماښام مهال سړی کولای شي چې د پاریس په څنډه کې ډیر مهاجر په دغه کمپ کې وویني. د ورځې په اوږدو کې ځوان مهاجر تیت او پرک کیږي او د شپې د خوب له پاره بیرته خپلو خیمو ته راستنیږي.
انځور: Getty Images/C.Archambault کله چې د شپې هوا سړیږي، هغوی اور بلوي او پر اور راټولیږي. په دغه ځای کې د اور لګیدنې احتمال هم کم نه وي. مهاجر تختې او یا نور هغه څه چې د سوځیدو وړ وي، سوځوي څو خپل ځانونه ګرم وساتي او د ژمې شپې سبا کړي.
انځور: Getty Images/C.Archambault کله نا کله د شپې مهال د سیمې ځینې اوسیدونکي او یا هم خیریه ټولنې دغو مهاجرو ته ګرمه ډوډۍ راوړي. کله له هغوی سره خبري کوي او یا ترې د هغوی ستونزي پوښتي. دا چې دغه کړاو به کله پای مومي لا معلومه نه ده. فرانسې تر مخه هم هڅه کړې چې دغه ډول کمپونه د بشري دلایلو له کبله وتړي.
انځور: Getty Images/J.Saget ویل کیږي چې په کمپونو کې د کافي ځای د نشتوالي له کبله مهاجر مؤقتو کمپونو ته انتقال شوي وو، خو بیا هم خیمو وهلو ته اړ شول. خو یو شمیر مهاجر دغو کمپونو ته د مهاجر په توګه د نوم ثبتیدو له کبله هم نه ځي. خو هغه څه چې روښانه دي دا دي چې انسانان په سخته یخنۍ کې په خیمو کې ژوند کوي چې په دې شپو ورځو کې په پاریس کې د تودوخې درجه منفي څلور سانتي ګراد ته رسیږي.
انځور: Getty Images/J.Saget
