فرانسوي پولیسو هغه کس وژلی چې د کنیسې د سوځولو هڅه یې کړې وه
۱۴۰۳ اردیبهشت ۲۸, جمعه
د فرانسې په شمال کې د روآن ښار پولیسو ویلي دي هغه کس یې په ډزو وژلی دی چې یوې سیمه ایزې کنیسې ته یې د اور لګولو هڅه کړې وه.
د فرانسې د کورنیو چارو وزیر ژرالد دارمانن، په ټولنیزو رسنیو کې له پولیس افسرانو څخه د هغوی د «میړانې او غبرګون» له کبله مننه کړې ده.
دار مانن ویلي: «ملي پولیسو نن سهار په روآن کې هغه وسله وال کس له منځه وړی چې په واضح ډول یې غوښتل د دې ښار کنیسې ته اور واچوي.»
د المان خبري آژانس د جمعې په ورځ سهار (د می میاشتې ۱۷ نیټه) د «فرانس اینفو» رسنۍ په حواله رپوټ ورکړی دی چې پولیسو ته اطلاع ورکړل شوې وه چې له دغې کنیسې څخه لوګي پورته کیږي.
کله چې پولیس د پيښې ځای ته ورسیدل د یوه سړي له مقاومت سره مخامخ شول چې په چاقو او اوسپنیزې میلې سمبال وو. ویل شوي دي چې یو تن پولیس پر دغه کس ډزې وکړې او هغه یې وواژه.
د برید کوونکي هویت او د پيښې انګیزه لا نه ده روښانه شوې. د ښاروالۍ یوه چارواکي ویلي دي چې اور تر کنترول لاندې راوستل شوی دی.
آژانسونه: ش.ن/ ن.ز