په ۲۰۳۰م کال کې د فوټبال نړیوال جام سل کلن کیږي چې په احتمال سره به دغه سیالۍ ډېر کتونکې ولري چې د نړۍ په درو قارو یا لويو وچو، امریکا، اروپا او افریقا کې ترسره کیږي.

د فوټبال نړیوال فدراسیون «فیفا» په زوريخ کې د فیفا تر غونډې وروسته اعلان وکړ چې په ۲۰۳۰م کال کې د فوټبال نړېوال جام سیالۍ په جنوبي امریکا کې افتتاح کیږي او بیا به په مراکش، هسپانیا او پرتګال کې ادامه پيدا کوي. په دې ترتیب، د لومړي ځل له پاره د فوټبال نړېوال جام سيالۍ په درو قارو کې ترسره کیږي.

لومړۍ سيالۍ په پام کې ده چې په يوروګوای کې ترسره او دوه نورې لوبې به په ارجنټاین او پاراګوای کې تر سره شي. يوروګوای په ۱۹۳۰م کال کې د فوټبال نړېوال جام لومړنيو لوبو کوربه وو.

«فيفا او فوټبال په ویشل شوي نړۍ کې متحد کيږي»

په اصل کې د جنوبي امریکا درو هېوادونو غوښتل چې د نړیوال جام ټولو لوبو کوربتوب وکړي، هغه څه چې د فوټبال نړيوال فدراسیون نه ده منلې.

دغه سیالۍ چې په هغو کې به ۴۸ هیوادونه ګډون ولري، په جنوبي امریکا کې تر درو لوبو وروسته په مراکش، هسپانيا او برتګال کې ترسره شي. د دغو شپږو هېوادونو ټول ټيمونه به په اتومات شکل وروستي پړاو ته لار پیدا کړي. له دې نه علاوه په پام کې ده چې د فوتبال نړیوال جام د سل کلنۍ کلیزې جشن د یوروګوای په پلازمینه مونته ويدیو (Montevideo) کې ترسره شي.

په اصل کې په پام کې وه چې د ۲۰۳۰م کال نړيوال جام سیاليو کوربه هېواد یا هېوادونه راتلونکی کال د فیفا په ۷۴مه کنګره کې مشخص شي. د فیفا مشر، جیاني افانتینو، ویلي دي چې «فيفا او فوټبال په ویشل شوې نړۍ کې اتحاد راولي.»

په پام کې ده چې د فوټبال د ۲۰۲۶م کال نړېوال جام سيالۍ، امریکا متحده ایالاتو، مکسیکو او کاناډا کې ترسره شي. د فيفا د اعلان پر اساس، د ۲۰۳۴ نړیوال جام سیاليو د کوربتوب له پاره دې یوازې د آسیا او اوقیانوسیه هېوادونه درخواستونه وکړي. د فیفا تر تصمیم لږ وروسته، سعودي عربستان اعلان وکړ چې د نړیوال جام بعدي دور سیاليو له پاره د کوربتوب درخواست کوي.

د فیفا د رهبرۍ دغه تصمیم چې د ۲۰۳۰م کال نړیوال جام سیالۍ دې د نړۍ په درو قارو کې ترسره شي، د اروپا د فوټبال د مینه والو شبکې FSE لخوا تر سختو نیوکو لاندې راغلی دی. دغې شبکې په دغو لوبو کې د اشتراک په تړاو چاپيريالي عواقبو او د اوږدو سفرونو په څېر ستونزمنو مواردو ته اشاره کړې ده.

(dpa, sid)pa/af/mks/aa/