د ليبيا په سواحلو کې نژدې سل تنه مهاجر لادرکه شوي دي
۱۳۹۶ فروردین ۲۷, یکشنبه
بل خوا داسې هم ويل شوي دي چې له دغې پيښې څخه ۲۳ تنه ژوندي پاتې دي. په ورکو شويو کې ۱۵ ښځې او ۵ ماشومان هم شامل دي.
د ليبيا د ساحلي ګارد يوه افسر جنرال ايوب قاسم ويلي دي چې د دوي ځواکونو په مديترانه سمندرګي کې ۲۳ تنه نارينه چې د مختلفو افريقايي هيوادنو اتباع دي، ژغورلي دي. د قاسم په وينا دغو کسانو د اوبو پر سر يو جسم باندې خپل ځانونه نښلولي وو او پر دې توانيدلي وو چې د ژغورنۍ ټيم تر رسيدو ژوندي پاتي ول. د ژغورل شويو کسانو په وينا چې د کشتۍ ټوله بدنه له منځه تللې وه.
د فرانسې خبري آژانس يوه انځور اخيستونکي خبر ورکړی دی چې ژغورل شوي کسان د طرابلس په بندر کې تر درملنو لاندي دي. په پام کې ده چې دغه کسان د يوې ادارې چې د غيرقانوني مهاجرو په چارو کې کار کوي، يوه مرکز ته انتقال شي.
ايوب قاسم وویل چې د ښځو او ماشومانو په ګډون د ورکو شويو کسانو د نجات په اړه ډیره کمه تمه لري. د هغه په وينا چې د بدې هوا له امله دوي تر اوسه په دې ندي توانيدلي چې یو جسد هم وموندي.
نژدې ۶۰۰ تنه ډوب شوي دي
د مهاجرت نړيوالې ادارې (آي او ام) د رپوټونو پر حواله، د روان کال له پيل تر اوسه د ليبيا په سواحلو کې لږ تر لږه ۵۹۰ تنو خپل ژوند له لاسه ورکړی او يا لادرکه شوي دي. د ليبيا سواحل د هغو کسانو لپاره په يوه ترانزيتي لاره اوښتې ده چې غواړي په غيرقانوني توګه اروپا ته ځانونه ورسوي.
د مديترانې سمندرګې له دغې خطرناکې لارې څخه نه يوازې افريقايي مهاجر، بلکه د منځنې ختيځ اکثره بيځایه شوي وکړي هم ايټاليا ته د رسيدو په موخه کار اخلي.
د مهاجرت په برخه کې د ملګرو ملتونو عالي کمشنرۍ معلومات ښيي چې د روان کال په لمړيو درو مياشتو کې له ۲۴ زرو څخه زيات مهاجر ليبيا څخه ايټاليا ته رسيدلي دي. د تيرکال په همدې موده کې دغه رقم ۱۸ زرو ته رسيدلي وو.
شاوخوا يو ميليون انسانان په تمه دي
د ليبيا په سواحلو کې منظم سمندري ځواکونه شتون نلري. دغې تشې ته په کتو دغه مهاجرتون تر ډیره بريده د هغو مختلفو ملیشو ډلو په مرسته ترسره کيږي چې ځان ساحلي ژغورونکي بولي. دغه ډلې په وار وار انساني قاچابرانو سره د همکارۍ په درلودو تورنې شوي دي. ويل شوي چې دغې سيمه کې د انساني قاچاق د کاروباره له بابته ډيرې پيسې ترلاسه کيږي.
دې سره د ملګرو ملتونو د مهاجرت ادراې وړاندوينه کوي چې په احتمالي توګه له ۸۰۰ زرو تر يو ميليون پورې خلک په پام کې لري چې د ليبيا له طریقه اروپايي هيوادونو ته ځانونه ورسوي.
پر ورته موضوع یو انځوريز البوم زموږ له آرشيف څخه (26.05.2016):